Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Теве проказе дене черле лийше еҥым эрныктыме годым мом ышташ кӱлмӧ шотышто закон. Тек тудым иерей деке кондат.3 Тек иерей тудын деке стан гычын лектеш да тудым ончалеш. Тиде еҥын проказе деч пареммыжым ужеш гын,4 тудым эрныкташлан илыше кок ару кайыкым, кедр пушеҥге комылям, йошкар шӱртым да иссоп укшым кондаш кӱшта.5 Тек иерей ик кайыкшым йогын вӱдым темыман шун ате ӱмбалне шӱшкылаш кӱшта,6 а шкеже вес кайыкшым, кедр пушеҥге комылям, йошкар шӱртым, иссоп укшым налеш да нуным йогын вӱдан ате ӱмбалне шӱшкылмӧ кайыкын вӱрешыже нӧрта.7 Вара тек тиде вӱрым проказе чер деч эрныктыме еҥ ӱмбаке шым гана шыжыкта да тудым ару манын увертара, а илыше кодшо кайыкым эрыкыш колта.8 Тек эрныктыме еҥ шке вургемжым мушкеш, чыла ӱп ден пунжым нӱжеш да вӱд дене мушкылтеш – тунам тудо ару лиеш. Тидын деч вара тудо станыш пурен кертеш, но эше шым кечым шке омашыж деч ӧрдыжтӧ эртарышаш.9 Шымше кечын тудо чыла ӱп ден пунжым – вуйысо ӱпшым, пондашыжым, шинчапунжым – угыч нӱжен шуышаш. Тек тудо вургемжым, капшым вӱд дене мушкеш, тунам ару лиеш.
10 Кандашымше кечын тудо экшыкдыме [икияш] кок тагам, экшыкдыме икияш ик шорыкым кондыжо. Эше ефан кум луымшо ужашыже эн сай ложашым, олив ӱй дене йӧрен, кондыжо – тидыже кинде надыр лиеш. Тыгак ик лог*а олив ӱйым налже.11 Эрныктыме йӱлам шуктышо иерей тиде еҥым надырже дене пырля Юмо дене вашлийме омашыш пурымо вер воктеке Господь ончыко шогалта.12 Тек иерей ик тагажым налеш да тудым ик лог олив ӱй дене пырля титак верч надырлан Господь ончылно рӱзалтен конда.13 Тагам тудо сулык верч надыр ден йӱлалтен пуымо надыр вольыкым шӱшкылмӧ святой верыште шӱшкылшаш. Титак верч кондымо надыр, сулык верч надыр семынак, иерейлан лиеш. Тиде – поснак святой надыр.14 Тек иерей титак верч кондымо надыр вольыкын вӱржым налеш да эрныктыме еҥын пурла пылыш мучашкыже, пурла кидшын кугыварняшкыже да пурла йолжын кугыварняшкыже шӱралта.15 Вара кондымо олив ӱйым шке шола копашкыже йоктара,16 тушан пурла кошарварняжым нӧрта да Господь ончылно тиде ӱйым шым гана шыжыкта.17 Тек копаштыже кодшо олив ӱйым иерей эрныктыме еҥын пурла пылыш мучашкыже, пурла кидысе кугыварняшкыже, пурла йолысо кугыварняшкыже шӱралта – тушкак, кушко титак верч кондымо надыр вольыкын вӱржым шӱралтыме.18 Тек копавундаште кодшо олив ӱйым эрныктыме еҥын вуйышкыжо йыгалта. Тыге иерей тудын дене Господь ончылно эрныктыме йӱлам шукта.
19 Тек иерей сулык верч надырым конда, тиде еҥ дене эрныктыме йӱлам эртарен, тудым ару огыл улмыж деч эрныкта. Тидын деч вара тудо йӱлалтен пуымо надыр вольыкым шӱшкылшаш.20 Тек иерей йӱлалтен пуымо надыр ден кинде надырым жертвенник ӱмбак пышта. Тыге иерей тиде еҥ дене эрныктыме йӱлам шукта, да тудо ару лиеш.
