1Pajojoukon ohjuajale. Davidan psalmu. 2 Ozakas on se, ken pidäy huoldu köyhis da kurjis.
Hädäpäivänny Ižändy tulou hänele abuh.
3 Ižändy vardoiččou händy, ei anna kuolta.
Ozakas roihes häi mual.
Ižändy ei anna händy vihaniekkoin valdah.
4 Ižändy avvuttau händy voimattomannu olles,
nostau virundusijas.
5 Minä sanoin: «Ižändy, armahta minuu,
paranda minun hengi!
Riähkävynnyh olen Sinun ies».
6 Minun vihaniekat paistah minus pahua:
«Konzu häi kuolou, hänen nimigi häviey».
7 A gu ken tullou minuu tiijustamah,
se pagizou tyhjiä.
Syväimeh häi suittau kielastustu,
pihal lähtehyy rubieu kerras jasattamah sidä.
8 Kai minun vihuajat tahtotah minule pahua,
čuhkuzil paistah minus:
9 «Surman kobru iški häneh,
häi jo ei nouze sit virundusijaspäi».
10 Se ristikanzugi, kudai eli hyvin minunke,
kuduah minä uskoin, kudai söi minun leibiä,
häigi nouzi minuu vastah.
11 No Sinä, Ižändy, armahta minuu,
nosta jalloilleh,
i minä maksan heile heijän ruadoloi myö.
12 Gu minun vihaniekat ei voitetanne minuu,
sit minä tiijän, Sinä suvaičet minuu.
13 Sinä olet minule tuvennu, gu olen moittimatoi.
Sinä annat minul seizuo Sinun silmien ies ilmazenijän.
14 Ylendetty olgah Ižändy, Izrail՚an Jumal,
ainos dai ijän kaiken!
Amin՚, amin՚!
с русским текстом