Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Израиль калыклан ойло: Мый Господь, тендан Юмыда, улам.3 Ончыч те Египетыште илен улыда, но мом тиде элыште ыштеныт, тудым ида ыште. Мый тендам Ханаан мландышке наҥгаем – туштат тусо калык семын ида ыште, нунын йӱлаштым ида шукто.4 Мыйын законем шуктен шогыза, Мыйын пунчалем эскерен шогыза, нунын почеш илыза. Мый Господь, тендан Юмыда, улам.5 Мыйын чыла пунчал ден законем шуктыза. Нуным шуктен шогышо еҥ илаш тӱҥалеш. Мый Господь, [тендан Юмыда,] улам.
6 Нигӧ тендан кокла гыч шке лишыл родо-тукымжо дене вате-марий семын малышаш огыл. Мый Господь улам.7 Ават дене вате-марий семын мален, ачатым ит шӱктаре. Тудо тыйын ават, тудын дене тый малышаш отыл.8 Ачатын изватыж дене ит мале – тидын дене тый ачатым шӱктарет.9 Шке ака-шӱжарет дене, ачатын але аватын ӱдыржӧ дене – тудо кеч шке суртыштет але суртет деч ӧрдыжтӧ шочшо лийже – ит мале.10 Ӱдыр уныкат дене, эргычын але ӱдыретын ӱдыржӧ дене, ит мале. Тидын дене тый шкендым шӱктарет.11 Ачатын вес ватыжын ӱдыржӧ дене ит мале: тудо – ачатын ӱдыржӧ, тыйын акат але шӱжарет.12 Ачатын акаже але шӱжарже дене ит мале: нуно ачат дене ик вӱр улыт.13 Аватын акаже але шӱжарже дене ит мале: нуно ават дене ик вӱр улыт.14 Ачатын изажым але шольыжым шӱктарен, тудын ватыж дене ит мале: тудо тылат кокат лиеш.15 Шешкыч дене ит мале: тудо эргычын ватыже. Тудын дене ит мале.16 Изатын але шольычын ватыж дене ит мале – тидын дене тый изатым але шольычым шӱктарет.17 Аваж да ӱдыржӧ дене ит мале. Ватетын ӱдыржӧ дене ит мале, тудын эргыжын але ӱдыржын ӱдыржӧ денат ит мале – нуно ик вӱр улыт, тиде йырнык лиеш.18 Илыше ватет улмо ӱмбач тудын акажым але шӱжаржым марлан ит нал, тудын дене ит мале. Уке гын нуно марийым тавалыше ӱдырамаш лийыт.
19 Ӱдырамашын тылзашыже годым тудын деке ит лишем, тунам тудо ару огыл.20 Лишылъеҥетын ватыж дене ит воч: тудлан нӧшмым йоктарен, шкендым ит амырте.21 Шке икшыветым Молохлан*а ит пу, тидын дене шке Юметын лӱмжым ит шӱктаре. Мый Господь улам.22 Ӱдырамаш дене малыме семын пӧръеҥ дене ит воч: тиде йырнык.23 Вольык дене кӱтлен, [нӧшметым] йоктарен, шкендым ит амырте. Ӱдырамаш, вольык дене кӱтлаш манын, тудын ончыкшо шогалшаш огыл. Тиде – йырнык.
24 Нимо тыгай дене шкендам ида амырте. Вет Мыйын тендан деч поктен колтышаш калык-влак чыла тидын дене шкеныштым амыртеныт.25 Нунын верч тиде мланде шакшылалтын. Мый тиде мландым мут кучаш шогалтем, да тудо ӱмбалныже илыше-влакым укшич луктын шуа.26 А те Мыйын пунчал ден закон-влакем шуктен шогыза. Израиль тукым еҥат, тендан коклаште илыше йотъеҥат тыгай йырнык пашам ынже ыште.27 Тиде мландыште тендан деч ончыч илыше-влак чыла нине йырныкым ыштеныт, садлан мланде шакшылалтын.28 Тыге ыштен, теат тиде мландым шакшыледа гын, тудо тендан деч ончыч илыше-влакым укшичме семын тендамат укшич луктын шуа.29 Кӧ тыгай йырныкым ышташ тӱҥалеш, тудо шке калыкше кокла гыч кораҥдыме лийшаш.30 Тендан деч ончыч тиде мландыште нине йырныкым ыштен шогеныт. Тыгай йӱла почеш илен, шкендам амырташ огыл манын, Мыйын чыла кӱштымем шуктен шогыза. Мый Господь, тендан Юмыда, улам».
*а 18:21 Молох – ханаан калыкын шояк юмыжо, нуно тудлан надыр шотеш шке йочаштым пуэныт.
Глава 18