Выбрать язык
Книги Ветхого Завета
Книги Нового Завета
с русским текстом1 Иосиф ачаж деке кумык лийын да шортын, тудын чурийжым шупшалын.2 Иосиф эмлызе тарзыж-влаклан ачажын капшым бальзамироватлаш кӱштен. Нуно Израильын капшым бальзамироватленыт.3 Тидлан нылле кече кӱлын, вет бальзамироватлаш тынар кече кая. Иаков шотышто египтян-влакын шортмо йӱлашт шымле кече шуйнен.
4 Нине шортмо кече-влак эртымеке, Иосиф фараонын моло тӧраже-влаклан каласен: «Мый тендан ончылно поро кумылым сулен налынам гын, фараонлан тыге каласыза:5 ”Ачам мый дечем товатмутым налын, тыге каласен коден: ’Мый ынде колем, мыйым шке шӱгарешем тойо, тудым мый Ханаан мландыште ямдыленам’. Сандене мый кызыт ачамым тояш кайынем. Тойымеке, мӧҥгеш пӧртылам”». [Иосифын мутшым фараонлан каласеныт.]
6 Фараон каласен: «Кай, ачатлан товатлымет семынак, тудым тойо».7 Иосиф ачажым тояш каен. Тудын дене пырля фараонын чыла тарзыже, тудын полатысе вуйлатыше-влак да Египет элын чыла кугурак еҥышт,8 тыгак Иосифын уло ешыже, иза-шольыжо-влак да ачажын суртыштыжо илыше-влак каеныт. Икшывыштым, тыгыде да шолдыра вольыкыштым гына Гесем мландеш коденыт.9 Тидын деч посна эше сарлык орва дене да имньым кушкыжын каеныт, сандене кайыше еҥ-влак пеш шукын лийыныт.
10 Нуно Иордан вес велысе Горен-гаатад деке миен шуыныт да тушто мӱгырен шортыныт. Иосиф ачажын колымыжлан шортмашым шым кече ыштен.11 Тудо мландыште илыше хананей-влак Горен-гаатадыште нунын шортмыштым ужыныт да каласеныт: «Египтян-влакын тиде пеш кугу шортмашышт!» Садлан тиде верым «Египтян-влакын шортмашышт» манын лӱмденыт. Тудыжо Иордан вес велне верланен.
12 Иаковын эргыже-влак ачаштын каласымыж семынак ыштеныт.13 Нуно тудым Ханаан мландышке конденыт да Махпела нурышто улшо курыкпомышеш тоеныт – тудыжым Авраам Мамре воктене улшо нур дене пырля шке тукымжылан тойымо верым ышташлан хеттей Ефрон деч оксала налын.14 Иаковым тойымеке, Иосиф шкеже, тудын иза-шольыж-влак да Иосиф дене пырля тудын ачажым тояш мийыше-влак чылан Египетыш пӧртылыныт.
15 Иосифын изаж-влак ачаштын колымыжо деч вара каласеныт: «Ала Иосиф мыланна кызытат сырен коштеш да тудлан чыла осалым ыштымыланна ӱчым шукташ тӱҥалеш?»16 Нуно Иосифлан тыге каласаш колтеныт: «Ачат колымыж деч ончыч тыге шӱден коден:17 ”Иосифлан каласыза: изат-влакын титак ден сулыкыштым кудалте – кеч нуно тыланет осалым ыштеныт”. Ачатын Юмыжын тарзыж-влакын титакыштым ынде кудалте». Тидым каласыме годым Иосиф шортын.
18 Изаж-влак вара шкештат Иосиф деке толыныт, тудын ончыкшо кумык возыныт да каласеныт: «Теве ме – тыйын кулет-влак».19 Иосиф каласен: «Ида лӱд. Вет мый шкежат Юмын йымалне коштам.20 Те мыланем осалым шоненда ыле, но Юмо тудым порышко савырен. Шуко еҥын илышыжым арален кодаш манын, чыла тидым Юмо ыштен.21 Тыгеже, ида лӱд. Мый тендамат, икшывыдамат пукшаш тӱҥалам». Тыге нуным лыпландарен да чоныштлан келшышын ойлен.
22 Иосиф шкежат да ачажын ешыжат Египетыште иленыт. Иосиф чылаже шӱдӧ лу ийым илен.23 Иосиф Ефремын йочаж-влакым кум тукым марте ужын. Манассийын Махир лӱман икшывыжын эргыж-влакат Иосифын пулвуйыштыжо шинченыт.
24 Иосиф иза-шольыж-влаклан каласен: «Мый ынде колем, но Юмо тыланда полша да тендам тиде мланде гыч Авраамлан, Исааклан да Иаковлан товатлен сӧрымӧ мландышкыже наҥгая».25 Иосиф Израильын эргыж-влак деч товатмутым налын, каласен коден: «Кунам Юмо тендан деке толеш, мыйын лулегем тышеч наҥгайыза».
26 Иосиф шӱдӧ лу ияш колен. Тудым бальзамироватленыт да Египетыште колоткаш пыштеныт.
Глава 50