Bible Stories
Выбрать язык
Choose Old Testament Story
Choose New Testament Story
ВИНОГРАД БУДЭТӤСЬЁС СЯРЫСЬ МАДЁН
Архиерейёслы, фарисейёслы Иисус мадён вераз, отын Со возьматӥз та адямиослэсь кыӵе мылкыдын Со шоры учкемзэс.
«Вылэм одӥг юрт кузё. Со виноградпудъёс мерттэм но сое кенерен котыртэм. Отчы вина виятон гу гудӟем, каланча пуктэм, бакчазэ виноград будэтӥсьёс кие сётэм но ачиз кошкем. Емыш бичан дыр вуэм бере, со ляльчиоссэ виноград будэтӥсьёс доры емышсэ вайыны лэзем. Виноград будэтӥсьёс ляльчиоссэ кутылӥллям но кудзэ тышкаллям, кудзэ вииллям, кудзэ изэн лэзьяса быдтӥллям. Со нош ик ыстэм мукетъёссэ, азьло сярысь троссэгес ляльчиоссэ; но соосты но озьы ик кариллям. Пумаз ини со аслэсьтыз пизэ соос доры ыстэм но шуэм: “Возьдаськозы мынам пиелэсь“. Нош виноград будэтӥсьёс, пизэ адӟыса, ог-огзылы шуиллям: “Та атай юртлы кузёе кылёно; ойдолэ, мыныса сое виёме но солы кылёно ваньбурез киултоме“. Сое кутӥллям но виноград бакча сьӧры поттыса вииллям. Озьы, виноград бакчалэн кузёез лыктӥз ке, мар кароз со та виноград будэтӥсьёсын?» Солы шуо: «Та лек муртъёсты лек курадӟытыса быдтоз, нош виноград бакчазэ мукет виноград будэтӥсьёслы сётоз, кудъёсыз ас дыраз солы емыш сётозы». Иисус соослы шуиз: «Гожтэмысь ноку но лыдӟемды ӧвӧл шат: “Корка пуктӥсьёслэн кулэтэм карыса куштэм иззы корка сэрег улэ инъет йыр луыса пуксем: та – Кузё-Инмарлэсь, паймымон луэ асьмелэн син азямы“? Соин ик тӥледлы верасько: тӥ дорысь Инмар Эксэйлык басьтӥськоз но солэсь емышсэ ваись калыклы сётӥськоз. Кин та из вылэ усёз – пазьгиськоз, нош кин вылэ со усёз – паньгатоз».
Иисуслэсь та мадёнъёссэ кылыса, архиерейёс но фарисейёс валазы, соос сярысь Со вера шуыса. Сое кутыны тыршизы, но калыклэсь курдазы, малы ке шуоно, Сое, пророк шуыса, сӥлы каро вал.
Матфейлэсь Ӟеч Ивор 21:33-46
394 
