Выбрать язык
Книги Ветхого Завета
Книги Нового Завета
с русским текстом1 Аквматнакыт сабат-хōталыт пуӈкхумыг ōлнэ фарисей колэн Ӣсус тэпъялаӈкве ёхтумēт тот ōлнэ утыт пуссын Тав нупылэ суссыт.2 Вит āгмыл ōлнэ хōтпа Тав э̄лы-пāлэ̄т сяр тыт ōлыс.3 Ӣсус Сāккон ханисьтан хумит ос фарисейт китыгласанэ: ”Сабат-хōталыт рōви ман āти āгмыӈ хōтпат пӯсмалтаӈкве?”4 Тāн нэ̄матыр ат лāвсыт. Тōнт Ӣсус ты хōтпа карссатаптастэ ос пусмалтастэ, тувыл юв кēтыстэ.5 Тувыл ос тāнанылн лāвыс: ”Нāн халынт хотъютн пы̄ге вит амартан вōӈхан ке рагаты, манос хармисын тув рагаты ке, аквторыг нōх ман ат хартыягын-а? Вос тēпыл сабат-хōтал ōлнув”.6 Тāн ювле нэ̄матыр лāвуӈкве ат вēрмысыт.
7 Ӣсус самылттастэ, тōва мӯйхōтпат пасан вāтат сяр ёмас мāт периēгыт. Ӣсус ань тамле ханисьтап потыртас:8 ”Пӯрин ке вōвавен, пасан вāтат сяр ёмас мā ул пēриен. Вōвим хōтпат халыт э̄рыӈ наӈынныл намыӈнув хōтпа тах ёхты.9 Тōнт наӈын ос таве вовум хōтпа ляпан тах юв ос лāви: ‘Ты хōтпан тав тыг вос ӯнты’. Наӈын э̄сырмаг тах ēмты ос пасан юи-ōвылн та ӯнттавен.10 Пӯрин ке вōвавен тув ёхтынэ̄нт пасан юи-ōвылн ке ӯнтэгын, тōнт тах наӈын вōвум хōтпа ляпан юв ос наӈын лāви: ‘Юрткве, наӈ ляпаннув ӯнтэн’. Тōнт тах пасан вāтат ӯнлын мāхум э̄лы-пāлыт наӈ янгыг ōлэ̄гын.11 Кāсыӈ янытлахтын ут ёлымтаве. Таквинāтэ ёлымтан ут ос янытлаве”.
12 Ӣсус таве вōвум фарисей ля̄льт ōс лāвыс: ”Хунь хōтал тэ̄нэ ман ос э̄типалаг муйлын пасан варуӈкве сёпитахтэ̄гын, тӯп юртанын, ягпыганын, рӯтанын ман ос колпōх сёлыӈ хōтпанын ул вōвēн. Наӈ номсэ̄гын тāн тах наӈын вōвияныл ос наӈ хольтын мӯйлын пасан вāрēгыт.13 Мӯйлын пасан вāрмы̄глалы̄нт нуса, сакватахтум, нохасан ос сампыльтāл хōтпат вōвēн.14 Ос тах наӈ сōтыӈыг ōлуӈкве патэ̄гын, тāн наӈын ойтхатуӈкве ат вēрмынэ̄ныл мāгыс. Наӈ тах Тōрумн ойтавен та сё̄ст, хунь вēськат хōтпат нōх-ялтэ̄гыт”.
15 Ӣсус ёт пасан вāтат ӯнлум акв хōтпа тыи хулмēт Тавēн лāвыс: ”Тōрум йильпи нотт тэ̄нэ хōтпа сōтыӈы̄г ōлы”.
16 Топ ань Ӣсус ювле-лāвыс: ”Аквмат хōтпа яныг мӯйлын пасан вāрыс ос сав мāхум вōвсанэ.17 Мӯйлын пора ёхтумēт тав мēтхумитэ мӯйлын мāхум вōвуӈкве кēтыстэ: ‘Йиēн, пасанув тāсыг ōлы’.18 Топ ань тāн пуссын ат кāсасясыт тув минуӈкве, кāсыӈ хōтпа такви хулиглам вāрмале урыл лāвыглас. Акваныл лāвыс: ‘Ам мā ломт ёвтсум, ялэ̄гум, уральтылум, ул кантлэн ат йинэм мāгыс’.19 Мōтананыл лāвыс: ‘Ам ат пāра хāрмис ёвтсум, āнумн э̄ри āӈкватāлуӈкве, тāн хумус рӯпитэ̄гыт. Та яныт ёмас вāрен, ул кантлэн’.20 Хӯрмитаныл ōс лāвыс: ‘Ам усьты нэ̄ тотсум, таимāгыс йиӈкве ат вēрмēгум’.
