Bible Stories
Choose Language
Choose Old Testament Story
Choose New Testament Story
ЗАХАРИЯНДИ ЭВОНДАЙ АНГЕЛСЬ
Мзярда ушедсть Од Сотксса няфневи тефне, кафтошка тёжянь кизода инголе, израилень ломаттнень стакаль эряфсна. Синь сядот киза ашель эсь оцязорсна. Азорондасть лангсост ассирияннетне, вавилононнетне, грекне... меколи римоннетне. Шкайсь лоткась корхтамда ломаньтналонцты шкаймаряйхнень вельде, кода тиендсь кунардонь пинкнень. Мекольцесь ня шкаймаряйхнень эзда, Малахия, эрясь ветеце сядокизотнень Кристосонь шачемада инголе. Тя стака пингть Израилень ломаттне учендозь надияфтф Мессиять (Идить), кона мянтьфтелезень синь римоннетнень кядялда и шарфтолезень седиснон Шкайти.
Мессиять, Исус Кристосонь, самада инголе, Шкайсь ушедсь анокламонза ломаньтналть сонь саманцты фкя од ломанть Иоаннонь вельде. Иоаннонь шачемац ульсь эсь лацонь. Сонь аляц, Захария, озксвятиель. Эрясь сон Елисавета рьванц мархта Иудеянь панда лангонь масторса. Кафцьке синь ульсть видешистонь ломатть и эрясть Шкаень сембе кошардомвалхнень и ладяфкснень коряс. Синь эряфкшуфтольхть ни, а идьсна ашельхть.
Весть Захария покодсь Ерусалимонь шкайкудса. Качакафтома ёткть ломаттне лисендельхть озондома пирьфи. И вов, мзярда Захария лядсь ськамонза шкайкуду качакафтома, тейнза эвондась Азорть ангелоц, Гавриил. Захария пяк эводсь. Ангелсь мярьгсь тейнза: «Тят пеле, Захария, озондомаце кульф, Елисавета рьвяце шачфты тейть цёра, лемдьсак: Иоанн. Ули тейть кенярдема и паваз, сонь шачемац ламонцнень кеняртьфтьсыне. Сон ули Азорть инголе пяк оцю, аф кармай симома винада и кодамовок лия иретьфтида, пяшкоди Иняру Ваймопожфта нинге тядяньавань потмоса; ламотнень Израилень ломаттнень эзда шарфтсыне Азорти, Шкайснонды».
Аньцек Захария аф прокс кемась ангелть валонзонды, пшкядсь: «Мезень коряс содаса тя виде али аф? Вдь мон сирян, рьвязевок эряфкшу». Ангелсь апряказе Захариянь аф кемаманкса, мярьгсь: «... Ся, мезе азонь тейть, ули эсь пингстонза. Но сяс мес ашеть кема валненди, юмай кяльце и аф корхтават снярс, мзярс сембось тя аф пяшкоди».
Тя ёткть ломаттне учсть, мзярда Захария лиси шкайкудста, и пяк дивандасть, мес сон тоса куватьс кирневи. Мзярда сон лиссь, мезевок ашезь корхтав, аньцек няфнесь сурса-кядьса. Эста ломаттне шарьхкодьсть: сон няйсь эвонькс.
ЛУКА 1:5-25
286 
