Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 11
Веськыта керӧ́мыс вайӧ ола́н
1 Бӧбӧтӧмӧн ӧшлӧ́м
*а ─ Дӧсвидзись одзын сэрпӧ пырӧ́м,
а бӧбӧттӧг ӧшлӧ́мыс Сы сьӧрті.
2 Асьӧс лэбтӧ́мсянь локтӧ рожа кульӧ́м,
а раммезлӧ
*б ─ мывкыд.
[Веськыта олісь кулӧ кӧ, сы понда тӧждӧны.
Лёк керись видзчисьтӧг кулӧ кӧ, сысянь гажмӧны.]
3 Веськыта керисьӧс сӧстӧма олӧ́мыс туйдӧтӧ.
Гусьӧн умӧльсӧ керисьӧс аслас ылӧтлӧ́мыс вийӧ.
4 Лӧг лунӧ
*в оз отсав дона пажыть,
кулӧ́мись мездас веськыта керӧ́м.
5 Бур мортлісь туйсӧ
сылӧн веськыта керӧ́мыс волькӧтӧ,
а Ентӧг олісь аслас умӧль керӧ́мсянь усьӧ.
6 Веськыта олісьӧс сылӧн веськыта керӧ́мыс мездӧ,
а ылӧтлісьсӧ бӧбись ӧзйӧтчӧ́мыс кыдз кыйся́нӧ кутӧ.
7 Ентӧг олісь кулас кӧ, сылӧн надеяыс ӧшӧ.
Мый видзчисьӧ умӧльсӧ керись, сія оз аркмы.
8 Веськыта олісь умӧльсис мезмӧ,
сы туйӧ сэтчӧ умӧльсӧ керись шедӧ.
9 Ентӧг олісь матісьсӧ кывнас кувтӧдз дойдӧ.
Веськыта олісьсӧ бура тӧдӧ́мыс мездӧ.
10 Веськыта оліссезлӧ бур кӧ, сэк карын
*г гаж.
Лёк керись кулӧ кӧ, сэк отир гажӧтчӧ.
11 Веськыта оліссезлӧн бласлӧвитӧ́м пыр карыс лэбӧ,
а Ентӧг оліссезлӧн баитӧ́мсянь сія киссьӧ.
12 Ылӧстӧм морт ассис матісьсӧ абутӧм туйӧ пуктӧ,
а вежӧра морт шы оз сет.
13 Кин кывнас ӧтмӧдӧрӧ ӧвтӧ, сія тӧдлытӧмсӧ
*д осьтӧ,
а надейнӧй морт оз висьтась, юрас видзӧ.
14 Абу кӧ мывкыда веськӧтлісь, сэк отирыс кулӧ-чинӧ,
бур туйдӧтіссез кӧр уна, сэк отир бура олӧ.
15 Кывтӧ сетан кӧ мӧдік понда одзӧс вештыны,
аслыт умӧльсӧ керан.
Кин оз сет кывсӧ мӧдік понда вештісьны,
сылӧ нем повны.
16 Бур мывкыда иньӧс ошкӧны,
[сія жӧниклӧ ошкӧ́м вайӧ.
Инь, кӧдалӧ син вылӧ оз ков веськыта керӧ́мыс,
жӧниксӧ рожа куля́нӧдз вайӧтӧ.
Дышшез умӧля олӧны,]
а кӧдна радейтӧны уджавны,
нія пажыть ӧктӧны.
17 Небыт сьӧлӧма морт аслыс бурсӧ вайӧ,
сьӧлӧмтӧм морт аслас вывты́рлӧ умӧльсӧ керӧ.
18 Мый босьтӧ умӧльсӧ керись аслас керӧ́м понда,
сысянь сылӧ бурыс оз ло.
А веськыта керисьлӧ былись лоас козин.
19 Веськыта керӧ́м вайӧтӧ ола́нӧ,
а кин кошшӧ лёксӧ керны,
сія ассис ола́нсӧ ӧштӧ.
20 Кин сьӧлӧмас видзӧ ылӧтӧмӧн лёксӧ керны,
Дӧсвидзисьлӧ сія сэрпӧсь морт.
А сӧстӧма оліссез Сылӧ сьӧлӧмви.
21 Бура тӧд: умӧльсӧ керись оз кольччы мыжйытӧг,
а веськыта олісьлӧн увтырыс мезмас.
22 Басӧк, но ылӧстӧм инька
кыдз порсь чукаын зарни пелькытш.
23 Веськыта оліссез мый юраныс видзӧны,
сысянь петӧ бурыс.
Умӧльсӧ кериссез мый юраныс пыртӧны,
сысянь ─ Енлӧн лӧг.
24 Ӧтік уна сеталӧ, и сылӧн содӧ.
Мӧдік ӧддьӧн надз, а сылӧн чинӧ.
25 Бура отсасись оз понды тшыгьявны.
Кин мӧдіккезӧс ваӧн юкталӧ,
сійӧ асьсӧ юкталасӧ.
26 Кин сюсӧ видзӧ, а оз вузав, сійӧ ёрдӧны.
Кин ассис сюсӧ вузалӧ, сійӧ бласлӧви́тӧны.
27 Кин кошшӧ керны бурсӧ,
сійӧ бурӧ пуктӧны.
Кин кошшӧ керны умӧльсӧ,
умӧльыс сы вылӧ и локтӧ.
28 Аслас сьӧм
*е вылӧ надейтчись косьмӧм ув моз усьӧ.
А веськыта олісь виль ув моз дзоридза́сьӧ
*ж.
29 Кин аслас гортіссезлӧ тӧждӧ́м вайӧ,
сылӧ нем оз дӧнзьы.
Мывкыдтӧм морт лоас рабӧн мывкыда мортлӧ.
30 Веськыта олісьлӧн керӧ́ммес кыдз ола́н пу:
нія эд вайӧны бур ола́н.
Мывкыда морт дынӧ отирсӧ кыскӧ.
31 Веськыта олісьлӧ му вылас овтӧн ни
керӧ́ммез сьӧрті вештісьӧны кӧ,
сэк Ентӧг олісь да умӧльсӧ керись йылісь
и баитны нем.
*а 11:1 ӧшлӧ́м ─ взвешивание
*б 11:2 рам ─ кроткий, смиренный
*в 11:4 лӧг лун ─ 1) Кад, кӧр Ен пондас судитны быдӧс отирсӧ. 2) Сьӧкыт кад, кӧр умӧльыс локтӧ ӧтік морт вылӧ али кытшӧмкӧ муын оліссез вылӧ.
*г 11:10 кар ─ город
*д 11:13 тӧдлытӧм ─ тайна
*е 11:28 сьӧм ─ деньги
*ж 11:28 дзоридза́сьны ─ цвести
Глава 11
