1 Alliluija! Kiittäkkiä Ižändiä! Häi on hyvä, Hänen armo pyzyy ilmazenijän. 2 Sanottahes Izrail՚an rahvas: Häi on hyvä, Hänen armo pyzyy ilmazenijän. 3 Sanokkah Aaronan sugu: Häi on hyvä, Hänen armo pyzyy ilmazenijän. 4 Sanottahes Ižändän varuajat: Häi on hyvä, Hänen armo pyzyy ilmazenijän. 5 Ahtistuksis minä kirruin Ižändiä, Häi kuuli minuu da toi avvonazele kohtale. 6 Ižändy on minun puolel, minä en varua. Midä voijah luadie minule rahvas? 7 Ižändy avvuttau minuu, varuamattah rubien kaččomah minun vihaniekkoih. 8 Parembi on luottua Ižändäh, migu vuottua abuu rahvahas. 9 Parembi luottua Ižändäh, migu vuottua abuu kniäzilöis. 10 Kai muailman rahvahat kierrettih minuu, no Ižändän nimel minä voitin heidy. 11 Hyö tuldih kaikkielpäi, kierrettih minuu, no Ižändän nimel minä voitin heidy. 12 Hyö kierrettih minuu kui kimalehet pezä, no hävittih kui tuli piidoituhjos. Ižändän nimel minä voitin heidy. 13 Hyö ähkättih minuu äijäl, ku minä langiezin, no Ižändy pidi minuu pystys. 14 Ižändy on minun vägi dai kiitändypajo, Häi piästi minuu. 15 Oigeimielizien kodilois kuuluu ilon da piäzendän iäni: «Jumalan oigei käzi luadiu suurii ruadoloi!» 16 Ižändän oigei käzi on kohotettu, Ižändän oigei käzi ruadau suuri ruadoloi! 17 Minä en kuole, a elän da sanelen Ižändän ruadoloih näh. 18 Ižändy löi minuu äijäl, no ei andanuh minuu surman käzih. 19 Avakkua minule oigien elaijan veräi! Minä menen sydämeh da kiitän Ižändiä. 20 Täs on Ižändän veräi, oigeimielizet mennäh sit sydämeh. 21 Minä kiitän Sinuu, ku Sinä kuulit minuu da annoit minule piäzendän. 22 Kivi, kudai koinluadijat hyllättih, rodih čuppukivekse. 23 Ižändy luadi sen, i se on kummu meijän silmis. 24 Tämän päivän luadi Ižändy. Nostakkua iloiäni, pidäkkiä hyviä mieldy tämän päivän täh! 25 Ižändy, ole moine hyvä, piästä meidy! Ižändy, ole moine hyvä, anna meile lykkyy! 26 Hyvitetty olgah se, kudai tulou Ižändän nimes. Ižändän koispäi myö hyvitämmö teidy. 27 Ižändy on Jumal, Häi andoi meile valgien. Sidokkua verhu nuoril, kiinnitäkkiä se altarin sarvih. 28 Sinä olet minun Jumal, Sinuu minä kiitän. Jumalazeni, Sinuu minä ylendän. Kiitän Sinuu, gu kuulit minuu da piästit minuu. 29 Kiittäkkiä Ižändiä! Häi on hyvä, Hänen armo pyzyy ilmazenijän.
с русским текстом