Выбрать язык
Книги Ветхого Завета
Книги Нового Завета
с русским текстом1 Ааронын кок эргыжын Господь деке [йот тул дене] лишеммекышт да колымекышт, Господь Моисейлан ойлен.2 Тудо Моисейлан каласен: «Ааронлан, шке изатлан, ойло: святой деч святой верыш, пӱрдыш шеҥгеке, шондык комдыш ончыко, кунам шона, тунам ынже пуро. Уке гын тудо кола, вет Мый шондык комдыш ӱмбалне пыл лоҥгаште кончаш тӱҥалам.
3 Святой верыш пурымыж деч ончыч Аарон сулык верч надырлан самырык ӱшкыжым да йӱлалтен пуымо надырлан тагам кондышаш.4 Тек тудо святой кужу йытын тувырым, чара могыржым петырыше йытын йымал вургемым чия, йытын ӱштым ӱшталеш, йытын кидарым упшалеш. Тиде святой вургем улыт. Тек Аарон ончыч мушкылтеш, вара веле ты вургемым чия.5 Вара Аарон тек Израиль калык деч сулык верч надырлан [кӱтӱ гыч] кок казатагам да йӱлалтен пуашлан ик тагам налеш.
6 А шкеж да ешыж дене касарыме йӱлам шукташ манын, сулык верч надырлан Аарон тек шкеж верч самырык ӱшкыжым конда.7 Вара тудо тек кок казатагам налеш да нуным Господь ончыко Юмо дене вашлийме омашыш пурымо вер воктене шогалта.8 Нине кок казатагалан тек шеревам кудалта: кудыжым Господьлан пуаш, кудыжым ир мландыш колташ.9 Кудо казатагам шерева Господьлан пуаш ончыкта, тек тудым Аарон сулык верч надырлан конда.
10 А ир мландыш колташ ончыктымо казатагам Аарон тек Господь ончыко илышым конден шогалта. Калык дене касарыме йӱлам шукташ манын, тек тиде казатага ир мландыш колтымо лиеш. [Тыге тудо шке ӱмбаланже калыкын сулыкшым еҥ коштдымо мландыш наҥгая.]
11 Вара Аарон тек шкеж верч самырык ӱшкыжым сулык верч надырлан вӱден конда да, шкеж да ешыж дене касарыме йӱлам шукташ манын, тудым шӱшкылеш.12 Вара Господь ончылно улшо жертвенник гыч тич пыштыме тулшол атым, шурен тыгыдемдыме тӱтыртышым кок кормыж тич налеш да пӱрдыш шеҥгеке пурта.13 Тек Аарон тӱтыртышым Господь ончылно тулшол ӱмбаке пышта, да ойпидыш шондык комдышым тӱтырымӧ шикш леведеш. Колаш огыл манын, тек тыге ышта.14 Вара тудо ӱшкыж вӱрым налеш да комдышын ончыл велышкыже, тыгак комдыш ончылно улшо верыш парняж дене шым гана шыжыкта.
15 Вара Аарон тек калыкын сулыкшо верч пуымо надыр казатагам шӱшкылеш. Вӱржым пӱрдыш шеҥгеке пурта да, ӱшкыж вӱр дене ыштыме семынак, комдыш ӱмбак да комдыш ончылысо верыш шыжыкта.16 Тыге Аарон святой деч святой верым Израиль калыкын ару огыл улмыж деч, законым пудыртымыж деч, чыла сулыкшо деч эрныктыме йӱлам шукта. Израиль эрге-влак коклаште, нунын ару огыллыкышт коклаште, улшо Юмо дене вашлийме омаш денат тудо тыге ыштышаш.17 Кунам Аарон святой деч святой верышке эрныктыме йӱлам шукташ пура, тушеч лекмыжлан Юмо дене вашлийме омашыште ик еҥат лийшаш огыл. Тыге тудо шкенжым, ешыжым, уло Израиль калыкым эрныкта.18 Вара тудо тек Господь ончылно улшо жертвенник деке лектеш да тудын дене эрныктыме йӱлам шукта – самырык ӱшкыжын да казатаган вӱрыштым налеш, жертвенникысе тӱкӧ-влакым чыла могырымат шӱралта.19 Тек жертвенник ӱмбаке вӱрым парняж дене шым гана шыжыкта – тыге тудо жертвенникым Израиль калыкын ару огыл улмыж деч эрныкта да святитла.
