Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 18
Олӧ́м и кулӧ́м ─ аслат баитӧ́мсянь
1 Ас мывкыда морт быдӧс ас сьӧртӧттяс керӧ,
бурас велӧтӧ́м коста етшасьӧ.
2 Вежӧрттӧм морт оз вынсьӧтчы вежӧртны,
а ассис ылӧссӧ бы мыччалӧ.
3 Кытчӧ локтӧ умӧльсӧ керись,
сэтчӧ локтӧ и абутӧм туйӧ пуктӧ́м.
Рожа куля́нӧ усьӧ́м бӧрын локтӧ умӧльтӧ́м.
4 Морт ӧмись петӧм кыввес ─ пыдын ва,
мывкыда кыввес ва моз визывтӧны.
5 Абу бур сулавны умӧльсӧ керись дор
да веськыта олісьсӧ весись судитны.
6 Вежӧрттӧм мортлӧн баитӧ́мыс вайӧтӧ видчӧ́мӧдз,
аслас ӧмыс ─ вартлӧ́мӧдз.
7 Вежӧрттӧмӧс аслас баитӧ́мыс умӧляс воштӧ,
ӧмсис петӧм кылыс сійӧ кыйӧ.
8 [Дыш мортӧс полӧ́мыс уськӧтӧ,
инька кодь мужик пондас тшыгьявны.]
9 Шушкӧтчисьлӧн кыввес
чӧскыт сёя́н моз пытшкӧдз пырӧны.
10 Дыша уджалісь ─ керку куштісьлӧн вон.
11 Дӧсвидзисьлӧн нимыс ─ ён башня.
Веськыта олісь сэтчӧ пышшӧ и мезмӧ.
12 Бура олісь юрас видзӧ,
пажытьӧ пӧ менам
кыдз ён из йӧра
*а кар да вылын йӧр.
13 Асьсӧ вылына лэбтӧ́м бӧрын мортыс усьӧ,
рама олӧ́м понда мортсӧ бурӧ пуктӧны.
14 Кин кывзытӧг очакыв видзӧ
*б,
сія вежӧрттӧм морт,
сія рожа куля́нӧдз усьӧ.
15 Мортлӧн лолыс кӧ вына,
шогалӧ́м коста сія вермӧ видзсьыны.
Лолыс кӧ нёкыртчӧм,
сэк кин сійӧ вынсьӧтас?
16 Вежӧра морт вынсьӧтчӧ велӧтчыны,
мывкыда морт кошшӧ унажык тӧдны.
17 Мортлӧн сетӧм козиныс сылӧ туйсӧ осьтӧ,
юраліссез дынӧдз вайӧтӧ.
18 Судын одзза баитiсь морт йылісь шуан,
сы сайын пӧ абу умӧль керӧ́мыс.
Но сэтчӧ локтӧ мӧдыс
и пондӧ сыкӧт бӧрйисьны.
19 Усьӧм жребий быд етшасьӧ́м дугдӧтӧ,
вына йӧз коласын медбӧрья кыв висьталӧ.
20 Лӧгасьӧм вон дынӧ он сибӧтчы,
кыдз и ён из йӧра кар дынӧ.
Видчӧ́мыс эд ыбӧсын тас моз янсӧтӧ.
21 Морт баитӧ́мнас гырксӧ тыртӧ,
аслас кыввезсянь воӧ́мнас
*в пӧтӧ.
22 Олӧ́м и кулӧ́м ─ аслат баитӧ́мсянь.
Кыдз тэ баитан,
сідз аслат кыввезсянь и воӧ́мсӧ босьтан.
23 [Бур] иньӧс адззин ─ шуд адззин.
Сія Дӧсвидзисьсянь бурсетӧ́м.
[Кин вашӧтӧ бур иньсӧ ─
ассис шудсӧ вашӧтӧ.
А кин видзӧ кыскасись инькаӧс,
сія мывкыдтӧм морт, умӧльсӧ керись.]
24 Кортӧн ветлӧтiсь кеймисьӧмӧн баитӧ,
а бура олісь баитӧ сійӧ видӧмӧн.
25 Ӧддьӧн унакӧт ёртасян кӧ ─
аслыт умӧльсӧ керан.
Но овлӧны ёрттэз,
кӧдна вонся буржыка радейтӧны.
*а 18:12 из йӧр ─ каменная стена
*а 18:14 очакыв видзны ─ ответить
*в 18:21 воӧ́м ─ плод
Глава 18
