Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
68 Псалом
1 Сьыліссезӧн веськӧтлісьлӧ. Орсӧны «шошан» орса́н вылын. Давидлӧн псалом.2 Енӧ, мезды менӧ,
ваэз голяӧдз кайисӧ.
3 Зыбуна нюрын ме сибді,
меным нем вылӧ сувтны.
Пыдын ваӧ ме пыри,
визыв ваыс менӧ кылӧтӧ.
4 Горӧтлӧ́мсянь менам садьӧ бырис,
голосӧ сибдіс,
Енӧс видзчисьӧ́мсянь синнэзӧ мыдзисӧ.
5 Ме вылӧ лэбтісьӧммес содісӧ,
юрсиӧся унажык лоисӧ.
Нія ме вылӧ синӧн озӧ вермӧ видзӧтны
и могтӧг
*а ме сьӧрын вӧтлісьӧны.
Нія менчим корӧны сійӧ,
мый ме нылісь эг мырддьы.
6 Енӧ, Тэ тӧдан менчим мывкыдтӧг олӧ́мӧс,
умӧль керӧ́ммезӧ Тэ шогья абу сайӧвтӧмӧсь.
7 Дӧсвидзисьӧ, вына Енӧ, отсав,
медбы Тэ вылӧ надейтчиссезлӧ
эз ковсьы гӧрдӧтны ме кузя.
Израильлӧн Ен,
ме кузя ась озӧ локтӧ рожа куля́нӧдз нія,
кӧдна Тэнӧ кошшӧны.
8 Тэ понда эд менӧ умӧльтӧны,
менам чужӧ́мӧ сотчӧ.
9 Аслам воннэзлӧ ме лои йӧз мортӧн,
мамӧлӧн зоннэзлӧ ─ мӧдіклаись мортӧн.
10 Тэнат керку понда менам сьӧлӧмӧ сотчӧ,
Тэнӧ видіссезлӧн видӧ́мныс ме вылӧ усьӧ.
11 Кӧслуна́лікам ме горза,
сы понда менӧ ӧмалӧны.
12 Кӧр ме тӧждіся́н паськӧм
*б пасьтала,
сэк нія ме вылын сералӧны.
13 Ыбӧссэз дынын пукаліссез ме йылісь баитӧны,
кодаліссез ме йылісь сьылӧны.
14 Дӧсвидзисьӧ, ме ӧні Тэныт кейма.
Кеймӧ́мӧ ась лоас Тэныт сьӧлӧмви.
Енӧ, Тэ надейнӧй Мездісь,
Аслат небыт сьӧлӧмӧн кыв менӧ!
15 Кыскы менӧ нювтсис
*в, медбы ме эг вӧй.
Мезды менӧ ны дынісь,
кӧдна ме вылӧ синӧн озӧ вермӧ видзӧтны.
Мезды менӧ пыдын васис.
16 Визыв ваыс менӧ ась оз кылӧт,
ваберга́чыс
*г ась оз ньылышт.
Менам юр вевдӧрын пыдӧстӧминыс
ӧмсӧ ась оз пӧднав.
17 Дӧсвидзисьӧ, кыв менӧ,
Тэнат небыт сьӧлӧмыт бурсӧ сетӧ.
Ӧддьӧн жалейтӧ́мытсянь видзӧт ме вылӧ.
18 Аслат раб шогья чужӧ́мтӧ эн сайӧвт,
ме эд ӧддьӧн тӧждіся.
Кыв менӧ чожажык!
19 Сибӧтчы ме дынӧ да мезды,
ме вылӧ лэбтісьӧммез шогья дорйы!
20 Тэ тӧдан, кыдз менӧ видӧны да умӧльтӧны,
ме вылын сералӧны.
Ме вылӧ лэбтісьӧммесӧ Тэ быдӧннысӧ адззан.
21 Умӧльтӧ́мыс менчим сьӧлӧмӧс дойдіс,
ме садьтӧмсялі.
Ме видзчиси жалейтӧ́м, а сія абу,
видзчиси бурӧтісьӧс, сія эз адззись.
22 Сёя́н туйӧ меным курыт сӧп сетісӧ,
горшӧ косьмӧ́м коста чизыр шӧмӧн юкталісӧ.
23 Пызан выланыс чӧскыт сёя́н-юа́нныс
нылӧ кыйся́нӧн ась лоӧ,
налькӧ моз ась шедӧны да падмӧны.
24 Синнэзныс ась пемдӧны,
медбы эзӧ адззӧ.
Нія ась пыр кежӧ кӧстісьӧны.
25 Ассит лӧгтӧ ны вылӧ кисьт.
Лёксялӧ́мытсянь чеччӧм биыс нійӧ ась вӧтӧ.
26 Нылӧн оланіныс ась кушамӧ,
ны ӧнассэзын
*д оліссез ась озӧ лоӧ.
27 Нія вӧтчӧны сы сьӧрӧ, кӧдӧ Тэ вартлін.
Тэнат киӧн дойдӧмлӧ зубытсӧ содтӧны.
28 Нылісь этӧ умӧль керӧ́мсӧ содты
нылӧн мӧд умӧль керӧ́ммез дынӧ.
Нія ась озӧ лоӧ дорйӧмӧсь.
29 Нылӧн ниммезныс
Ола́н Небӧгсис ась лоасӧ кырӧвтӧмӧсь,
ӧтлаын веськыта оліссезкӧт ась озӧ лоӧ гижӧмӧсь.
30 А ме шудтӧм
*е морт,
ӧддьӧн песся-мырся.
Енӧ, Тэнат отсӧтыт менӧ лэбтас.
31 Ме ассим Енӧс сьыланкы́ввезӧн понда ошкыны,
Сылісь нимсӧ понда сьылӧтны.
32 Енлӧ вайӧм ӧшкаэзся
да сюра, гыжа пороззэзся
менам ошкӧ́мӧ Сылӧ
лоас ӧддьӧнжык сьӧлӧмви.
33 Пессись-мырсиссез сійӧ казяласӧ да гажмасӧ.
Енсӧ кошшиссез, тіян сьӧлӧммезныт сэк ловзясӧ.
34 Дӧсвидзись кылӧ кортӧн ветлӧтіссесӧ.
Ассис отирсӧ, домӧттэзын мырсиссесӧ,
Сія оз пукты абутӧм туйӧ.
35 Сійӧ aсь ошкӧны муыс да енӧжыс,
саридзыс да сэтӧн быд олісьыс.
36 Еныс эд Сионсӧ мездас,
Иудеяись карресӧ лэбтас.
Сэтчин пондас овны Сылӧн отир,
сія муыс лоас ны кипод увтын.
37 Сы раббезлӧн челядь сэтӧн пондасӧ овны.
Сійӧ радейтіссез сэтчӧ пондасӧ пуксьыны
*ж.
*а 68:5 могтӧг ─ без причины
*б 68:12 тӧждіся́н паськӧм ─ траурная одежда
*в 68:15 нювт ─ тина
*г 68:16 ваберга́ч ─ водоворот
*д 68:26 ӧнас ─ палатка
*е 68:30 шудтӧм ─ несчастный
*ж 68:37 пуксьыны ─ поселиться
Глава 68
