Bible Stories
Выбрать язык
Choose Old Testament Story
Choose New Testament Story
ПЕТРЕН ИОАННЭЗ ПЫТСЭТЭ ВОРСАЛО
Петр чут пиез бурмытэм бере, ог вить сюрс адями Иисус Христослы оскыны кутскиз. Нош священникъёс но кузёйыръёс йырзы курен, Петрен Иоаннэз кутыса пытсэтэ ворсаны косӥзы. Мукетаз нуналэ Иерусалиме кузёйыръёс, тӧроос, книга тодӥсьёс, архиерейёс люкаськизы. Апостолъёсты татчы вайыса, калык шоры султытӥзы но чут пиез бурмытэмзы сярысь юазы: «Кыӵе кужымен, кинлэн нимыныз тае тӥ лэсьтӥды?» Соку Петр, Святой Духен тыр луыса, соослы шуиз: «Калыклэн кивалтӥсьёсыз, Израильлэн тӧроосыз! Ваньдылы тӥледлы, быдэс Израиль калыклы тодмо мед луоз шуыса верасько: Назаретысь Иисус Христослэн, Кинэ тӥ кортӵогады но Кинэ Инмар кулэмысь улӟытыса султытӥз, Солэн нимыныз та висись тӥ азе висисьтэм карыса султытэмын».
Апостолъёсын огазьын сылӥсь бурмытэм пиез адӟыса, соослы пумит номыр но вераны ӧз быгатэ ни. Апостолъёсты синедрионысь огдырлы потыны косӥзы. Асьсэ куспын кенешем беразы шуизы: «Та адямиосын асьмелы мар кароно? Уго Иерусалимын вань улӥсьёслы тодмо, шарае потӥз соосын лэсьтэм паймымон уж, нош асьмеос со ӧй вал шуыны ум быгатӥське. Калык пӧлы та эшшо но медаз вӧлмы шуыса, соосты кышкатоме, Иисуслэн нимыз сярысь ноку но, нокинлы но адямиослы вераны ум лэзе».
Апостолъёсты ӧтьытыса, Иисуслэн нимыз сярысь вераны но, дышетыны но чик ӧз лэзе ни. Нош Петрен Иоанн соослы ответ сётыса шуизы: «Асьтэос судить каре: Инмар азьын шонера луоз, Инмарез сярысь, тӥледыз золгес кылзӥськыны? Ми ум быгатӥське адӟеммес но, кылэммес но вератэк улыны». Нош соос апостолъёсты эшшо огпол кышкатӥзы на. Калыкен сэрен, вӧсь карыны луонлык шедьтытэк, соосты лэзизы, малы ке шуоно, та учыр бере вань калык Инмарез данъяса улӥз.
Апостолъёслэн ужъёссы 4:1-21
450 
