Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
118 Псалом
[Аллилуйя!]1 Шудаӧсь сӧстӧма оліссез,
Дӧсвидзисьлӧн Туйдӧ́т сьӧрті кериссез.
2 Шудаӧсь Сылӧн висьталӧ́ммез сьӧрті оліссез,
сьӧлӧмсянь Сійӧ кошшиссез.
3 Нiя умӧльсӧ озӧ керӧ,
Енлӧн туйез вылӧт ветлӧтӧны.
4 Дӧсвидзисьӧ,
Тэ туйдӧтін миянӧс овны тшӧктӧ́ммет сьӧрті.
5 Ок, мунiсӧ бы менам туйезӧ веськыта,
Тэнат туйдӧтӧ́ммез сьӧрті!
6 Сэк меным эз бы ков гӧрдӧтны
Тэнат тшӧктӧ́ммез вылӧ видзӧттӧн.
7 Сӧстӧм сьӧлӧмӧн ме Тэнӧ ошка,
веськыта судитӧ́ммет вылӧ видзӧттӧн велӧтча.
8 Ме понда овны Тэнат туйдӧтӧ́ммез сьӧрті,
некӧр эн коль менӧ ӧтнамӧс!
9 Том зонлӧ кыдз видзны ассис ола́н туйсӧ сӧстӧмӧн?
─ Тэнат кыв сьӧрті олӧмӧн.
10 Ме лолӧс пукта Тэнӧ кошшыны,
Тэнат тшӧктӧ́ммезiсь эн лэдз менӧ ылавны!
11 Тэнчит кывтӧ ме сьӧлӧмам видза,
медбы Тэ одзын эг кер умӧльсӧ.
12 Дӧсвидзисьӧ, ошка Тэнӧ!
Велӧт менӧ овны туйдӧтӧ́ммет сьӧрті.
13 Тэнчит веськыта висьталӧ́мметӧ
ме быдӧс висьтася отирлӧ.
14 Ассим ола́н туйӧс ме муна
Тэнат висьталӧ́ммез сьӧрті.
Нысянь ме гажӧтча кыдз дона берсясянь.
15 Тэнчит тшӧктӧ́мметӧ юрам бергӧтла,
Тэнат туйез вылӧ видзӧта.
16 Тэнат туйдӧтӧ́ммезсянь гажма,
Тэнчит кывветӧ ог вунӧт.
17 Аслат раблӧ отсав небыт сьӧлӧмсянь,
медбы ме верми овны.
Сэк ме понда керны Тэнат кыв сьӧрті.
18 Осьт менчим синнэзӧс,
и ме казяла,
кытшӧм адззывлытӧм Тэнат Туйдӧ́тыт.
19 Му вылас ме дзир локтісь-мунісь морт.
Эн сайӧвт ме шогья Ассит тшӧктӧ́мметӧ.
20 Менам сьӧлӧмӧ гажтӧмтчӧ,
лолӧ быд кадӧ ӧддьӧн видзчисьӧ
Тэнчит веськыта судитӧ́мтӧ.
21 Тэ раммӧтан асьнысӧ вылына лэбтіссесӧ,
Тэнат тшӧктӧ́ммезiсь мӧдӧрӧ бергӧтчиссесӧ,
ёрдӧммесӧ.
22 Нiйӧ эн лэдз менӧ видны да умӧльтны,
ме эд ола Тэнат висьталӧ́ммез сьӧрті.
23 Юраліссез пукалӧны да баитчӧны,
кыдз меным паныт сувтны,
а Тэнат рабыт юрас бергӧтлӧ Тэнчит туйдӧтӧ́мметӧ.
24 Тэнат висьталӧ́ммезсянь ме гажма.
Тэнат туйдӧтӧ́ммет менӧ велӧтӧны.
25 Менам лолӧ бусӧдз усис,
Аслат кыв сьӧрті вильмӧт менчим ола́нӧс!
26 Ме висьтаси аслам туйез йылісь,
и Тэ менӧ кылін.
Велӧт менӧ Аслат туйдӧтӧ́ммезӧ!
27 Отсав меным вежӧртны Тэнчит тшӧктӧ́мметӧ,
и ме понда тӧдмавны-видзӧтны
Тэнчит адззывлытӧм керӧ́мметӧ.
