Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
98 Псалом
[Давидлӧн псалом.]1 Дӧсвидзисьыс ─ Юралісь Ӧксу!
Отиррез, Сыись зэгсьӧ-полӧ быдӧнныт!
Сылісь юрала́н пукӧ́ссӧ керуви́ммез
*а видзӧны.
Муыс ась зэгалӧ!
2 Дӧсвидзисьыс Сион вылын вына Ӧксу,
Сія юралӧ быд отир вылын.
3 Тэнчит ыджыт нимтӧ нія ась ошкӧны!
Тэнат нимись быдӧнныс полӧны,
Тэнат нимыт вежа!
4 Тэ вына Ӧксу,
судын веськыта бӧрйисьӧ́м Тэ радейтан.
Отирсӧ Тэ тшӧктін веськыта керны.
Яков увтыркӧт Тэ веськыта бӧрйисин,
нылӧ быльсӧ осьтін.
5 Лэбтӧ-ошкӧ Дӧсвидзисьсӧ, миянлісь Енсӧ!
Сылӧ коккезас копыртчӧ,
Сылӧн нельки кок увтыс вежа!
6 Моисей да Аарон вӧлісӧ
Дӧсвидзисьлӧн вежауджаліссез,
Самуил вӧлі Сійӧ нимнас кориссез коласісь.
Нія Дӧсвидзисьсӧ горӧн корлісӧ,
и Сія нійӧ кывліс.
7 Израиль отиркӧт Сія баитліс
вывлань нюжалӧм кымӧр пытшксянь.
Сылісь сетӧм тшӧктӧ́ммесӧ да висьталӧ́ммесӧ
нія сьӧлӧмын видзисӧ.
8 Дӧсвидзисьным, миян Енным, Тэ нійӧ кывзывлін.
Тэ вӧлін нійӧ проститісь Енӧн,
но умӧльсӧ керӧ́мныс понда
нылӧ Тэсянь и дӧнзьывліс.
9 Лэбтӧ-ошкӧ Дӧсвидзисьсӧ, миянлісь Енсӧ!
Вежа керӧс вылын Сылӧ копрасьӧ!
Дӧсвидзисьным, миян Енным эд вежа.
*а 98:1 керуви́м ─ вына ангел
Глава 98
