Bible Stories
Choose Language
Choose Old Testament Story
Choose New Testament Story
ИОАСОНЬ ОЦЯЗОРКС АРАМАЦ
Охозия ульсь иудеянь оцязорхнень эзда фкясь. Мзярда сон кулось, сонь тядяц, Гофолия, арьсесь машфтомс оцязоронь юрста сембе ломаттнень, ёрась сонць арамс оцязоравакс. Эста Охозиянь сазороц сявозе Иоасонь, Охозиянь цёранц, и салава кяшезе Гофолиянь эзда. Тяфта ся лядсь шиса. Кота кизот кяшендезь Иоасонь Шкаень кудса. Сембе тя пингть Гофолия оцязорондась Израильса.
Мзярда Иоасонди топодсь сисем кизот, Иодай озксвятись тердезень Азорть куду сембе ушматтнень, сядонь вятихнень, оцязоронь ронга ванфтыхнень. Сон няфтезе тейст Иоасонь и ладязе мархтост, кода сонь озафтомс оцязоркс. Ушматтне арсесть шкайкудть перьфке, ванфтозь цёранять. Иодай озксвятись лихтезе Иоасонь кяшема вастстонза, путсь прязонза оцязоронь коняфкс и петькст. Од оцязорти сембе цяпазь кядьснон, юватькшнесть: "Эряза оцязорсь!" Израилень марнек ломаньтналсь кенярдсь тянь кулемста. Гофолия оцязоравать кундазь и шавозь.
Мзярс шисоль Иодай озксвятись, Иоас кельгозе Шкайть и тиендсь сонь кошардомвалонзон коряс. Иоас петьфтезе шкайкудть, кона ся пингть каладома лангсоль.
Иодаень куломда меле оцязорсь кармась кулхцондома кальдяв ёнень максыхнень, юкстазе эрек Шкайть и кармась сюконякшнема лия шкаенди. Ломаньтналське тусь Шкайть мяльвиенц каршес. Шкайсь кучезе Захариянь, Иодаень цёранц, ломаньтналть апрякамонза, мес прась пежетьс. Тянь кулемста Иоас мярьгсь шавомдонза Захариянь видеста шкайкудть пирьфса. Тяда меле масторть лангс прасть зиятт: сириянь ломаттне шамдозь-салазь Израильть, ворьфтезь шкайкудонь козяшитьке. Иоас оцязорть сялгозь торбаксяса и сон сярядсь васта лангса, кафта покодиенза састь и шавозь.
ОЦЯЗОРХТ 4-ЦЕСЬ 11 и 12; 2 КИЗОДА КИЗОНЬ СЁРМАТФСЬ 24:1-25
206 
