Choose Language
Old Testament Books
New Testament Books
1Ефрем тӧлэз пастука, шундыӝужанысь тӧл сьӧрын уйылӥське,
нуналлы быдэ ӧрекчаськонэз, куашкатон-тарканэз йылэтэ;
Ассурен кусып кылдыто, Египетэ но вӧй нуо.
2Иудалы но Кузё-Инмар суд лэсьтоз, –
Со Иаков доры солэн сюресъёсыз кузя лыктоз,
солэн ужъёсызъя пунэмзэ берыктоз.
3Эшшо анаез пушкын дыръяз со аслэсьтыз братсэ ӵыжаз,
нош бадӟым луэм бераз Инмарен нюръяськиз.
4Со Кылчинэн нюръяськиз – вормиз сое;
бӧрдыса, тэльмырыса куриз сое;
Вефильысь Со милемыз шедьтӥз, отысен милемын вераськиз.
5Нош Кузё-Инмар со Саваоф Инмар; Кузё-Инмар Солэн нимыз.
6Тон но Аслад Инмаредлы вазиськы:
гажась-жалясь, шонерлыкез утись лу,
котьку но Инмаредлы оскиськы.
7Ханаан пи, кияз шонертэм мертаськон кутыса, яратэ вӧсь карыны;
8Ефрем но шуэ: «Ну бен узырми ик мон; аслым ваньбур люкай,
вань ужбергатонъёсы пӧлысь
номыр но законлы пумит луисьсэ, сьӧлыкозэ уз шедьтэ».
9Мон Кузё-Инмар,
Египет музъемысь тонэ поттэм дырысен кутскыса тынад Инмаред,
нош ик тонэ, праздник нуналъёсы кадь
тылысъёсы-балаганъёсы улыны интыяло.
10Мон пророкъёсын вераськыса улӥ,
паймымон адӟонъёсты трос пол возьматъяй,
пророкъёс пыр мадёнъёс вералляй.
11Галаад номырлы ярантэм ке, соку соос но номырлы ярантэмесь;
Галгалын кунянъёсты курбон сётылыса улӥзы,
курбон сётон интыоссы но
бусыосысь йыранъёс (межаос) вылысь из люкъёс кадесь вал.
12Иаков Сирияысь бусыосы пегӟыса кошкиз,
Израиль кышно басьтон понна ужаз-тыршиз,
кышноез понна ик ыж возьмаса улӥз.
13Пророк пыр Кузё-Инмар Израилез Египетысь поттӥз,
пророк пыр сое Со возьмаса улӥз.
14Ефрем Кузё-Инмарлэсь туж юн вожзэ поттӥз,
со понна со вылэ вирзэ кельтоз, сантэман улэ сое сётоз Кузё-Инмар.
Глава 12
