Выбрать язык
Книги Ветхого Завета
Книги Нового Завета
с русским текстом1 Тувыл ань Ӣсус ханисьтан хумиянэ̄н тāн акваг пойиксянэныл ос ё̄раныл ат тыпылтан ōвылтыт ханисьтап потыртас.2 Тав лāвыс: ”Акв ӯсыт мир сутытан хōтпа ōлыс: тав Тōрумныл ат пилыс, мāхум ат э̄руптāлыглас.3 Ань та ӯсыт хумтāл э̄ква ōлыс. Тав сав сё̄с ты хум палт ёхталāлыс ос лāвыглас: ‘Āнум каснэ юртумныл воянтэ̄лын!’4 Тав э̄ква воянтаӈкве хоса ат войхатас. Топ юи-ōвылт таквинāтэ̄н лāвыс: ‘Ам Тōрумныл ат тēпыл пилэ̄гум, мāхум ат э̄руптыянум,5 топ ань ты э̄ква āнум торас вāри. Таве ам нё̄тылум воянтаӈкве, воссыг ул вос юв ос торас ул вос вāри’”.
6 Тōнт Кӯсяй лāвыс: ”Хӯлылын-а, ты веськаты̄г ōлтāл сутытан хōтпа мāныр лāвыс!7 Тōрум Такви пēриям ӯтанэ ман ат воянтыя̄нэ. Тāн э̄тэ-хōтал Тав нупылэ пōйиксēгыт. Нё̄тмиле ман хоса ля̄сямтытэ?8 Ам нāнан лāвēгум: Тав Такви пēриям утанэ мосерты̄н нётыянэ тах. Топ ань Э̄лумхōлас Пы̄г ёхтынэ̄тэ порат мā тармыл агтыл хōнтытэ ман āти?”
9 Тāнтинаныл вēськатыг ōсьнэ утытн ос хōтпат лавыл нэ̄гылттан утытн Ӣсус ōс акв ханисьтап потыртас:
10 ”Кит хōтпа ялпыӈ колн пōйиксяӈкве минасы̄г. Акватэ фарисēйӣг ōлыс, мōтанэ пōт атнэ хумыг ōлыс.11 Ань фарисей лю̄лис ос тох ты пойиксяс: ‘Тōрум, наӈын пӯмасипа лāвēгум ам мōт утыт хурипāг ат ōлнэм мāгыс: тӯлмахыт, кант вāрнэ утыт, нэ̄гы̄г-хумы̄г халн сялтнэ утыт ман ос пōт атнэ ты хум хурипаг ам ат ōлыкем.12 Ам акв сāтыт кит сёс поститахтэ̄гум ос сэ̄лум олнанумныл ловит охсатэ Тōрумн мы̄глум’.13 Пōт атнэ хум э̄лнув лю̄лис, таквинāтэ карекыӈы̄г ōсьнэ̄тэ мāгыс. Самагēт нōӈхаль ат āӈкватāлым, сымыӈпōрхе рāтым Тōрум нупыл пōйиксяс: ‘Тōрум, āнум, карекыӈ ут, сāлитэ̄лын!’
14 Ам нāнан лāвēгум: ты хōтпа Тōрум э̄лы-пāлыт вēськаты̄г ōлым юв-ёхтыс, фарисей вēськаты̄г ат ёхтыс. Ань таквинāтэ янытлан кāсыӈ хōтпа ёлымтаве тах, таквинāтэ ёлымтан хōтпа янытлаве тах”.
15 Хōтпат Ӣсус палт ня̄враманыл тотыглāлсаныл, Тав ань тāн палттыланыл мось вос хōйсāлы. Ханисьтахтын хумиянэ тыи кāсаламанылт мāхум нупыл лю̄камтасыт.16 Топ ань Ӣсус ня̄врамыт ляпан вōвсанэ, ос ханисьтахтын хумиянэ̄н лāвыс: ”Мāнь ня̄врамаквет Ам палттылум тāртэ̄н, ул торастэ̄н, Тōрум йильпи нот тамлэ ня̄врамыт мāгыс ōлы.17 Сōль лāвēгум: мāнь ня̄врам хольт Тōрум йильпи нот хотъют ляпан ат вы̄гтэ, тав тув ат сялты”.
