Выбрать язык
Книги Ветхого Завета
Книги Нового Завета
с русским текстом1 Мыйын иереем лийышт манын, Израиль калык кокла гыч шке декет Аарон изатым да тудын Надав, Авиуд, Елеазар да Ифамар эргыж-влакым ӱж.2 Аарон изат чаплын да сӧралын койжо манын, тудлан святой вургемым ыште.3 Уста еҥ-влаклан, кудыштлан Мый мастарлыкым [да шонен моштымашым] пуэнам, каласе: Аарон Мыйын иереем лийже да тудым святитлаш манын, тек тудлан нуно [святой] вургемым ыштат.4 Теве тыгай вургемым нуно ыштышаш улыт: оҥсакышым, ефодым, ӱмбал вургемым, сӧрастарен куымо кужу тувырым, кидарым*а да ӱштым. Аарон изат ден тудын эргыж-влак Мыйын иереем лийышт манын, тек нунылан святой вургемым ыштат.5 Тек нуно тидлан шӧртньым, шемалге-канде, шемалге-йошкар да йошкар межым, йытын шӱртым налыт.
6 Тек ефодым шӧртньӧ шӱртӧ, шемалге-канде, шемалге-йошкар, йошкар меж да чапле йытын шӱртӧ дене устан куат.7 Ефод сайын шинчыже манын, тудын кӱшыл кок лукыштыжо вачӱмбал ластык*б лийшаш.8 Ефод ӱмбалысе ӱштым ефод семынак ыштыман: тидлан [яндар] шӧртньӧ дене ыштыме шӱртӧ, шемалге-канде, шемалге-йошкар, йошкар меж да чапле йытын шӱртӧ кӱлыт.
9-10 Нал кок оникс кӱм, тушан шочмо радам почеш Израиль эрге-влакын лӱмыштым пӱчкын лук: ик кӱэш – куд лӱмым, вес кӱэш – вес куд лӱмым.11 Нине кок кӱэш Израиль эрге-влакын лӱмыштым туге пӱчкын лук, кузе кӱм пӱчкедыше мастар печатьым пӱчкын луктеш, да узоран шӧртньӧ рамыш вераҥде.12 Вара нуным ефодын вачӱмбал ластыклашкыже пижыкте. Тиде кӱ-влак Израиль эрге-влак нерген шарныкташ тӱҥалыт. Тек Аарон нунын лӱмыштым Господь ончылно лиймыж годым вачӱмбалныже шарныктыш семын нумалеш.13 Узоран рамым [яндар] шӧртньӧ дене ыште.14 Яндар шӧртньӧ дене кок вичкыж шинчырым пунен ыште да нуным рамыш [вачӱмбал ластыкын ончыл могырешыже] пижыкте.
15 Юмын вашмутшым палаш манын, суд оҥсакышым ыште. Тек тудым ефодым ыштыме семынак устан ыштат: шӧртньӧ шӱртым, шемалге-канде, шемалге-йошкар, йошкар межым да чапле йытын шӱртым кучылтыт.16 Оҥсакыш ныл лукан, пелыгыч тодыл пыштыме, шеч кутышан да шеч лопкытан лийшаш.17 Тушко кӱ-влакым ныл рат дене пеҥгыдемден шынде. Икымше ратыште – рубин, топаз, изумруд.18 Кокымшо рат – карбункул, сапфир, алмаз.19 Кумшо рат – яхонт, агат да аметист.20 Нылымше рат – хризолит, оникс да яспис.*в Нуным узоран шӧртньӧ рамылашке пижыктен шындыман.21 [Кок вачӱмбалне] кӱ чылаже латкокыт лийшаш. Тиде чот Израиль эрге-влакын [латкок] лӱмышт [да шочмо радамышт] дене келшен толжо. Кажне кӱэш латкок тукым гыч иктыжын лӱмжым, печатьысе семынак, пӱчкын лукман.
