Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
91 Псалом
1 Шоччися́н лунӧ сьыла́н псалом.2 Кытшӧм бур ошкыны Тэнӧ, Дӧсвидзисьӧ,
сьылӧтны Тэнчит нимтӧ, Медвылісьӧ!
3 Асывнас бур висьтасьны Тэнат небыт сьӧлӧм йылісь,
рытнас ─ Тэнат быль йылісь.
4 Бур орсны дас сиа орса́н
*а вылын,
арфа да гусли вылын орсӧмӧн Тэнӧ ошкыны.
5 Дӧсвидзисьӧ,
Аслат керӧ́ммезӧн Тэ менӧ гажӧтан,
Тэнат киэзӧн керӧ́ммезсянь ме ёна гажӧтча.
6 Дӧсвидзисьӧ,
кытшӧм ыджытӧсь Тэнат керӧ́ммет!
Кытшӧм мывкыдаӧсь юрат видзӧ́ммет!
7 Ылӧстӧм морт оз тӧд,
мывкыдтӧм морт этӧ оз вежӧрт:
8 Ентӧг оліссез кӧть турун моз лэбтісьӧны,
умӧльсӧ кериссез дзоридза́сьӧны,
но нія быдӧнныс пыр кежӧ ӧшасӧ.
9 Тэ эд, Дӧсвидзисьӧ,
быдӧннысся вылынжык пырся-пыр!
10 То, Тэ вылӧ лэбтісьӧммес, Дӧсвидзисьӧ,
Тэныт паныт муніссес кулӧны.
Умӧльсӧ кериссес быдӧнныс рознитчӧны.
11 А менӧ Тэ вынсьӧтан,
пороз кодь вынаӧн керан.
Тэ менӧ виль виӧн мавтан.
12 Ме аслам синнэзӧн адзза
ме вылӧ лэбтісьӧммезлісь усьӧ́мсӧ.
Аслам пеллезӧн кыла
лёк кериссезӧс паздӧ́мсӧ.
13 Веськыта оліссез пальма моз дзоридза́сьӧны,
нія кыдз Ливан вылын сыспу лэбтісьӧны.
14 Нія Дӧсвидзисьлӧн Вежа Керкуын быдмӧны,
миян Енлӧн йӧррезын дзоридза́сьӧны.
15 Нія и пӧрисьувья бур воӧ́м
*б сетӧны,
путриктӧны-быдмӧны да вильмӧны.
16 Нія висьтасьӧны: Дӧсвидзисьыс веськыта керӧ.
Сія менам чорыт из керӧс,
Сыын абу некытшӧм бӧбӧтӧ́м.
*а 91:4 дас сиа орса́н ─ десятиструнный инструмент
*б 91:15 воӧ́м ─ плод
Глава 91