18 Акв пуӈкхум Ӣсус китыгластэ: ”Ёмас ханисьтан хум, āнумн мāныр э̄ри варуӈкве, акваг э̄лаль ōлнэм мāгыс?”19 Ӣсус тавēн лāвыс: ”Наӈ Āнум манрыг ёмасыг лāвӣлын? Тōрум коны-пāл ёмас ут воссыг āтим.20 Тōрум сāккон вāглын: ‘нэ̄гы̄г-хумы̄г халн ул сялтэн, ул алэн, ул тӯлмантэн, ул урккен, сяня̄гын-āся̄гын янытлэ̄гын’”.21 Ань пуӈкхотнэ хум лāвыс: ”Ам мāнь тāгыл тох ōлсум”.22 Ӣсус тыи хунтамламēт лāвыс: ”Акв утн наӈ ань ат тōвлавен: маныр ōньсēгын, пуссын тыналэ̄н ос нуса хотпатн уртэ̄н, тōнт тах тōрумт наӈын сёл ēмты. Тувыл ёхтэн ос Ам юи-пāлумт мӣнэн”.23 Та хōтпа тыи хулыматэ порат номтэ хот-сакыс, тав ань сака сёлыӈ ōлыс.
24 Номтэ хот-сакум кāсаламēт Ӣсус тавēн лāвыс: ”Сёлыӈ утытн такем та тāрвит Тōрум йильпи нотн сялтуӈкве.25 Топ ань верблюдн ю̄нтуп асн сялтуӈкве кӯпнитнуве, сёлыӈ хумн Тōрум йильпи нотн сялтнэтэ̄ныл”.
26 Тыи хӯлум мāхум китыглахтысыт: ”Хōӈха вēрми вēстхатуӈкве?”27 Ӣсус ювле-лāвыс: ”Э̄лумхōласн мāныр ат вēрмаве, Тōрумн вēрмаве”.
28 Тōнт Пēтр лāвыс: ”Сунсэн, мāн, мāныр ōсьсӯв, пуссын хӯльсанӯв ос Наӈ юи-палынт мынмыгтасӯв”.29 Тōнт Ӣсус тāнанылн лāвыс: ”Сōль лāвēгум: Тōрум йильпи нот мāгыс тамле хōтпа āтим, хōӈха такви колэ, нэ̄тэ, ягпыге, ся̄няге-āсяге, манос ня̄враманэ хультуптас ос, хōӈха ань ты ōлнэ йисыт сака сāвнув ат вы̄г,30 ос э̄лаль ōлнэ нотт акваг э̄лаль ат ōлы”.
31 Китхуйплов ханисьтахтын хумиянэ пōхан вōвим, Ӣсус тāнанылн лāвыс: ”Хӯнтлэ̄н! Мāн Иерусалимн минэ̄в ос Тōрум лāтыӈ тотнэ хумитн Э̄лумхōлас Пы̄г урыл мāныр хансым ōлы пуссын ēмты тах.32 Тав Тōрум ат вāнэ мāхум кāтын миве тах. Тавēтыл мувиньтаӈкве патэ̄гыт, ля̄выльтаве ос полхыл сальгаве.33 Хомсял ратуӈкве патаве ос алаве тах. Ос хӯрмит хōталыт Тав нōх-ялты”.34 Ханисьтахтын хумиянэ нэ̄матыр ат торгамтасыт, Ӣсус лāвум лāтӈыт номтаныл тāнанылныл тӯйтым ōлсыт.
35 Ӣсус Иерихонн ляпаманылт, лё̄х вāтат сампыльтāл хōтпа кāтэ тактым кāсаластэ.36 Тав тāратэ мāхум ё̄мнэ̄ныл хӯлмēт, тав китыглахтас – мāныр тыт вāрыглаве.37 Тāн лāвсыт, Назаретныл ōлнэ Ӣсус ты тāра мины.38 Ань тав рōӈхувлас: ”Ӣсус, Давид Пы̄ге, āнум сāлитэ̄лын!”39 Сампыльтāл хōтпа э̄лы-пāлт миннэ мāхумн астāл ōлуӈкве лаввес кос, тав тай усьпылнэ̄г тāкысь рōӈхыс: ”Давид Пы̄ге, āнум сāлитэ̄лын!”40 Ӣсус ёл-лю̄лис ос сампыльтāл хōтпа Тав ляпатэ̄н вāнттуӈкве лāвыс. Тав ляпан ёхтумēт, Ӣсусн китыглавес:41 ”Наӈын мāныр э̄ри, мāныр наӈ таӈхēгын?” Ань тав ля̄галас: ”Кӯсяй! Самагум ōс вос кāсаланувы̄г!”42 Ань Ӣсус тавēн лāвыс: ”Кāсалэн! Агтылын наӈын та вēстыстэ!”43 Аквтысёс ты хōтпа самаге кāсалаӈкве патсы̄г. Ань тав Ӣсус юи-пāлт та минмыгтас, Тōрум э̄сгим. Ос ань ты нак вāсиньтам хōтпат Тōрум э̄сгысаныл.
Глава 18