28 Тӧждісьӧ́мсянь менам лолӧ ӧдва ӧшшӧ,
Аслат кыв сьӧрті вынсьӧт менӧ!
29 Эн лэдз менӧ бӧбӧ́тчӧмӧн овны,
ло ме дынӧ небыт сьӧлӧма,
велӧт менӧ овны Тэнат Туйдӧ́т сьӧрті.
30 Ме бӧрйи быльлісь туйсӧ.
Тэнат туйдӧтӧ́ммет пыр менам син одзын.
31 Дӧсвидзисьӧ,
ме видзся Тэнат висьталӧ́ммез бердӧ,
эн лэдз менӧ локны отир сералӧ́мӧдз.
32 Ме понда котӧртны Тэнат тшӧктӧ́ммезлӧн туй кузя,
кӧр Тэ паськӧтан менчим вежӧртӧ́мӧс.
33 Дӧсвидзисьӧ,
мыччав меным Тэнат туйдӧтӧ́ммезлісь туйсӧ,
и ме медбӧрӧдз понда мунны сія туй кузя.
34 Мывкыдсьӧт менӧ,
и ме понда овны Тэнат Туйдӧ́т сьӧрті.
Сійӧ пыр понда видзны сьӧлӧмам.
35 Нуӧт менӧ тшӧктӧ́ммет туй кузя.
Ме нійӧ радейта.
36 Менчим сьӧлӧмӧс веськӧт Тэнат висьталӧ́ммезлань.
Эн сет меным отирӧс ылӧтӧмӧн ӧктыны быд берсясӧ.
37 Бергӧт менчим синнэзӧс,
медбы ме дугді видзӧтны ковтӧм вылӧ.
Аслат туй вылын вильмӧт менчим ола́нӧс.
38 Аслат раблӧ кер, мый Тэ кӧсйисин.
Тэнӧ кывзiсьлӧ, Тэись полісьлӧ
кер Аслат сетӧм кыв сьӧрті.
39 Вешты менчим рожа куля́нӧс,
кӧдаись пола.
Тэнат туйдӧтӧ́ммет бурӧсь.
40 Тэнат тшӧктӧ́ммет меным ӧддьӧн колӧны.
Вильмӧт менчим ола́нӧс,
Тэ эд веськыта Керись!
41 Дӧсвидзисьӧ,
Тэнат небыт сьӧлӧмсянь отсасьӧ́ммет
ась локтӧны меным.
Аслат кыв сьӧрті менӧ мезды.
42 Сэк менам лоас мый висьтавны менӧ умӧльтісьлӧ.
Ме эд надейтча Тэнат кыв вылӧ.
43 Эн мырддьы менам ӧмись быль кывветӧ.
Тэнат веськыта судитӧ́м вылӧ эд ме надейтча.
44 Тэнчит Туйдӧ́ттӧ ме пыр понда видзны тӧдвылам,
пырся-пыр понда овны сы сьӧрті.
45 Ме вынсьӧтча овны Тэнат тшӧктӧ́ммез сьӧрті,
сійӧн менӧ нем оз понды видзны.
46 Ӧксуэз одзын понда баитны
Тэнат висьталӧ́ммез йылісь,
и меным оз ковсьы гӧрдӧтны.
47 Тэнат тшӧктӧ́ммезӧн понда сьӧлӧмӧс бурмӧтны,
ме эд нiйӧ ӧддьӧн радейта.
48 Киэзӧс нюжӧта Тэнат тшӧктӧ́ммезлань,
кӧднӧ ме радейта.
Нійӧ понда юрам бергӧтлыны.
49 Уськӧт тӧдвылат Аслат раблӧ сетӧм кывтӧ,
кӧда вылӧ Тэ тшӧктін надейтчыны.
50 Тэнат сетӧм кылыт вильмӧтӧ менчим ола́нӧс.
Сьӧкыт кадӧ сія меным сьӧлӧм бурмӧта́н.
51 Асьнысӧ вылына лэбтіссез
ме вылын бӧбись
*а сералӧны,
но ме Тэнат Туйдӧ́тісь ог кеж.
52 Тэнчит кӧркӧся веськыта судитӧ́мметӧ
ме тӧдвылам вайӧтла,
нiйӧн сьӧлӧмӧс бурмӧта.
53 Ме вир кустӧдз лӧгася,
кӧр адзза Ен дынісь ылалӧммесӧ,
кӧдна дугдісӧ овны Тэнат Туйдӧ́т сьӧрті.
