Bible Stories
Выбрать язык
Choose Old Testament Story
Choose New Testament Story
РУФЕН НОЕМИНЬ
Израиль калыкен судьяос кивалтон вакытъёсы Иудей музъемын сютэм ар луиз. Соку Вифлеемысь израиль воргорон кышноеныз но кык пиосыныз ӵош моавит калыклэн музъемаз улыны интыяськиз. Со пиосмуртлэн нимыз Елимелех, кышноезлэн – Ноеминь, нош пиоссылэн нимъёссы Махлон но Хилеон вал. Елимелех кулӥз но солэн кышноез, Ноеминь, кык пиосыныз кылиз. Кыксы но соос моавит нылъёсты кышно басьтӥзы, огезлэн нимыз Орфа, мукетызлэн – Руфь. Соос ог дас ар пала валче улӥзы, нош бӧрысь Ноеминьлэн кыкез ик пиосыз, Махлон но Хилеон, кулӥзы. Ноеминь огназ кылиз. Соку со малпаз вордскем Иудей музъемаз берытскыны, уго со кылӥз, отын сютэм уг ни уло, Инмар калыклы удалтэм юнянь сётэм шуыса.
Вордскем шаераз потыку, солэн сьӧраз кыкез ик кенъёсыз мынӥзы. Сюрес вылысен Ноеминь кенъёсызлы шуиз: «Анай-атайёсты доры берытске. Кузё-Инмар тӥледлы мед юрттоз, пиосме но, монэ но гажаса-яратыса улэмды понна. Кузё-Инмар тӥледлы выль карттылэн юртаз улыны сэрег мед сётоз». Ноеминь кыкназэс ик чупаз, нош кенъёсыз бӧрдыса шуизы: «Ум берытске, тонэн ӵош тынад калыкед доры мыномы». Ноеминь сюлмысьтыз алыса шуиз: «Мусо кенъёсы, озьы уг яра, тӥ мыным жаль потӥськоды, уго Кузё-Инмар мон доры кайгу лэзе». Кенъёс нош ик бӧрдыны кутскизы, соку Орфа анаенызы люкиськиз, нош Руфь Ноеминь борды ик кылиз. Руфь шуиз: «Тонэ мед кельтом но дорам мед берытском шуыса, монэ эн либаты. Кытчы гинэ тон уд мыны, мон тон сьӧры мыно, кытчы улыны интыяськод, мон но отчы ик улыны кылё. Тынэсьтыд калыктэ аслам каро, тынад Инмаред мынам Инмаре луоз. Кытчы тон кулод, отчы ик мон но куло, отчы ик монэ ватозы. Котькыӵе куректон-кайгуос мон доры Кузё-Инмар лэзиз ке но, кулон гинэ монэ тонэн люкыны быгатоз». Руфьлэсь юн мылкыдзэ шӧдыса, Ноеминь сое либатэмысь дугдӥз.
Руфь 1:1-17
144 
