1 Kačo, Ižändy tyhjendäy da luadiu muan uudizettomakse, muuttau sen nävyn da levittäy sen piäl eläjii. 2 I midä rodieu rahvahale, sidä i papile, midä käskyläzele, sidä i ižändäle, midä käskyläisnaizele, sidä i emändäle, midä ostajale, sidä i myöjäle, midä velgah ottajale, sidä i andajale, midä barišan andajale, sidä i ottajale. 3 Mua on tyhjendetty loppussah, kiškottu loppussah, sikse gu Ižändy sanoi oman sanan. 4 Mua itköy, mua kuivau, painuu, kuivau kai muailmu, painutah muailman rahvahien piäl olijat. 5 Mua on paganoidunuh sen eläjien al, sikse gu hyö polgiettih zakonat, muutettih käskyt, rikottih igäine sobu. 6 Sikse kiruondu syöy muadu, sen pahuzis maksetah net, ket sen piäl eletäh. Sikse on poltettu muan eläjät, i rahvastu jäi vähä.
7 Itköy viinumuarjuskänčy, kibei on oksile, hengähtellähes kaikin, kel oli ilo sydämes. 8 Loppih timpanoin vessel soitto, ei kuulu ilonpidäjien iänii, hillettih soittoloin iänet. 9 Jo ei juvva viinua, eigo pajateta, kargei on sikera juojale. 10 Ruušittu on tyhjennyh linnu, kai koit on salvattu, mennä ei sua. 11 Pihoil itkietäh viinas, hävii ilo, iäre ajettu on hyvä mieli. 12 Linnas on tyhjys, vorotat on murtu. 13 Nenga rodieu muailman rahvahienke: heidy jiäy vai senverdu, mi jiäy voipuuh, konzu sidä säräitetäh, senverdu, mi voibi löydiä oksas, konzu viinumuarjat on kerätty.
14 Eloh jiännyöt iäneh ruvetah ylendämäh Ižändiä, Hänen suuruttu da kunnivuo, annetah iänen merelpäi. 15 Muga iäneh kunnivoittakkua Ižändiä päivännouzus, meren suaril – Ižändän, Izrail՚an Jumalan nimie. 16 Muan agjaspäi myö kuulemmo pajon: «Kunnivo Oigiele!»
Minä sanoin: En voi, en voi! Oh minuu vaivastu! Pahanluadijat luajitah pahua, pahua luajitah pahat pahah luaduh! 17 Sruasti da haudu da petlu, loppu sinule, muan eläi. 18 Ken pagieu sruastin iänes, se pakkuu haudah, a ken piäzöy havvas, se puuttuu petlah, sikse gu ikkunat taivahas avavutah, i muan alustu särähtäh. 19 Mua tärizöy, mua särizöy, mua leviey, mua on äijäl liikutettu, 20 häilyy mua gu humalniekku, heiluu gu vardoičendulava, pahat ruavot painetah sidä, se pakkuu, i enäm ei nouze.
21 Sinä päivänny Ižändy nakažiu korgevuon joukkoloi korgevuksis dai muan tsuariloi muan piäl. 22 Heidy kerätäh yhteh kui kiiniotettuloi haudah, salvatah tyrmäh, i päivien mendyy heidy suuditah. 23 Kuu ruskonou, päivy huijustah, konzu Vägilöin Ižändy pidäy valdua Sionan mäil da Jerusalimas, i hänen rahvahan vahnimien ies läpettäy kunnivo.
с русским текстом