Choose Language
Old Testament Books
New Testament Books
1Ымад пеллян гумы пон!
Тушмон ӧрӟи кадь урдӥськоз Кузё-Инмарлэн корка вылаз
Мынэсьтым сӥзён-косонме сӧремзы понна,
законме кулэтэм каремзы понна!
2Мыным сюлворозы: «Инмаре! Ми Тонэ тодӥмы, ми – Израиль».
3Ӟечсэ-умойзэ Израиль кулэтэм кариз;
тушмон со сьӧрын уйиськыса ветлоз.
4Монтэк, ас тодэмзыя эксэйёсты пуктылӥзы;
кивалтӥсьёсты пуктылӥзы, но Мынэсьтым юатэк-вератэк;
азвесенызы, зарниенызы асьсэлы сульдэръёс-идолъёс лэсьтылӥзы,
нош отысь кулон-бырон потэ.
5Самария, Со тынэсьтыд куняндэ палэнтӥз-куштӥз!
Соос вылэ ӝуатскиз Мынам йыркуре;
кытчыозь соос уз быгатэ ни чылкыт луыны?
6Уго со но – Израильлэн ужез.
Суредась-вӧлӥсь сое лэсьтӥз, соин ик со инмар ӧвӧл;
пырылы пӧрмоз Самариялэн кунянэз!
7Тӧлэз кизизы бере, сильтӧлэз аралозы:
узьымез нянь уз сёты, юысьтыз пызь уз поты,
потӥз ке но, муртъёс сое ньылозы.
8Израиль ньылэмын; мукет калыкъёс пӧлын соос
номырлы ярантэм сосуд кадесь луозы.
9Огназ калгись кыр ишак кадь соос Ассур доры мынӥзы;
Ефрем, кузьымъёс сётъяса, калыкъёсты ас палаз берыктылӥз.
10Соос калыкъёслы саламъёс ысъяллязы ке но,
но ӝоген Мон соосты огазе люкало,
соку соос курадӟыны кутскозы
кивалтӥсьёслэн эксэйзылэн зӥбетэзлэсь;
11уго сьӧлык лэсьтон понна
Ефрем трос курбон сётон интыос пуктылӥз, –
сьӧлык басьтонлы пӧрмизы со курбон сётон интыос.
12Солы Мон трос законъёсме гожтӥ,
нош соос соосты муртлэн законэз шуыса лыдъязы.
13Мыным курбон вайыкузы, соос сӥль ваё но сое сиё;
Кузё-Инмарлы соос ярантэмесь,
али Со соослэсь сьӧлыклэсь кышкатэк улэмзэс тодаз ваёз но
сьӧлыкъёссы понна соосты вӧсь кароз: соос Египетэ берытскозы.
14Израиль вунэтӥз аслэсьтыз Кылдытӥсьсэ, куалаос пуктылӥз,
Иуда но трос юнматэм каръёс пуктылӥз;
но Мон солэн каръёсыз вылэ тыл лэзё,
солэсь юртъёссэ-четлыкъёссэ тыл ньылоз.
Глава 8