20 Святой деч святой вер, Юмо дене вашлийме омаш, жертвенник [да иерей-влак] дене эрныктыме йӱлам шуктымеке, тек Аарон илыше казатагам вӱден конда.21 Тек кок кидшымат казатаган вуйышкыжо пышта да тудын ӱмбалныже Израиль эрге-влакын чыла закон пудыртымаш ден осал пашаштым – чыла нунын сулыкыштым – чон почын ойла. Тек Аарон чыла тидым казатаган вуйышкыжо кусара да тудым ир мландыш наҥгаяш ойырымо еҥ дене колта.22 Казатага шке ӱмбалныже калыкын чыла сулыкшым еҥ коштдымо мландыш наҥгая. Казатагам наҥгайыше еҥ тек тудым ир мландыш колта.
23 Тидын деч вара Аарон тек Юмо дене вашлийме омашыш пура. Святой деч святой верыш пурымо годым чийыме йытын вургемжым тек скинийыште кудашын кода.24 Тек тудо святой верыште мушкылтеш, шкенжын тыглай вургемжым чия. Вара лектеш да шкеж верч йӱлалтен пуымо надырым, калык верч йӱлалтен пуымо надырым конда – шкеж дене, [ешыж дене], калык дене [да иерей-влак дене] эрныктыме йӱлам шукта.25 Тек сулык верч кондымо надыр вольыкын кояжым Аарон жертвенникеш йӱлалтен тӱргыкта.
26 Сулыкым наҥгайыше казатагам намиен колтышо еҥ вургемжым мушшаш, шкежат мушкылтшаш. Тидын деч вара тудо станыш пурен кертеш.27 Сулык верч кондымо надыр ӱшкыж ден казатагам, кудын вӱрышт святой вер дене эрныктыме йӱлам шукташлан пуртымо лийыныт, тек стан деч ӧрдыжкӧ луктыт да коваште, шыл ден шолораштым тулеш йӱлалтат.28 Нуным йӱлалтыше еҥ вургемжым мушшаш, шкежат мушкылтшаш. Тидын деч вара тудо станыш пурен кертеш.
29 Тек тиде тыланда курым-курымешлан закон лиеш: шымше тылзын луымшо кечынже пӱтым кучыза да нимогай пашам ида ыште – израиль тукым еҥат, тендан коклаште илыше йотъеҥат.30 Чыла сулыкдам касараш манын, тиде кечын тендан дене эрныктыме йӱлам эртараш тӱҥалыт. Господь ончылно те ару лийшаш улыда.31 Тек тиде тыланда шуматкече, каныш кече, лиеш. Тиде кечын пӱтым кучыза. Тыгай закон тыланда курым-курымешлан лиеш.
32 Эрныктыме йӱлам ачаж деч вара шогалтыме да шӱрен палемдыме иерей шуктышаш. Тек тудо йытын вургемым, святой вургемым, чия33 да святой деч святой верым, Юмо дене вашлийме омашым, жертвенникым, тыгак иерей-влак ден уло израиль калыкым эрныкта.
34 Тиде тыланда – курым-курымешлан шуктен шогышаш закон: идалыклан ик гана израиль калык дене чыла сулыкым касарыме йӱлам эртарыза».
Аарон чылажымат Господьын Моисейлан кӱштымыж семын ыштен.
*а 16 Касарымаш кече – тудым эше Йом Кипур манын лӱмдат.
Глава 16