Выбрать язык
Книги Ветхого Завета
Книги Нового Завета
с русским текстом1 Тиддеч вара Моисей ден Аарон фараон деке миеныт да каласеныт: «Господь, Израильын Юмыжо, тыге ойла: ”Мыйын лӱмеш ир мландыште пайремым ышташлан Мыйын калыкем колто”».2 Но фараон вашештен: «Кӧ тугай Господь? Молан мый Тудым колыштшаш да Израиль [эрге-влакым] колтышаш улам? Господьым мый ом пале да Израильым ом колто».3 Нуно каласеныт: «Еврей-влакын Юмышт мемнам ӱжын. Тый мемнам ир мландышке кум кечаш корныш колто. Мемнам шучко чер але керде дене ынже пытаре манын, ме Господьлан, мемнан Юмыланна, надырым кондена».
4 Нунылан Египетын кугыжаже каласен: «Моисей ден Аарон, молан те калыкым паша деч кораҥдынеда? Шке пашадам ышташ кайыза!»5 Фараон эше ешарен: «Калыкда тендан пеш шуко, а те нунылан пашам кодаш темледа!»
6 Тудо кечынак фараон пашам вуйлатыше ден эскерыше-влаклан тыге кӱштен каласен:7 «Кермычым ышташ калыклан олымым тетла ида пу. Олымым нуно тек шке кычалын погат.8 А кермычым ондакысе нарак ыштыктыза, ыштышаш чотым ида иземде. Нуно йолагайыш каеныт, сандене ”каена, шкенан Юмыланна надырым кондена” манын кычкырат.9 Нунылан эшеат неле пашам пуаш кӱлеш – тек пашам ыштат, а кӱлеш-оккӱлым огыт колышт».
10 Пашам вуйлатыше ден эскерыше-влак калык ончыко лектыныт да каласеныт: «Фараон тыге ойла: олымым тетла ом пу.11 Шке кайыза да кычалза – кушто олымым муыда, туштак налза. А кермычым ыштыме чот тунарак кодеш».12 Олым олмеш отылым погаш калык пӱтынь Египет мучко шаланен.13 Паша эскерыше-влак [нуным] чыштыреныт: «Кызытат кажне кечын ыштышаш кермычдам олым лийме годсо нарак ыштыза».14 Фараонын эскерышыже-влак Израиль эрге кокла гыч вуйлатышылан шогалтыме еҥ-влакым кыреныт, «молан теҥгече да таче кӱлеш чот кермычым ончычсо семын ыштен огыдал?» маныныт.
15 Тунам израиль эрге-влакын вуйлатышышт фараон деке толыныт да тудлан вуйым шийыныт: «Молан тый тарзет-влак дене тыге ыштет?16 Олымым мыланна огыт пу, а кермычым ыштыза манын ойлат. Да эше мемнам кырат, тыйын калыкетлан тидыже сулык».17 Но фараон [нунылан] каласен: «Те йолагай, кугу йолагай лийында! Сандене ”ме каена да Господьлан надырым кондена” манын ойледа.18 Кайыза да пашам ыштыза. Олымым тыланда огыт пу, а кермычым каласыме нарак ыштыза».19 «Кермыч ыштыме ик кечаш чотым ида иземде» манын каласымым колмеке, израиль эрге-влакын вуйлатышышт ойгыш логалмыштым умыленыт.
20 Фараон деч лекмеке, вуйлатыше-влак нуным вучен шогышо Моисей ден Аарон деке миеныт21 да каласеныт: «Мом ыштымыдам тек Господь ужеш да тидлан мутым кучыкта: те фараон ден тудын тарзыже-влаклан мемнам ужмышудымым ыштенда, нунылан мемнам пушташ амалым пуэнда».
22 Тунам Моисей Господьлан каласен: «Господь! Молан Тый тиде калыкым тыгай азапыш пуртенат, молан мыйым колтенат?23 Вет кунам мый фараон деке толынам да Тыйын лӱмет дене ойлаш тӱҥалынам, калык дене тудо шкенжым утларак удан веле кучаш тӱҥалын. А Тый шке калыкетым утарен отыл».
Глава 5