21 Мēтхум хōтпа юв-ёхтыс ос кӯсяēн пуссын ты накыт лāвсанэ. Ань тувыл кӯсяй хумитэ кантмаявес ос мēтхумитэ̄н лāвыс: ‘Ӯсхулыт пуссын молях мӯвылтэ̄н, ос нуса, сакватахтум, сампыльтāл, лāгылтāл-каттāл хōтпат – пуссын тыг-вāнттэ̄н’.22 Ювле-ёхтумēт мēтхумитэ лāвыс: ‘Кӯсяюм, наӈ лāвмын сирыл пуссын вāрыслум, топ ань пасан ватат иӈ ӯнтнэ мā ōлы’.23 Тōнт ань кӯсяй лāвыс: ‘Лё̄ӈхыт ос лё̄хъясыт хосыт минэн, хōӈхат кāсалэ̄гын, лāвēн – пуссын тыг вос ювыт, ам колум мирыл вос тāгиньты.24 Нāнан лāвēгум: сāртын вōвыглам утытныл воссыг нэ̄мхотъютаныл ам пӯримт ат тэ̄синты тах. Вōвим ут сāв, пēриим хōтпа мосься’”.
25 Ӣсус ёт сāв мир йисыт. Ювле ё̄ӈхим Тав тāнанылн лāвыс:
26 ”Ам палттылум ёхтын хōтпа āсе, ся̄нэ, нэ̄тэ, ня̄враманэ, ягпыганэ, ягāгиянэ ос тāкви лылытэ Āнумныл янгысьнув ке э̄руптыянэ, тав ам ханисьтахтын хумы̄г ат вēрми ōлуӈкве.27 Такви пēрнатэ тоттāл Ам юи-пāлумт йинэ ут Āнумныл ханисьтахтын хумы̄г ат вēрми ōлуӈкве.28 Нāн халынт хотъютн карыс кол ӯнттуӈкве ке тахмаи, тав ōвлэ̄т улпыл номсы тах ос карыс колэ тын атхунь ат āрталытэ? Колэ ӯнттын мāгыс тав олнанэ товылхатэ̄гыт ман āти?29 Ань карыс кол тытэ ӯнттын юи-пāлт колэ ат ке ӯнттытэ, тыи вāсинтам пуссын мāхум тах тавēтыл мувиньтаӈкве патэ̄гыт.30 Тāн тах лавēгыт: ‘Ты хōтпа карыс кол ӯнттуӈкве ōвылтахтас, топ ань āстлаӈкве ат та вēрмыстэ’.
31 Хоты хōн мōт хōн нупыл хōнтлуӈкве тахмаи, сартын тав ёл ӯнты ос такви мāхманэ ёт ё̄ре āрталан урыл потрами. Лов сōтыра хōнтхум ёт хус сōтыра хōнтхум ёлымтахтэ̄гыт?32 Ё̄ре ке ат товылхаты, тав мōт хōн иӈ э̄лн ōлмēт потыртахтын хōтпа ёмасмахтын вāрмаль мāгыс кēтытэ.
33 Нāн ōс мāныр оньсēгын, пуссын оссувлэ̄н. Тох ат ке вāрēгын, Āнумныл ханисьтахтын хумиӣг ōлуӈкве ат вēрмегы̄н!
34 Солвал тав ёмас ут. Ос солвал ат ат ке ōньси, таве аквта хольт солвалыӈыг варуӈкве ат вēрмаве.35 Тав мāн ос сё̄рн пинуӈкве ат хōйхаты. Мāхум солвал э̄л-вуськасыяныл. Палиӈ хōтпа вōс тах тыи хӯлытэ!”
Глава 14