Библия
Выбрать язык
Книги Ветхого Завета
Книги Нового Завета
с русским текстом
PSALTIRI
43 Psalmu
1 Pajojoukon ohjuajale. Korahilazien opastus.2 Jumalazeni, myö omil korvil kuulimmo,
meijän tuatat saneltih meile,
mittuman ruavon Sinä ruavoit heijän päivil,
ammuzil aijoil.
3 Omal käil Sinä hävitit vierahat rahvahat
da istutit meijän tuatat täh muah.
Sinä ajoit iäres toisvierozet,
annoit muan meijän tuattoloile.
4 Ei hyö miekan vuoh suadu tädä muadu,
ei heijän vägi piästänyh heidy,
a piästi Sinun oigei käzi,
Sinun vägi da Sinun silmien valgei,
gu Sinä suvaičit heidy.
5 Jumal, minun Suari!
Anna piäzendy Juakoile!
6 Sinun avul myö puskemmo meijän vihaniekkoi,
Sinun nimen väil pollettelemmo muah meijän vastustajii.
7 En luota omah jouheh,
ei miekku rodei minun piästäjänny,
8 a Sinä piästät meidy vihaniekois
i huiguat meijän vihuajii.
9 Jumalal myö löyhkämmö joga päiviä,
kiitämmö Sinun nimie ijän.
10 No yksikai Sinä hylgäit meidy,
Sinä huigait meidy,
et lähtenyh meijän torajoukkoloinke.
11 Sinä panit meidy pagiemah vihaniekois,
meijän vihuajat nygöi kiškotah meidy.
12 Sinä annoit meidy kui lambahii syödäväkse,
Sinä levitit meidy muailman rahvahien keskeh.
13 Sinä möit oman rahvahan grivan hinnas,
et hyödynyh kaupas.
14 Sinä annoit meidy rinnalolijoin rahvahien kirottavakse,
ymbärieläjien nagrettavakse da niäriteltäväkse.
15 Sinä luajiit meidy muailman rahvahien zuakkunakse,
kaikin lekutetah piädy meih kaččojes.
16 Minuu huijatah joga päiviä,
minun roža rebiey huigiedu,
17 gu kuulen, kui vihaniekat da tyhjänpagizijat
tazuandanhimos kirotah da niäritetäh meidy.
18 Kai tämä tuli meijän piäle,
ga myö emmo unohtannuh Sinuu
emmogo mennyh Sinun sobuu vastah.
19 Meijän syväin ei kiändynyh iäre Sinus,
i jallat ei hairottu Sinun matkas,
20 no Sinä yksikai hävitit meidy
kui syvyön merimavon,
Sinä katoit meidy kalman pimiel.
21 Gu unohtannuzimmo Sinun nimen, meijän Jumal,
da oijendannuzimmo käit vierahale jumalale,
22 Sinä, Jumal, tiijustannuzit sen,
gu Sinä tunnet syväimien peittomielet.
23 Ga Sinun täh meidy tapetah ainos,
meidy pietäh kui iškiettäväkse varustettuloi lambahii.
24 Havaču, Ižändy! Mikse maguat?
Nouze, älä hylgiä meidy ijäkse!
25 Mikse peität meis silmii,
unohtat meijän tuskan da hiän?
26 Meijän hengi on polgiettu,
olemmo očilleh muas.
27 Nouze avvuttamah meidy,
lunnasta meidy Sinun armon täh!
Глава 43
