Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Мый Иуда тукым гыч Хур эрге Урийын Веселеил эргыжым ойырен налынам.3 Тудым Мый Юмын Шӱлыш дене теменам, тудлан уш-акылым, шинчымашым да тӱрлӧ пашалан усталыкым пуэнам.4 Тудо шӧртньӧ, ший да той дене, [шемалге-канде, шемалге-йошкар, йошкар меж да чапле йытын шӱртӧ дене] тӱрлым ыштен мошта,5 кӱм пӱчкеда да тудым кӱлеш верыш пуртен шында, пу ӱзгарым пӱчкын луктеш – икманаш, мастарын ыштыме тӱрлӧ арверым ямдыла.6 Тудлан Мый полышкалышым пуэм, тудо Дан тукым гыч Ахисамах эрге Аголиав лиеш. Мом тылат кӱштенам, чыла тидым ышташ Мый моло уста еҥланат мастарлыкым пуэм.7 Юмо дене вашлийме омашым, ойпидыш шондыкым, шондык комдышым, скиний пелен кучылтмо чыла ӱзгарым,8 ӱстелым да тудын пелен кучылтмо [чыла] арверым, яндар шӧртньӧ дене ыштыме светильникым да тудын пелен кучылтмо ӱзгарым, тӱтырымӧ жертвенникым,9 надыр йӱлалтыме жертвенникым да тудын пелен кучылтмо чыла арверым, чаным да тудын негызшым,10 служитлышаш вургемым – иерей Ааронлан святой вургемым да тудын эргыж-влаклан служитлышаш вургемым,11 елейым, святой верлан тамлыпушан тӱтыртышым – чылажымат нуно тыланет кӱштымем семынак ыштат».
12 Господь Моисейлан каласен:13 «Израиль калыклан тыге ойло: Мыйын шуматкече-влакем шуктен шогыза, вет тиде – тукым гыч тукымыш Мыйын да тендан коклаште улшо пале. Шарнен шогыза: Мый тендам святитлыше Господь улам.14 Шуматкече йӱлам шуктен шогыза, вет шуматкече тыланда святой улеш: кӧ тудым шакшыла, тудо пуштмо лийшаш. Кӧ шуматкечын пашам ышта, тыгай еҥым шке калыкше кокла гыч кораҥдыман.15 Куд кече тек пашам ыштат, а шымше кече, шуматкече – Господьлан святитлен ойырымо каныш кече: шуматкечын пашам ыштыше кажне еҥ пуштмо лийшаш.16 Тек израиль калык шуматкечым шуктен шога, тек шуматкечым тукым гыч тукымыш пайремлен шога, тиде – курымаш ойпидыш.17 Тиде – Мыйын да израиль калык коклаште улшо курымаш пале, вет куд кече жапыште Господь кавам да мландым ыштен, а шымше кечын Тудо пашаж деч канен».
18 Моисейлан Синай курыкышто ойлымыжым чарнымеке, Юмо тудлан кок ойпидыш кӱоҥам пуэн, туштыжо Юмын кидше дене возымо лийын.
Глава 31