Библия
Выбрать язык
Книги Ветхого Завета
Книги Нового Завета
с русским текстом
МОИСЕЙЫН КОКЫМШО КНИГАЖЕ
ЛЕКМАШ
15 Глава
1 Моисей ден Израиль калыкын чапмурышт. Мариамын мурыжо. 22 Моисей Мерра вӱдым йӱаш йӧрышым ышта.1 «Господьлан мурем, вет Тудо пеш чот чапланен,
имне ден имнешке-влакым теҥызыш сӱмыралын.
2 Господь – мыйын пеҥгыдылыкем да куатем,
мыйын утарымашем.
Тудо – мыйын Юмем, Тудым мый чапландарем,
ачамын Юмыжым кӱш нӧлтен мурем.
3 Господь – сарын талешкыже,
Тудын лӱмжӧ – Господь.
4 Фараонын орва ден сарзыже-влакым
2 Тудо теҥызыш сӱмыралын,
орвам виктарыше эн сай сарзе-влак
2 Йошкар теҥызыш пуреҥгаеныт.
5 Теҥыз келгыт нуным леведын,
кӱ семын нуно вӱд пундашыш каеныт.
6 Пурла кидет, Господь, куатше дене чаплана;
Тыйын пурла кидет, Господь, тушманым пытара.
7 Кугу чапет дене Тый
ваштарешет шогалше-влакым сӱмырал шуэнат.
Тый эрыкым шыдетлан пуэнат,
да олым семын нуным тудо йӱлалтен.
8 Тыйын пуалмет дене вӱд нӧлталалтын,
толкын-влак пырдыж семын шогалыныт,
теҥыз келгытысе вӱд пеҥгыдемын.
9 Тушман каласен:
”Почешышт мый каем, поктен шуам
да поген налме поянлыкым пайлем.
Тудын дене шерем темеш,
кердем луктам чарашке, кидем нуным пытара”.
10 Тый шке шӱлышет дене пуалынат,
да нуным теҥыз леведын;
шемвулно семын нуно кугу вӱд пундашке каеныт.
11 Юмо-влак коклаште, Господь, кӧ уло Тый гает?
Кӧ уло Тый гает святой улмыж дене кӱдыратле,
лӱдмаш ден пагалымашым сулышо,
1 ӧрыктарыше пашам ыштыше?
12 Пурла кидетым Тый шуялтенат,
да тушманым мланде нелын.
13 Шке порылыкет дене вӱден наҥгаенат Тый утарыме калыкетым,
куатет дене наҥгаенат шке святой илыме верышкет.
14 Тидым колын, калык-влак чытыреныт,
Филистимыште илыше-влакым шучкылык авалтен.
15 Тунам Едомын онжо-влак лӱдыныт,
Моав он-влакым чытырымаш авалтен,
Ханааныште илыше-влак чыланат вуйыштым сакеныт.
16 Тыйын калыкетын эртен кайымешкыже, Господь,
лӱдмаш ден шучкылык нуным авалтеныт,
Шкаланет налме калыкетын эртен кайымешкыже,
нине калык кидетын вий-куатше деч кӱ семын тӱҥгылгеныт.
17 Наҥгае илаш тудым шке курыкышкет,
тудо верыш, кудым Тый, Господь, Шкаланет илаш ойыренат,
шке кидет дене ыштыме святой верышкет, Господь, наҥгае.
18 Курым-курымеш Господь кугыжаланаш тӱҥалеш».
19 Кунам фараонын имньыже-влак орва да имнешкыже-влак дене пырля теҥыз покшеке пуреныт, Господь нунын ӱмбак вӱдым мӧҥгеш лупшалын, а Израиль эрге-влак теҥыз покшеч кукшо мланде дене эртеныт.
20 Мариам пророк, Ааронын акаже, кидышкыже тимпаным налын лектын, тудын почеш чыла ӱдырамаш тимпан дене куанен куштен лектыныт.21 Нунын ончылно Мариам муралтен:
«Господьлан мурыза, вет Тудо пеш чот кӱдыратле,
имне ден имнешке-влакым теҥызыш сӱмыралын!»
22 Моисей израиль еҥ-влакым Йошкар теҥыз деч умбакыла наҥгаен. Нуно Сур лӱман ир мландыш миен шуыныт. Ир мланде дене кум кече каеныт, нигуштат вӱдым муын огытыл.23 Нуно Меррашке толын шуыныт, но тыштат вӱдым йӱын кертын огытыл – тудыжо кочо лийын, сандене тиде верын лӱмжат тыгай – Мерра.*а24 Калык Моисейлан ӧпкелен ойлен: «Мом мыланна йӱаш?»25 Моисей Господь деч полышым йодын кумалын, да Господь тудлан кийыше пушеҥге укшым ончыктен. Моисей тудым вӱдышкӧ кудалтен, да вӱд йӱаш йӧрышӧ лийын.
Тыште Юмо калыклан закон ден кӱштымаш-влакым пуэн да тыштак тудым терген.26 Господь каласен: «Тый Господь Юметын йӱкшым колышташ да Тудлан келшыше пашам ышташ, Тудын кӱштымыжым колышташ да чыла законжым шукташ тӱҥалат гын, Мый тыйым Египетыште лийше ик орлык денат ом орландаре. Мый вет Господь [Юмет], тыйын Паремдышет улам».
27 Израиль эрге-влак Елимыш толын шуыныт. Тыште латкок памаш да шымле финик пушеҥге лийын. Тыште, вӱд воктене, нуно стан дене шогалыныт.
*а 15:23 «Мерра» лӱм ’кочо’ манмым ончыкта.
Глава 15
