Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
143 Псалом
Давидлӧн псалом. [Голиафӧс вермӧ́м йылісь.]1 Ошка Дӧсвидзисьӧс:
Сія менам чорыт из керӧс.
Менчим киэзӧс Сія велӧтӧ тышкасьны,
менчим чуннезӧс ─ вермасьны.
2 Сія ме дынӧ небыт сьӧлӧма.
Сія менам чорытін
*а, дзебсисянiн,
менам сайӧвтча́н
*б.
Сія менӧ Мездісь,
ме Сы вылӧ надейтча.
Менчим отирӧс Сія тшӧктӧ,
медбы менӧ кывзiсисӧ.
3 Дӧсвидзисьӧ,
морт ─ кин сія сэтшӧмыс,
Тэ сійӧ юрат видзан?
Мортлӧн зон ─ кин сія,
Тэ сійӧ син вылын видзан?
4 Мортлӧн ола́ныс ─ тӧвлӧн пӧльыштӧ́м,
сылӧн ола́н луннэс ─ ӧша́н вуджӧ́р.
5 Дӧсвидзисьӧ, пӧліньт енӧжсӧ да лэдзчы.
Керӧссэз бердӧ павкӧтчы,
и нiя пондасӧ тшынӧтны.
6 Вирдышт чарньӧ́внат
да рознит ме вылӧ лэбтісьӧммесӧ.
Лэдз чарньӧ́вветӧ да нiйӧ пазды.
7 Вылісянь нюжӧт Ассит китӧ да менӧ мезды,
пыдын васис кыскы,
йӧз отир киись мезды.
8 Нiя пыр бӧбӧ́тчӧмӧн баитӧны.
Нельки кыв сетікӧ
веськыт кинысӧ сеттӧн бӧбӧтӧны.
9 Енӧ, ме Тэныт виль сьыланкы́в сьыла,
дас сиа орса́н
*в вылын орсӧмӧн Тэнӧ сьылӧта.
10 Тэ ӧксуэзлӧ вермӧ́мсӧ козьналан,
Давид рабтӧ лэчыт шыпуртісь мездан.
11 Дорйы да мезды менӧ йӧз отир киись.
Нiя пыр бӧбӧ́тчӧмӧн баитӧны.
Нельки кыв сетікӧ
веськыт кинысӧ сеттӧн бӧбӧтӧны.
12 Миян зоннэзным ась лоӧны
кыдз паськалӧм том пуэз,
миян ныввезным ─
кыдз ӧксу керкуын баситӧм столббез.
13 Миян амбаррезным ась лоасӧ
быдкодь сюӧн тыраӧсь.
Миян баляэзным ась йылӧны
*г сюрссэзӧн
*д.
Баля чукӧррез миян видззез вылын
ась лоӧны лыдтӧмӧсь.
14 Миян поданым ась лоӧ ён,
нiйӧ ась некин оз гусяв,
и некытчӧ ась озӧ ӧшӧ.
Миян туйез вылын ась оз кыв горӧтла́н-горза́н шы.
15 Шуда сія отирыс,
кӧдналӧн быдӧс сідз и мунӧ.
Шуда сія отирыс,
кӧдналӧн Еныс ─ Дӧсвидзись.
*а 143:2 чорытін ─ твердыня
*б 143:2 сайӧвтча́н ─ щит
*в 143:9 сиа орса́н ─ струнный инструмент
*г 143:13 йывны ─ размножиться
*д 143:13 сюрс ─ тысяча
Глава 143