54 Му вылын ветлӧтӧ́мӧ коста
Тэнат тшӧктӧ́ммет меным вӧлісӧ сьыланкы́ввезӧн.
55 Дӧсвидзисьӧ,
Тэнчит нимтӧ ме ойнас касьтывла,
Тэнат Туйдӧ́т сьӧрті пыр ола.
56 Сія ─ менам ола́н пайӧ,
ме эд ола Тэнат тшӧктӧ́ммез сьӧрті.
57 Ме висьталі:
«Дӧсвидзисьӧ, менам ола́н пайӧ ─
овны Тэнат кыввез сьӧрті».
58 Сьӧлӧмсянь ме Тэныт кеймиси:
«Аслат кыв сьӧрті ло ме дынӧ небыт сьӧлӧма».
59 Ассим туйезӧс ме видзӧті,
Тэнат висьталӧ́ммезлань коккезӧс иньдӧті.
60 Ме эг падмӧтчы,
тэрмаси керны Тэнат тшӧктӧ́ммез сьӧрті.
61 Ентӧг оліссезлӧн кыйся́ннэзныс менӧ каттисӧ,
но ме Тэнчит Туйдӧ́ттӧ эг вунӧтлы.
62 Ойшӧрнас ме чеччывлі буркы́втны
*б Тэнӧ
веськыта судитӧ́ммет понда.
63 Тэись поліссезкӧт,
Тэнат тшӧктӧ́ммез сьӧрті оліссезкӧт,
ме ӧтдор кера.
64 Дӧсвидзисьӧ,
муыс тыра Тэнат небыт сьӧлӧмсянь керӧ́ммезӧн.
Велӧт менӧ овны Тэнат тшӧктӧ́ммез сьӧрті.
65 Дӧсвидзисьӧ,
Аслат раблӧ Тэ уна бурсӧ керин,
висьталӧ́мыт сьӧрті быдӧс керин.
66 Велӧт менӧ лоны бур вежӧра да мывкыда мортӧн,
Тэнат тшӧктӧ́ммезӧ ме эд верита.
67 Пессьӧ́м-мырсьӧ́м одзам ме ылавлі,
а ӧні Тэнат кыв сьӧрті ола.
68 Дӧсвидзисьӧ,
Тэ бур да керан бурсӧ,
велӧт менӧ туйдӧтӧ́ммезат.
69 Асьнысӧ вылына лэбтіссез
ме йылісь вӧвлытӧмсӧ каттьӧны,
бӧбӧ́тӧмӧн баитӧны.
А ме сьӧлӧмсянь понда овны Тэнат тшӧктӧ́ммез сьӧрті.
70 Нылӧн сьӧлӧмныс чорзьӧм, госсялӧм, нем оз кыв,
а ме Тэнат Туйдӧ́тӧн сьӧлӧмӧс бурмӧта.
71 Пессьӧ́м-мырсьӧ́мӧ меным вӧлі бур вылӧ,
сы пыр ме велалі овны Тэнат туйдӧтӧ́ммез сьӧрті.
72 Тэнат ӧмись петӧм Туйдӧ́тыс меным донажык
уна зарнися
*в да эзы́сься
*г.
Ошкӧ́м.
73 Тэнат киэт менӧ аркмӧтісӧ,
пытшкӧс кыдз колӧ лӧсьӧтісӧ.
Вежӧрсьӧт менӧ,
и ме велала овны Тэнат тшӧктӧ́ммез сьӧрті.
74 Тэись поліссез менӧ казяласӧ да гажмасӧ,
ме эд Тэнат кыв вылӧ надейтча.
75 Дӧсвидзисьӧ, ме тӧда, Тэ веськыта судитан.
Тэ менӧ керӧ́мӧ сьӧрті мыжйин.
76 Тэнат небыт сьӧлӧмсянь отсалӧ́мыт
ась лоас меным сьӧлӧм бурмӧта́нӧн,
кыдз Тэ Аслат раблӧ и висьтавлін.
77 Ло ме дынӧ небыт сьӧлӧма,
и ме понда овны.
Тэнат Туйдӧ́тыт эд меным гажсӧ сетӧ.
78 Асьнысӧ лэбтіссез
ась рожа куля́нӧдз локтӧны!
Нія эд менӧ весись дзескӧтӧны.