21 Но ты еҥ йорло да тыгай надырым конден ок керт гын, тек эрныктыме йӱлам шукташлан титак верч надыр шотеш рӱзалтен пуышаш ик тагам конда. Кинде надырлан тудо ефан ик луымшо ужашыже эн сай ложашым, олив ӱй дене йӧрымым, тыгак ик лог олив ӱйым налшаш.22 Эше кок кедым але кок самырык кӧгӧрченым – можым пуэн кертеш – тек конда: ик кайыкшым – сулык верч надырлан, весыжым – йӱлалтен пуашлан.23 Эрныктыме йӱлам шукташ манын, тек чыла тидым кандашымше кечын Господь ончыко, Юмо дене вашлийме омашыш пурымо верыш, иерей деке конда.24 Тек иерей титак верч кондымо надыр тагам, тыгак ик лог олив ӱйым налеш да Господь ончылно рӱзалтен конда.25 Вара титак верч надыр тагам шӱшкылеш. Иерей тиде вольыкын вӱржым налшаш да эрныктыме еҥын пурла пылыш мучашкыже, пурла кид ден пурла йолжын кугыварняшкышт шӱралтышаш.26 Вара тек иерей олив ӱйым шола копашкыже йоктара27 да тиде олив ӱйым пурла кошарварняж дене Господь ончылно шым гана шыжыкта.28 Тек копавундаште улшо олив ӱйым иерей тыгак эрныктыме еҥын пурла пылыш мучашкыже, пурла кид ден пурла йолжын кугыварняшкышт шӱралта – тушкак, кушко титак верч кондымо надыр вольыкын вӱржым шӱралтыме.29 А копавундаште кодшо олив ӱйым иерей тек тудын вуйышкыжо йыгалта. Тыге тудо Господь ончылно ты еҥ дене эрныктыме йӱлам шукта.30 Вара иерей тудын конден кертме кайыкше-влакым – кедым але самырык кӧгӧрченым – конда:31 иктыжым – сулык верч надырлан, весыжым – кинде надыр дене пырля йӱлалтен пуаш. Тыге иерей Господь ончылно ты еҥ дене эрныктыме йӱлам шукта.32 Теве проказе черан йорло еҥым эрныктыме годым мом ышташ кӱлмӧ нерген закон».
33 Господь Моисей ден Ааронлан каласен:34 «Мый тыланда Ханаан мландым пуэм. Кунам те тиде мландын озаже лийыда да Мый тушто пӧртышкыда проказе черым колтем,35 тунам суртоза иерей деке толшаш да каласышаш: ”Мыйын пӧртыштем проказе улмо гай коеш”.36 Пӧртыштӧ чыла мо улшо ару огыл ынже лий манын, тушко ончалаш мийымыж деч ончыч тек иерей пӧрт гыч чыла лукташ кӱшта. Тидын деч вара тудо пӧртым ончаш толеш.37 Пырдыжлаште ужаргырак да йошкаргырак тамга-влакым ужеш, да нуно пырдыжыш келгемын пуреныт гын,38 тек иерей тушеч лектеш да пӧртым шым кечылан петыра.39 Шымше кечын иерей адакат толшаш. Тудо тамга-влакын пырдыж мучко шарлымыштым ужеш гын,40 тек тамган кӱ-влакым пырдыж гыч лукташ да ола деч ӧрдыжкӧ ару огыл верышке наҥгаен кудалташ кӱшта.41 А пӧрткӧргым пӱтынек нӱжен эрыктышт. Пырдыж гыч нӱжымӧ шуным, ола деч ӧрдыжкӧ луктын, тек ару огыл верыш ястарат.42 Луктын налме кӱ олмыш тек весым пуртен шындат, пырдыжымат вес шун дене шӱрат.
43 Кӱм пудыртен луктын, пӧртым нӱжен налын, угыч шӱрен шындымеке, пӧртыштӧ тамга-влак уэш лектыт да шарлат гын,44 тудым иерей адак ончен лекшаш. Тамга-влак шарленыт гын, тунам тиде – эҥгекым кондышо проказе. Тиде пӧрт ару огыл.45 Тиде пӧртым пужыман, тудын кӱжым, пырняжым, пырдыжыш шӱрымӧ шунжым ола деч ӧрдыжкӧ ару огыл верыш лукман.46 Тиде пӧртым петырымаште кучымо жапыште тушко иктаж-кӧ пура гын, тудо еҥ кас марте ару огыл лиеш.47 Кӧ тиде пӧртыштӧ мала – шке вургемжым мушшаш, [кас марте тудо ару огыл лиеш]. Кӧ тиде пӧртыштӧ кочкеш – шке вургемжым мушшаш, [кас марте тудо ару огыл лиеш].
48 Но иерей толеш да пырдыжым угыч шӱрымӧ деч вара тамга шарлымым ок уж гын, пӧртым ару манын увертарышаш: чер пытен.49 Пӧртым эрныкташлан тудо кок кайыкым, кедр пушеҥге комылям, йошкар шӱртым да иссоп укшым налшаш.50 Тек иерей ик кайыкшым йогын вӱдым темыман шун ате ӱмбалан шӱшкылеш.51 Вара кедр комылям, иссоп укшым, йошкар шӱртым, илыше вес кайыкым налеш, нуным шӱшкылмӧ кайыкын вӱрышкыжӧ да йогын вӱдыш чыкен луктеш да пӧрт ӱмбаке шым гана шыжыкта.52 Тыге тудо пӧртым кайыкын вӱржӧ да йогын вӱд дене, илыше кайык, кедр комыля, иссоп укш да йошкар шӱртӧ дене эрныкта.53 А илыше кайыкым тек ола деч ӧрдыжкӧ эрыкыш колта. Тыге иерей пӧрт дене эрныктыме йӱлам шукта, да пӧрт ару лиеш.
54-55 Теве кеч-могай проказе, йора, вургемысе да пӧртысӧ проказе, тыгак пуалше, экземе да ошалге тамга-влак шотышто закон.56 Тудо нунын ару але ару огыл улмыштым рашемда. Проказе шотышто теве тыгай закон».
*а 14:10 Лог – ик литрын ик кумшо ужашыже.
Глава 14