Bible Stories
Выбрать язык
Choose Old Testament Story
Choose New Testament Story
ИОИЛЬ ПРОРОК
Иоиль пророклэн улэм аръёсыз тодмо ӧвӧл, но сое Иудаын нырысь улэм пророкъёс пӧлы пырто. Со тодытыса вералляз Кузё-Инмарлэн азьпалан лыктон нуналыз сярысь:
«Э, кыӵе нунал! Та нунал, Кузё-Инмарлэн нуналыз, матын: Дунне Кутӥсь Инмарлэн куашкатонэз кадь со лыктоз. Сӥон гурезьын бургы-гумыдэс пельтэлэ, кышкытлык лыктэ шуыса, святой гурезям вералэ. Музъем вылын вань улӥсьёс, куалекъялэ, уго Кузё-Инмарлэн нуналыз вуэ, со матын ини. Собере Аслэсьтым Духме вань лулмугоръёс вылэ кисьто, соку тӥляд пиосты, тӥляд нылъёсты азьпалзэ тодытыса вералозы; тӥляд пересьёсты уйвӧтъёс пыр визьмамын луозы, егит пиосты адӟонъёс адӟылозы. Ляльчи пиосы, ляльчи нылъёсы вылэ со нуналъёсы Аслэсьтым Духме кисьто. Инмын но, музъем вылын но паймымон тодметъёс возьмато: вир но тыл, ӵын юбоос. Кузё-Инмарлэн быдӟым, кышкыт нуналэзлэн вуэмезлэсь азьло, шунды пеймытлы пӧрмоз, толэзь – вирлы. Кузё-Инмарлы вазиськисьёс ваньзы утиськозы, уго, кызьы Кузё-Инмар вераз, Сӥонын но Иерусалимын утиськон луоз, кинэ Кузё-Инмар ӧтёз, ваньзы утиськозы». Трос сю аръёс ортчем бере, Петр апостол калыклы Кузё-Инмар Иисус Христос сярысь тодытыкуз, та кылъёсты вераськоназ кутӥз.
Израильлэн пыд йылаз султонэз сярысь но Иоиль тодытыса вераз: «Иудаез но Иерусалимез пленысь берыктэм берам, вань калыкъёсты Мон люкаса Иосафат нёжалэ ваё но, Мынэсьтым калыкме, Мынэсьтым люкетме, Израилез, калыкъёс пӧлы пазьгемзы понна, музъемме люкемзы понна, калыке пумысен пус чӧлтылэмзы понна, соослы суд лэсьто. Сӥонысен Кузё-Инмар гудыртоз, Иерусалимысен куараез кылӥськоз; ин но музъем зуркалозы, нош Кузё-Инмар Ас калыксэ утёз, Израиль пиос понна со утиськон инты луоз. Соку тӥ тододы, Мон Сӥонын, Аслам святой гурезям улӥсь тӥляд Инмарды Кузё-Инмар луисько шуыса. Иерусалим святой город шуыса нимаськоз».
Иоиль пророклэн книгаез
272 