А ме Тэнчит тшӧктӧ́мметӧ юрам бергӧтла.
79 Тэись поліссез да Тэнчит висьталӧ́мметӧ тӧдiссез
ась бергӧтчӧны ме дынӧ.
80 Сет меным сьӧлӧмсянь кывзісьны
Тэнчит туйдӧтӧ́мметӧ,
медбы меным эз ков гӧрдӧтны.
81 Тэнчит мездӧтӧ́мтӧ видзчисикӧ
менам лолӧ ӧдва ӧшшӧ.
Но ме Тэнат кыв вылӧ надейтча.
82 Тэнат кӧсйисьӧ́млісь керсьӧ́мсӧ видзчисикӧ
менам синнэзӧ мыдзисӧ.
Ме висьталі:
«Кӧр ни Тэ менчим сьӧлӧмӧс бурмӧтан?»
83 Ме лои кыдз тшынын шыгыртчӧм
*д кучик доз,
но туйдӧтӧ́мметӧ Тэнчит эг вунӧт.
84 Дыр я видзчисьны меным, Тэнат раблӧ?
Кӧр чулӧтан судсӧ менӧ вашӧтліссез вылын?
85 Асьнысӧ вылына лэбтіссез
меным яма гарйисӧ.
Нiя озӧ керӧ Туйдӧ́тыт сьӧрті.
86 Тэнат быдӧс тшӧктӧ́ммет ─ быльӧсь.
Нем понда ме сьӧрын вӧтлісьӧны.
Отсав меным!
87 Эта му вылісь менӧ мӧдісӧ мӧдӧрӧ ыстыны,
но ме Тэнат тшӧктӧ́ммезiсь эг кеж.
88 Аслат небыт сьӧлӧмсянь видз менчим ола́нӧс,
и ме понда овны
Тэнат ӧмись петӧм висьталӧ́ммез сьӧрті.
89 Дӧсвидзисьӧ, Тэнат кылыт пырся-пыр олӧ,
сійӧ Тэ вынсьӧтін енӧжас.
90 Тэнат быльыт айезсянь челядьлӧ вуджӧ.
Тэ сувтӧтін мусӧ, и сія сулалӧ.
91 Тэнат висьталӧ́м сьӧрті ӧнӧдз быдӧс сулалӧ.
Быдӧс аркмӧтӧ́мыс Тэныт кысъялӧ.
92 Эз бы вӧв Тэнат Туйдӧ́тыт меным
сьӧлӧм бурмӧта́нӧн,
сэк умӧльыс локтӧ́м коста ме кулі бы.
93 Тэнчит тшӧктӧ́мметӧ ме некӧр ог вунӧт.
Нiйӧн Тэ менчим ола́нӧс вильмӧтан.
94 Ме ─ Тэнат. Мезды менӧ!
Ме эд вынсьӧтча овны Тэнат тшӧктӧ́ммез сьӧрті.
95 Ентӧг оліссез менӧ вӧджжӧны
*е,
медбы вийны.
А ме буржыка вынсьӧтча вежӧртны
Тэнчит висьталӧ́мметӧ.
96 Ме адзза,
му вылісьыслӧн быдӧслӧн эм грань,
а Тэнат тшӧктӧ́ммет пырся-пыр вынаӧсь,
нылӧн граньыс абу.
97 Тэнчит Туйдӧ́ттӧ ме ӧддьӧн радейта!
Кузь лун сійӧ юрам бергӧтла.
98 Тэнат тшӧктӧ́ммет пыр мекӧт.
Аслат тшӧктӧ́ммезӧн Тэ менӧ керин мывкыдажыкӧн
ме вылӧ лэбтісьӧм йӧзся.
99 Тэнчит висьталӧ́мметӧ ме юрам бергӧтла,
сійӧн лои мывкыдажык менӧ быд велӧтісься.
100 Ме Тэнат тшӧктӧ́ммез сьӧрті ола,
сійӧн пӧриссезся унажык тӧда.
101 Ме ассим коккезӧс быд лёк кера́н туйись видза,
медбы Тэнат кыв сьӧрті овны.
102 Тэнат веськыта судитӧ́ммезiсь ме ог ылӧтчы,
ны пыр эд Тэ менӧ велӧтан.
103 Кытшӧм чӧскытӧсь Тэнат кыввет!