22 Оҥсакышлан яндар шӧртньӧ дене кок вичкыж шинчырым пунен ыште.23 Тыгак шӧртньӧ дене кок колчам ыште да оҥсакышын кӱшыл кок лукешыже пижыкте.24 Пунымо кок шӧртньӧ шинчырым нине кок колчашке чыке.25 Шинчыр-влакын ик мучашыштым узоран рамылашке, а вес мучашыштым ефодын вачӱмбал ластыклажын ончыл могырешышт пеҥгыдемден шынде.26 Эше кок шӧртньӧ колчам ыште да нуным оҥсакышын ефод деке тӱкнышӧ шеҥгел могырешыже, вес кок лукешыже, пеҥгыдемден шынде.27 Тыгак кок шӧртньӧ колчам ыште да нуным ефодын кок вачӱмбал ластыкшын ончыл могырысо ӱлыл тӱрешыже, ефод деке урген шындыме вереш, ефодын ӱштыж деч кӱшнырак, ушнымаште пеҥгыдемден шынде.28 Оҥсакышым колчашт дене ефод колчалашке шемалге-канде меж шӱртӧ дене кылдаш кӱлеш: оҥсакышыже ефод ӱштӧ деч кӱшнырак лийшаш, ефод деч ойырлен шогышаш огыл.29 Тек Аарон святой верыш пурымыж годым израиль эрге-влакын лӱмыштым, Господь нуным эре шарныже манын, суд оҥсакышеш, шӱмжӧ пелен, эре нумал коштеш. [Суд оҥсакышын кок лукешыже пунымо шинчырым пеҥгыдемде да кок вачӱмбал ластыкын ончыл могырышкыжо кок рамым пыште.]30 Суд оҥсакышыш урим ден туммимым*г пыште. Тек нуно Ааронын Господь ончыко [святой верыш] пурымыж годым шӱмжӧ пелен лийыт. Тек Аарон Господь ончылно лиймыж годым Израиль эрге-влак шотышто чын суд пунчалым шӱмжӧ пелен эре нумалеш.
31 Ефод дене пырля чияшлан тӱрыснек шемалге-канде тӱсан ӱмбал вургемым ыште,32 покшелныже вуйым чыкаш рож лийже. Тудо ынже кушкедле манын, йырже колтымо куэм, кӱртньӧ тувырысо гаяк, чоткыдо лийшаш.33 Шемалге-канде, шемалге-йошкар, йошкар меж [да чапле йытын шӱртӧ] дене гранат саска-влакым ыште, нуным урвалте йыр пижыкте, коклашкышт шӧртньӧ изоҥгыр-влакым сакале.34 Нине шӧртньӧ изоҥгыр ден гранат саска-влак ӱмбал вургем урвалте йыр почела кечышаш улыт.35 Тек Аарон служитлымыж годым тиде ӱмбал вургемым чия. Господь ончыко святой верыш пурымыж да тушеч лекмыж годым Аарон ынже коло манын, нине изоҥгыр деч йӱк шоктышаш.
36 Яндар шӧртньӧ дене изоҥам ыште. Печатеш пӱчкын лукмо семын тушан «Господьлан святитлен ойырымо» манын пӱчкын лук.37 Тудым кидарын ончыл велкыже шемалге-канде шӱртӧ дене кылден шынде.38 Тек тиде оҥа Ааронын саҥгаштыже лиеш, да израиль эрге-влакын святой надыр ден пӧлекым кондымышт годым ыштыме кеч-могай йоҥылышым Аарон шке ӱмбакыже налеш. Израиль эрге-влак деке Господьын суап кумылжо лийже манын, тиде оҥа эре Ааронын саҥгаштыже лийшаш.
39 Чапле йытын вынер дене кужу тувырым да кидарым ыште, тыгак тӱрлыман ӱштӧ лийже.40 Чаплын да сӧралын койышт манын, Аарон эрге-влаклан кужу тувырым, ӱштым да вуйчиемым ыште.41 Тиде вургемым Аарон изат ден тудын эргыж-влаклан чикте да нуным, шӱрен палемден, иерейлан святитлен шогалте. Тыге нуно Мыйын иереем-влак лийыт.42 Кыдал гыч пулвуй марте чара могырым петыраш манын, нунылан йытын дене йымал вургемым ыште.43 Сулыкыш пураш да тидлан верч колаш огыл манын, тек Аарон да тудын эргыж-влак Юмо дене вашлийме омашыш пурымышт годым але святой верыште служитлашлан жертвенник деке лишеммышт годым тиде йымалвургемым чият. Тек Аарон да тудын деч варасе тукымжо курым-курымеш тыге ыштен шогат.
*а 28:4 Кидар – Кугу иерейын тюрбанла койшо вуйчиемже.
*б 28:7 Вачӱмбал ластык – наплечник.
*в 28:20 Оҥсакышысе нине латкок кӱн чынжымак могай кӱ лиймыштым каласаш неле.
*г 28:30 «Урим ден туммим» – чынже дене тиде мо лийын, каласаш йӧсӧ. Очыни, нунын полшымо дене иерей тӱрлӧ йодышлан Юмо деч вашмутым налын.
Глава 28