Bible Stories
Выбрать язык
Choose Old Testament Story
Choose New Testament Story
ВИТЬ СЮРС МУРТЛЭСЬ ВИТЬ НЯНЕН КӦТСЭ ТЫРОН
Иисус Аслаз дышетскисьёсыныз ӵош, Галилей зарезь вамен потыса, Тивериада ёросэ вуиз. Солэсь висисьёсын паймымон ужъёс лэсьтэмзэ адӟыса, Со бӧрсьын трос калык ветлӥз.
Иисус гурезь йылэ тубиз но отын Аслаз дышетскисьёсыныз огазьын пукиз. Матэ вуэ вал ини Быдӟымнунал (Пасха), иудейёслэн праздниксы. Иисус учкиз но, Со доры лыктӥсь трос калыкез адӟыса, Филипплы шуиз: «Таосты сюдыны кытысь нянь басьтомы?» Нош та кылъёсты Со Филиппез эскерон понна вераз, уго мар лэсьтыны ӧдъямзэ Ачиз тодэ вал. Филипп Солы шуиз: «Котькудӥзлы пичи ке но кусок шедён понна, кык сю динарий*а тыр нянь соослы тырмыт уз луы». Дышетскисьёсыз пӧлысь одӥгез, Симон Петрлэн выныз Андрей, Солы шуиз: «Татын одӥг пияшлэн вить йыды нянез но кык чорыгез вань; но мар со тамында калык понна?» Иисус шуиз: «Косэлэ соосты пуксьылыны». Та интыын нап турынэз вал. Озьы, ог вить сюрс мында калык пуксиз.
Иисус нянь кутыса тау кариз но дышетскисьёсызлы сётъяз, нош дышетскисьёсыз пукись муртъёслы сётъязы, чорыгез но люкылӥзы, кинлы кӧня кулэ вал. Кӧтсы тырем бере, Со дышетскисьёсызлы шуиз: «Номыр но арам медаз луы, бичалэ кылем юдэсъёсты». Сиськемъёс бере вить йыды няньлэсь кылем юдэсъёссэ бичаса, дас кык кудыез тырмытӥзы. Соку Иисуслэсь паймымон уж лэсьтэмзэ адӟем адямиос шуизы: «Зэмзэ ик Та Со Пророк, Кудӥз дунне вылэ лыктыны кулэ».
Иоаннлэсь Ӟеч Ивор 6:3-14
*а Динарий – вашкала Рим кунысь азвесь коньдон (медъяськыса ужасьлэн одӥг нуналлы уждунэз).
352 