Менам ӧмлӧ нiя мася чӧскытжыкӧсь.
104 Тэнат тшӧктӧ́ммет менӧ вежӧрсьӧтісӧ,
сійӧн бӧбӧтча́н туйез меным син вылӧ озӧ колӧ.
105 Тэнат Кылыт ─ менам коккезлӧ югдӧта́н.
Сія менчим туйӧс югдӧтӧ.
106 Ме кыв сеті:
понда овны Тэнат веськыта висьталӧ́ммет сьӧрті.
Ме сідз и кера.
107 Дӧсвидзисьӧ,
ме ӧддьӧн песся-мырся.
Кер Аслат кыв сьӧрті,
вынсьӧт менӧ одзлань овны!
108 Дӧсвидзисьӧ,
сьӧлӧмсянь петӧм ошкӧ́мӧс
босьт езъяла́н козин моз.
Аслат тшӧктӧ́ммезӧ велӧт менӧ.
109 Ме пыр кула́н дорын,
но ме Тэнчит Туйдӧ́ттӧ ог вунӧтлы.
110 Ентӧг оліссез меным кыйся́н сувтӧтісӧ,
но ме Тэнат тшӧктӧ́ммезiсь эг кеж мӧдӧрӧ.
111 Тэнчит висьталӧ́мметӧ ме босьті пыр кежӧ,
кыдз меным лӧсьӧтӧм пай.
Нiя менчим сьӧлӧмӧс гажӧтӧны.
112 Тэнчит туйдӧтӧ́мметӧ ме сьӧлӧмам пырті,
медбы медбӧрӧдз пыр ны сьӧрті овны.
113 Ылӧтліссез меным син вылӧ озӧ колӧ,
а Тэнчит Туйдӧ́ттӧ радейта.
114 Тэ менам вевттисянӧ, менам сайӧвтча́нӧ.
Ме Тэнат кыв вылӧ надейтча.
115 Туйдӧ́ттӧг оліссез
*ж, вешшӧ ме дынiсь!
Ме понда овны Енлӧн тшӧктӧ́ммез сьӧрті.
116 Аслат кыв сьӧрті менӧ вынсьӧт,
и ме понда овны.
Эн сет меным локны отир сералӧ́мӧдз
Тэ вылӧ надейтчӧ́мӧсянь.
117 Видзышт менӧ, и ме мезма.
Пыр понда бура видзӧтны Тэнчит туйдӧтӧ́мметӧ.
118 Кӧдна Тэнат туйдӧтӧ́ммезісь кежисӧ мӧдӧрӧ,
Тэ нiйӧ быдӧннысӧ чапкан.
Нылӧн ылӧтлӧмӧн керӧ́ммезныс ─ бӧбӧтчӧ́м.
119 Ентӧг оліссесӧ быдӧннысӧ
му вывсис Тэ ёг моз чышкан.
Эта понда ме Тэнчит тшӧктӧ́мметӧ радейта.
120 Тэись полӧ́мсянь менам быдсӧн вывты́рӧ зэгсьӧ.
Тэнат суддэзiсь ме пола.
121 Ме керлі Тэнат веськыта судитӧ́м,
веськыта висьталӧ́м сьӧрті.
Эн сет менӧ дзескӧтліссез киӧ!
122 Дорйы менӧ, Ассит рабтӧ,
медбы меным бур вӧлі.
Асьнысӧ лэбтіссезлӧ эн сет менӧ дзескӧтлыны.
123 Тэнчит мездӧтӧ́мтӧ да дорья́н кывтӧ видзчисикӧ
менам синнэзӧ ныжмисӧ.
124 Аслат раблӧ отсав небыт сьӧлӧмсянь,
Аслат туйдӧтӧ́ммезӧ велӧт менӧ.
125 Ме Тэнат раб.
Мывкыдсьӧт менӧ,
медбы ме вежӧрті Тэнчит висьталӧ́мметӧ.
126 Дӧсвидзисьӧ,
локтіс кад Тэныт мыйкӧ керны!
Тэнчит Туйдӧ́ттӧ эд разисӧ!
127 А ме Тэнчит тшӧктӧ́мметӧ радейта
зарнися буржыка,
нельки сӧстӧм зарнися.
128 Тэнчит быдӧс тшӧктӧ́мметӧ
лыддя веськыта висьталӧ́ммезӧн.
