Bible Stories
Выбрать язык
Choose Old Testament Story
Choose New Testament Story
ХАНААН МУЗЪЕМЕ ЧАКЛАСЬКЫНЫ МЫНЭМЪЁС
Израиль калык Ханаан музъемлэн матаз вуиз. Отысен Моисей израиль калык пӧлысь дас кык кузёйыръёсты со музъеме тазьы шуыса келяз: «Та лымшор кунэ мынэ но учке: кыӵе отын музъемез, кыӵе калык отын улэ, кужмо-а, ляб-а со. Тырше со музъемын будӥсь емышъёсты вайыны». Ньыльдон нунал ӵоже соос Ханаан музъемез эскерыса-чакласа ветлӥзы. Бертыкузы пӧртэм будосъёслэсь емышъёссэс ваизы; виноград пурызы сокем бадӟым вал – кык ӵошен, боды вылэ шедьытыса, пельпум вылазы ваизы. Чакласькыны ветлэмъёс веразы: «Зэмзэ но со “йӧлын, чечыен бызись“ музъем, но отын бадӟымесь, юнматэм городъёсын кужмо калык улэ. Со калык асьмелэсь кужмогес, соин ик асьмеос соосын ожмаськыны ум быгатэ».
Чакласькисьёс пӧлысь кыкез гинэ, Навин Иисус но Халев, Кузё-Инмар азьын оскиськымонэсь вал, соослэн калыкез курдатэмзы ӧз поты. Халев шуиз: «Асьмеос со музъемез киултыны кулэ, сое ки уламы басьтыны быгатомы». Нош калыклэн солэсь верамзэ кылэмез ӧз поты. Ваньзы бӧрдыны, Моисеен Ааронэз «малы милемыз Египетысь поттӥд?» шуыса пыкылыны кутскизы. Соку Навин Иисус но Халев дӥсянзэс ӵажак кесьыса шуизы: «Кузё-Инмар асьмемыз гажа-жаля ке, Со асьмеды со музъеме пыртоз но йӧлын чечыен бызись музъемез асьмелы сётоз. Кузё-Инмарлы пумит гинэ эн кариське, Со – асьмелэн юрттӥсьмы». Моисеен Аарон калыклэсь пумитъяськемзэ кылыса, ӝоже усизы, ымныр вылазы выдӥзы. Соослы секыт вал калыклэсь йӧнтэм, вогъяськись луэмзэ адӟыны. Соку Кузё-Инмар Моисейлы шуиз: «Кема-а та калык Мынэсьтым вожме поттыса улоз? Соос пӧлын возьматъям паймымон тодметъёсылы, ужъёсылы оскытэк, кема-а соос Мыным оскытэк улозы?» Соку Кузё-Инмар шуиз: «Та калыкез быдтыны Мон дась, Моисей бордысь потто выль калык». Нош Моисей тэльмырыса Инмарез куриз та калыклэсь таӵе бадӟым сьӧлыксэ куштыны. Моисейлы луыса, Инмар нош ик бугыръяськись калыкез простить кариз, но шуиз, сьӧлыкъёссы понна Ханаан музъеме соос уз пыре, пырозы соослэн нылпиоссы гинэ. Кузё-Инмарлы оскиськымон луэмзы понна, отчы Навин Иисус но Халев гинэ улыны пырозы.
Моисейлэн 4-тӥ книгаез. Лыдпусъёс 13:1-34; 14:1-30
112 
