Bible Stories
Choose Language
Choose Old Testament Story
Choose New Testament Story
САВЛАНДИ АЗОРТЬ ЭВОНДАМАЦ
Мзярда Савла малаткшнесь Дамаск ошти, апак учт сонь валдоптозе менельста валдсь. Сон прась модать лангс и кульсь вайгяль, кона тейнза корхтась: «Савла! Савла! Мес панят эсон?» Савла мярьгсь: «Кият тон, азор?» Азорсь каршезонза: «Мон – Исуссь, кинь эса панцят. Стака тейть молемс оржа пяльть каршес». Эводезь и трнатозь Савла кизефтезе: «Азорозе! Мезе мярьгат тейне тиемс?» Азорсь мярьгсь тейнза: «Стяк и архт ошу, тондейть азови, мезе тиема».
Савла мархта моли ломаттне таяскодсть: вайгяль маряйхть, няемс киньге аф няихть. Мзярда Савла панжада сельмот стясь модать лангста, сон мезевок ашезе няе, улема, сокоргодсь вии валдть эзда. Мархтонзотне кядьбеда вятезь сонь Дамаску.
Дамаскса эрясь Кристосонь мельге молись – Анания. Азорсь эвондась тейнза и корхтай: «Анания! Архт ульцяв, конань лемоц Виде курня и Иудань кудста кизефтьсак Тарсосонь эряйть, лемоц Савла; сон тяни озонды. Вов няйсь эвоньксса аля, лемоц Анания, кона сась тейнза и путозень лангозонза кядензон сельмонзон панжевоманкса». Анания каршезонза: «Азорозе! Ламотнень эзда кулендень тя ломанть колга, мзяра кальдяв сон тись тонь иняруфненди Ерусалимса. Тясонга озксонь прявятихнень эзда максф тейнза азорксши сявондемс-сотнемс сембонь, кит тернесазь лемцень». Азорсь мярьгсь Ананиянди: «Архт, сон монь кочкаф кядьгозе, конань вельде кармай азондовома лемозе ломаньтналхнень, оцязорхнень, Израилень ломаттнень инголе. Мон няфтьса тейнза, мзяра сондейнза кирдема сталмода лемозень инкса».
Анания мольсь и сувась ся куду и, Савлань лангс кядень путомста, мярьгсь: «Савла седибялькс! Исус Азороньке, кона эвондакшнесь ки лангсот, кучемань тейть сельмотнень панжевоманкса и Иняру Ваймопожфта пяшкодевамксот». Эстокиге прокс кедь прась Савлань сельмостонза, и сон кармась няема. Тяда меле сон кстиндафтозе прянц и кармась азонкшнемонза синагогава: Исус – Шкайть Цёрац.
ТЕФНЕ 9:3-20
458 
