Bible Stories
Выбрать язык
Choose Old Testament Story
Choose New Testament Story
ВУЭН, ВӦЕН ЛЭСЬТЭМ ПАЙМЫМОН УЖ
Инмар Елисеез быдӟым пророк кариз, со пыр трос паймымон ужъёс лэсьтӥз. Одӥг пол, Иерихонысен со доры татын улӥсьёс лыктыса шуизы: «Тани, та город умой интые пуксемын, но татын вуэз умой ӧвӧл, соин ик музъем уг удалты». Соку Елисей выль сюмык вайыны косӥз, отчы ӧжытак сылал понытӥз. Сылалэн сюмык сётэмзы бере, со ошмес доры лыктӥз но отчы сылал кисьтыса шуиз: «Кузё-Инмарлэн кылызъя, ву юыны ярамон луоз». Табере ошмесысь ву юыны ярамон луиз.
Мукет пол Елисей доры бӧрдыса палкышно лыктӥз но аслаз кайгуэз сярысь солы вераз: картэз кулэм бере, со тыриськонзэ тырыны быгатымтэ, со понна пунэмен сётэм мурт солэсь кыксэ ик пиоссэ аслыз ляльчи карыны лыктэм. Кайгуэ сюрем муртлы юрттон понна, Елисей солэсь юаз: «Вера, маид вань дорад?» Кышномурт шуиз: «Кувшин вӧйы сяна, номыри но ӧвӧл». Пророк солы шуиз: «Вань бускельёсыд доры мын но соослэсь тырттэм сосудъёссэс кур. Собере ӧстэ пытса но пиосыныд ӵош кувшинысьтыд вӧйдэ вань тырттэм сосудъёсы лэзья, пачыл сосудъёстэ пуктыса кельты».
Кышномурт ваньзэ Елисей косэмъя лэсьтӥз. Бускельёсызлэсь пӧртэм посудазэс басьтӥз, корка пырон ӧссэ пытсаз но пиосыныз ӵош кувшинысьтыз тырттэм сосудъёсы вӧй лэзьылыны кутскиз. Трос кувшинъёсты тырмытэм бераз адӟиз: пичи кувшинысьтыз вӧйыз лэзьяса-лэзьяса но уг быры. Пиезлэсь эшшо сосуд куриз, но соиз шуиз: «Сосудъёс ӧвӧл ини». Соку палкышно адӟиз: кувшинысьтыз вӧйыз бырем.
Вань люкам сосудъёсты тырмытэм бераз, кышномурт, Елисей доры лыктыса, та паймымон уж сярысь вераз. Елисей солы шуиз: «Мын, вӧйдэ вуза но пунэмъёстэ тыр, нош кылеменыз коньдонэныд пиосыныд валче улыны быгатоды».
4 Эксэйлык 2:19-22; 4:1-7
198 
