Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 13
Мывкыда мортлӧн велӧтӧ́мыс вайӧ ола́н
1 Мывкыда зон айыслісь велӧтӧ́мсӧ кывзӧ,
а умӧльтісь ӧмалӧ́мсӧ оз кывзы.
2 Аслас бур кыввезсянь мортыс бурнас пӧтӧ,
а умӧльсӧ керисьӧс лёка дзескӧтлыны
*а кыскӧ.
3 Кин ас кадӧ ӧмсӧ пӧдналӧ, сія ассис ола́нсӧ видзӧ.
А кинлӧн ӧмас нем оз ӧшшы, сія аслыс умӧльсӧ керӧ.
4 Дыш мортлӧ уна мый колӧ, но сылӧн нем оз ло.
А бура уджалісьлӧн быдӧс лоас тырмӧмви.
5 Веськыта олісьлӧ бӧбӧтчӧ́мыс ─ сэрпӧ пырӧ́м.
А умӧльсӧ керись асьсӧ умӧльтӧ да сэрпӧсьтӧ.
6 Сӧстӧма олісьсӧ веськыта керӧ́мыс видзӧ.
А умӧльсӧ керисьлісь ола́нсӧ аслас керӧ́мыс орӧтӧ.
7 Ӧтіклӧн нем абу,
но сія асьсӧ пуктӧ бура олісьӧ.
Мӧдіклӧн уна пажытьыс,
а сія асьсӧ пуктӧ умӧля олісьӧ.
8 Бура олісь аслас пажытьӧн
вермас вештісьны ола́ныс понда,
а умӧля олісьсӧ некин оз повзьӧтлы.
9 Веськыта олісьлӧн биыс югыта сотчӧ,
Ентӧг олісьлӧн ─ кусӧ.
[Ылӧтліссез умӧльсӧ керӧ́ммезаныс ӧшӧны.
А веськыта оліссез жалейтӧны да проститӧны.]
10 Асьӧс вылына пуктӧ́мсянь лэбтісьӧ етшасьӧ́м.
А туйдӧтӧ́мсӧ кывзісьыс мывкыда морт.
11 Кокнита шедӧм пажытьыс ва моз визывтӧ,
а аслас уджӧн шедтісьыс уна ӧктӧ.
12 Дыр видзчисьӧ́мсянь сьӧлӧм дзугыльтчӧ,
а видзчи́сьӧмыс лоис кӧ,
сэк мортыс жыв кыдз ловзьӧ.
13 Кин туйдӧтӧ́мсӧ пуктӧ абутӧм туйӧ,
сія аслыс умӧльсӧ керӧ.
А кин тшӧктӧ́ммесӧ бурӧ пуктӧ,
сія бурсӧ босьтӧ.
14 [Ылӧтлісь зонлӧн нем абу бурыс,
а мывкыда раблӧн уджыс бура мунӧ,
сылӧн туйыс веськыт.]
15 Мывкыда мортлӧн велӧтӧ́мыс ола́н вайӧ,
кулӧ́млӧн кыйся́нісь
*б видзӧ.
16 Бур вежӧра мортсӧ бурӧ пуктӧны,
а ылӧтлісьлӧн туйыс кулӧ́мӧ вайӧтӧ.
17 Вежӧра морт быдӧс кужӧ керны,
вежӧрттӧм морт мыччалӧ ассис вежӧр ӧштӧ́мсӧ.
18 Ыстӧм мортыс умӧль кӧ, сія ачыс умӧляс сюрӧ.
Надейнӧй кӧ ─ мездӧ́м вайӧ.
19 Кин велӧтӧ́мсӧ абутӧм туйӧ пуктӧ,
сійӧ видзчисьӧ умӧля олӧ́м да рожа кульӧ́м.
Кӧда керӧ туйдӧтӧ́м сьӧрті,
сійӧ видзчисьӧ бурӧ пуктӧ́м.
20 Видзчи́сьӧмыт аркмис кӧ, сэк тэныт долыт.
Вежӧрттӧм морт и юрӧ оз пырт лёк керӧ́мсӧ кольны.
21 Мывкыда отиркӧт баитісь ачыс лоас мывкыда.
Мывкыдтӧмкӧт ёртасись аслыс умӧльсӧ керӧ.
22 Лёк керись сьӧрын умӧльыс вӧтлісьӧ,
а веськыта олісьлӧ бурыс локтӧ.
23 Бур мортлӧн ӧктӧм пажытьыс
челядьлӧ да нылӧн челядьлӧ кольччӧ,
а умӧльсӧ керисьлӧн ӧктӧ́мыс веськыта олісьлӧ вуджӧ.
24 Уна нянь овлӧ и умӧля олісьлӧн ыб вылын,
но умӧльсӧ кериссез кузя сія няньсӧ ӧштас.
25 Кин ассис челядьсӧ оз радейт,
сія шатьсӧ оз босьтлы.
Кин радейтӧ ассис челядьсӧ,
сія нійӧ учӧтсянь вачкыштлӧ.
26 Веськыта олісь пӧттӧдз сёйӧ,
а умӧльсӧ керисьлӧн кынӧмыс пыр сималӧ.
*а 13:2 лёка дзескӧтлыны ─ жестоко притеснять
*б 13:15 кулӧ́млӧн кыйся́н ─ сеть смерти
Глава 13