Бӧбӧтча́н туй вылӧ синӧн ог вермы видзӧтны.
129 Тэнат висьталӧ́ммезсянь диво кутӧ,
сійӧн ме видза нiйӧ сьӧлӧмам.
130 Тэнат кылыт мортыслӧ оссьӧ,
велӧттӧм отирсӧ сія югдӧтӧ, вежӧрсьӧтӧ.
131 Ме ӧмӧс осьта да ышловзися.
Кыдз ӧддьӧн горш косьмӧ́м коста юа́н колӧ,
сідз меным колӧны Тэнат тшӧктӧ́ммет.
Ошкӧ́м.
132 Видзӧт ме вылӧ
да небыт сьӧлӧмсянь отсав меным,
кыдз керан Тэнчит нимтӧ радейтіссезлӧ.
133 Аслат кылӧн вынсьӧт менчим оськӧввезӧс,
эн сет некытшӧм умӧль керӧ́млӧ менӧ вермыны.
134 Мезды менӧ отирыс дзескӧтӧ́мись,
и ме понда овны Тэнат тшӧктӧ́ммез сьӧрті.
135 Аслат югьяла́н чужӧ́мӧн рабтӧ югдӧт.
Велӧт менӧ Аслат туйдӧтӧ́ммезӧ.
136 Синнэзсим ваыс шорӧн котӧртӧ,
мыля отирыс озӧ олӧ Тэнат Туйдӧ́т сьӧрті.
137 Дӧсвидзисьӧ, Тэ веськыта Керись,
Тэ и суддэтӧ веськыта чулӧтан.
138 Тэ сетін миянлӧ тшӧктӧ́ммез,
нія веськытӧсь да быдӧсын быльӧсь.
139 Ме вылӧ лэбтісьӧммез вунӧтісӧ Тэнчит кывветӧ,
сійӧн лӧгувьям сьӧлӧмӧ сотчӧ.
140 Тэнат Кылыт сӧстӧмся-сӧстӧм.
Тэнат рабыт сійӧ ӧддьӧн радейтӧ.
141 Ме мортыс учӧт,
менӧ абутӧм туйӧ пуктӧны,
но Тэнчит тшӧктӧ́мметӧ ог вунӧтлы.
142 Тэнат веськыта керӧ́мыт ─ пыр кежӧ.
Тэнат Туйдӧ́тыт ─ быльыс.
143 Тӧждісьӧ́м-шогсьӧ́мыс менӧ вӧтіс.
Дзир Тэнат тшӧктӧ́ммезӧн сьӧлӧмӧс бурмӧта.
144 Тэнат висьталӧ́ммет пыр веськытӧсь.
Вежӧрсьӧт менӧ, медбы ме верми овны.
145 Сьӧлӧмсянь кеймися:
Дӧсвидзисьӧ, кыв менӧ!
И ме понда овны Тэнат туйдӧтӧ́ммез сьӧрті.
146 Кора Тэнӧ, мезды менӧ!
И ме понда овны Тэнат висьталӧ́ммез сьӧрті.
147 Шонді петтӧдз ме Тэныт горӧн кеймися,
Тэнат кыв вылӧ надейтча.
148 Асылыс кӧр и локтӧ,
а менам синнэзӧ осьтаӧсь ни,
медбы Тэнчит кывтӧ буржыка тӧдмавны-вежӧртны.
149 Дӧсвидзисьӧ, кыв менчим шыӧс!
Тэ эд небыт сьӧлӧма.
Видз менчим ола́нӧс!
Тэ эд веськыта Судитісь.
150 Ме дынӧ сибӧтчисӧ отир,
кӧдна ылӧтлӧмӧн меным умӧльсӧ керны лӧсьӧтчисӧ.
Ылӧ нiя Тэнат Туйдӧ́тісь вешшӧмась.
151 Дӧсвидзисьӧ, Тэ матын ме дынсянь.
Тэнат быдӧс тшӧктӧ́ммет быльӧсь.
152 Тэнат тшӧктӧ́ммез йылісь ме важынсянь тӧда:
Тэ нiйӧ сетін пыр кежӧ.
153 Видзӧт менам пессьӧ́м-мырсьӧ́м вылӧ
да мезды менӧ!
Ме эд ог вунӧтлы Тэнчит Туйдӧ́ттӧ.
154 Сувт ме дор да дорйы менӧ.
