Bible Stories
Выбрать язык
Choose Old Testament Story
Choose New Testament Story
ВАВИЛОН ИУДЕЯЕЗ КИУЛТЭ
Кузё-Инмарлэн Иеремия пророк пыр верамез ваньмыз быдэсмиз: вавилон ожгарчиос иудейёсты пленэ нуизы. Та шугадӟон соин соос доры вуиз: азьвыл ик соос урод улэмзы понна алэмын ке но вал, нош соос Инмар азьын ӧбкельыса сьӧлыкъёссылэсь ӧз куштӥське, сульдэръёслы йыбыртъянлэсь, урод ужъёслэсь, сьӧлыклэсь ӧз палэнске. Лымшор Иуда кунын улӥсьёс адӟизы ке но Кузё-Инмарлэсь Уйпал Израиль кунэз вӧсь каремзэ, соос ялан законлы пумит ужъёс лэсьтыса улӥзы на. Соку Кузё-Инмар таизэ но, Уйпал Израиль кунэз сямен ик, куашкатыны малпаз, соос вылэ вавилон ожгарчиосты лэзиз. Иоакимлэн Иехония пиез Иерусалимысь эксэй пуконэ пуксьыку, солы дас тямыс арес вал. Со атаез кадь ик улӥз, Кузё-Инмарлы ярантэм ужъёс лэсьтыса. Со эксэй луэм бере, куинетӥ толэзяз, Иерусалим котыре вуизы Вавилон эксэйлэн, Навуходоносорлэн, медоосыз, соос городэз котыртӥзы. Со вакытэ татчы ачиз Навуходоносор эксэй вуиз. Иудалэн Иехония эксэез анаеныз ӵош, медоосыныз, эксэй юртын ужась-тыршисьёсын ӵош Вавилонысь вуэм эксэй доры потыса, пленэ сётӥськизы. Кызьы Кузё-Инмар азьвыл ик алыса вераз вал, озьы ик луиз: Иерусалимысь Кузё-Инмарлэн храмысьтыз, эксэй юртысь вань узырлыкез Навуходоносор сьӧраз нуиз. Израильлэн Соломон эксэезлэсь Кузё-Инмарлэн храмезлы лэсьтэм вань зарни сосудъёсты тӥяз. Ожгарчиос Иерусалимысь вань улӥсьёсты – кивалтӥсьёсты, кышкасьтэм ожгарчиосты, лэсьтӥськисьёсты, дуриськисьёсты – улляса поттӥзы но Вавилонэ улыны нуизы. Уллямъёс пӧлын дас сюрс мурт вал. Куанер музъем ужасьёс сяна, Иудае нокин но ӧз ни кыльы.
Вавилон эксэй Иехония интые иудейёслы солэсь агайзэ Матфанияез эксэе пуктӥз но солэсь нимзэ воштӥз – Седекия кариз. Эксэе пуксьыкуз, Седекиялы кызь одӥг арес вал. Со дас одӥг ар ӵоже Иерусалимын эксэй пуконын пукиз. Иоаким кадь ик, Седекия Кузё-Инмар азьын ярантэм ужъёс лэсьтыса улӥз. Иерусалимен Иудалы Кузё-Инмарлэн сокем вожез потӥз – соосты кулэтэм кариз.
4 Эксэйлык 24:8-20
226 
