Bible Stories
Choose Language
Choose Old Testament Story
Choose New Testament Story
МЕНЕЛЕНЬ ОЦЯЗОРКСШИТЬ КОЛГА КОТА ВАЛВЕЛЯФКСТ
Весть Исус лиссь кудста, озась оцюведть трвас. Малазонза пуромсь лама ломань, сяс сон валгсь венчти и ушедсь тонафтомост ломаттнень:
«Менелень Оцязорксшись ломань лаца, кона видесь паксязонза цебярь видьме. Мзярда ломаттне удость, сась аерксоц, видесь тозерть ёткс сордише и тусь. Мзярда лиссь касыкссь и ёрдась пря, эста няевсь сордишеське. Уретне састь азорснонды, мярьгсть тейнза: «Азор! Кали аф цебярь видьме витцеть паксязт? Коста сявовсь сордишесь?" Сон мярьгсь тейст: "Аеркс ломань тиезе тянь". Уренза мярьгсть тейнза: "Мяльце, мольхтяма и кочксаськ?" Сон мярьгсь каршезост: "Аф, афолесть тарксе тозертьке сордишеть сязендемста. Катк касыхть марса нумати самс тявок, тонавок. Нумань карша мярьган нуйхненди: васенда кочкасть сордишетнень, сотнесть пулфс и плхтасть; ина тозерть урядасть утомозон".
Исус азондсь тейст лия валвеляфкс: "Менелень Оцязорксшись кода сяпикс*а видьме, конань ломанць видезе паксязонза. Сон хуш лия видьмотнень коряс ёмланя, аньцек касомстонза кепси лия сёрода вельф и арси шуфта лаца. Нльне нармоттне тиендихть тарадонзон потмос пизот".
Сон азондсь тейст нинге тяфтама валвеляфкст: "Менелень Оцязорксшись шапафтомня лаца, конанцты авась каясь колма ведаркат почф, и марнек шапакссь кеподсь...
Менелень Оцязорксшись нинге паксяса кяшф козяшинь кодяма, конань ломанць музе и меки кяшезе, кенярдембачк мольсь и мишендезе сембонц, мезец ульсь, и рамазе ся паксять.
Менелень Оцязорксшись нинге рамсиень кодяма, кона вешенди мазы ведьожнат. И вов сон няйсь фкя пяк питни ведьожна, тусь и мизе сембонц, мезец ульсь, и рамазе.
Менелень Оцязорксшись нинге калонь кундамань кодяма, конань афтозь оцюведьс и аньцек кодама кал ашезь пова эзонза. Мзярда афтомась пяшкодсь, таргазь трвати, озасть и цебярь калхнень кочказь кядьгос, кальдяфнень ёрязь шири. Тяфта ули тя пингть пестовок: сайхть ангелхне и видешистонь ломаттнень эзда явфтсазь кяжихнень, ёрдасазь синь юрнай пянакудс: тоса ули авардема и пеень мчкорфтома».
МАТВ. 13:24-50
*а Сяпикс – горчица.
346 