Кер Аслат кыв сьӧрті, видз менчим ола́нӧс.
155 Ентӧг оліссез озӧ олӧ Тэнат тшӧктӧ́ммез сьӧрті,
сійӧн нiя ылынӧсь мезмӧ́мсис.
156 Дӧсвидзисьӧ,
небыт сьӧлӧмсянь керӧ́мыт Тэнат лыдтӧм.
Видз менчим ола́нӧс, Тэ эд веськыта Судитісь.
157 Ме вылӧ лэбтісьӧммес
да менӧ вашӧтліссес ӧддьӧн унаӧсь,
но Тэнат висьталӧ́ммезiсь ме мӧдӧрӧ ог мун.
158 Тэ дынiсь янсӧтчӧммез вылӧ видзӧтікӧ
менӧ вуктӧтӧ,
нiя эд озӧ олӧ Тэнат кыввез сьӧрті.
159 Видзӧт, кыдз ме радейта Тэнчит тшӧктӧ́мметӧ.
Дӧсвидзисьӧ, видз менчим ола́нӧс,
Тэ эд небыт сьӧлӧма.
160 Тэнат кылыт быль вылын видзсьӧ,
Тэнат веськыта судитӧ́мыт вына пырся-пыр.
161 Юраліссез нем понда менӧ вашӧтӧны,
но менам сьӧлӧмӧ Тэнат кылісь полӧ.
162 Ме гажӧтча Тэнат кывсянь,
жыв адззи ыджыт дона пажыть.
163 Видзӧтны ог вермы бӧбӧтчӧ́м вылӧ,
сія вуктӧтӧ́мӧдз вайӧтӧ.
А Тэнчит Туйдӧ́ттӧ радейта.
164 Сизимись луннас ошка Тэнӧ
веськыта чулӧтӧм суддэт понда.
165 Тэнчит Туйдӧ́ттӧ радейтіссезлӧн
сьӧлӧмсиныс лӧньыс оз чулавлы.
Нiя некӧр озӧ падмӧ.
166 Дӧсвидзисьӧ,
ме надейтча Тэнат мездӧтӧ́м вылӧ,
ола Тэнат тшӧктӧ́ммез сьӧрті.
167 Тэнчит висьталӧ́мметӧ ме сьӧлӧмам видза,
нiйӧ ёна радейта.
168 Ме ола Тэнат висьталӧ́ммез да тшӧктӧ́ммез сьӧрті.
Менам туйезӧ быдӧс Тэнат син одзын.
169 Тэ дынӧдз ась локтӧ менам горӧн кеймисьӧ́мӧ.
Дӧсвидзисьӧ, Аслат кыв сьӧрті менӧ вежӧрсьӧт.
170 Тэ дынӧдз ась локтӧ менам кеймисьӧ́мӧ.
Аслат кыв сьӧрті мезды менӧ.
171 Менам ӧмись пондас петны ошкӧ́мыс,
кӧр Тэ велӧтан менӧ Аслат туйдӧтӧ́ммезӧ.
172 Ме аслам ӧмӧн висьтася Тэнчит кывтӧ.
Тэнат тшӧктӧ́ммет эд быдӧс веськытӧсь.
173 Тэнат киыт ась лоӧ меным отсӧт сетісьӧн,
ме эд Тэнчит тшӧктӧ́мметӧ бӧрйи.
174 Дӧсвидзисьӧ,
ме ӧддьӧн видзчися Тэнчит мездӧтӧ́мтӧ.
Тэнат Туйдӧ́тыт ─ менам сьӧлӧм бурмӧта́нӧ.
175 Ме понда овны да ошкыны Тэнӧ.
Тэнат веськыта чулӧтӧм суддэт ась отсалӧны меным.
176 Ме ӧшӧм баля моз ылалі.
Адззы Ассит рабтӧ,
Тэнчит тшӧктӧ́мметӧ ме эд эг вунӧт.
Ошкӧ́м.
*а 118:51 бӧбись ─ неистово
*б 118:62 буркы́втны ─ благодарить
*в 118:72 зарни ─ золото
*г 118:72 эзы́сь ─ серебро
*д 118:83 шыгыртчӧм ─ покоробившийся
*е 118:95 вӧджжыны ─ подкараулить, заниматься слежкой
*ж 118:115 Туйдӧ́ттӧг олісь ─ беззаконник
Глава 118
