Choose Language
Old Testament Books
New Testament Books
1Иудей эксэйёслэн Озиялэн, Иоафамлэн, Ахазлэн, Езекиялэн улон нуналъёсазы, Израиль эксэйлэн, Иеровоамлэн, Иоаслэн пиезлэн, улон нуналаз Беерилэн пиезлы Осиялы Кузё-Инмар дорысь верам кыл вуиз.
2Кузё-Инмарлэн Осиялы вераны кутсконэз. Кузё-Инмар Осиялы шуиз: «Мын, азыса-калгыса улӥсез аслыд кышно вай, со кышно тыныд нылпи мед ваёз; уго Кузё-Инмар бордысь палэнскеменыз сэрен укыр азыса-калгыса улэ та музъем».3Мынӥз но Дивлаимлэсь Гомер нылзэ кышно вайиз; секытэн луиз, солы пи нуны вайиз.4Кузё-Инмар Осиялы шуиз: «Солы Изреель ним сёт, уго ӧжытак дыр ортчем бере Ииуй выжылы Изреельлэсь вирзэ кисьтэм понна пунэмзэ берыкто, Израиль выжылэсь эксэйлыксэ быдто.5Со нуналэ озьы луоз: Изреель нёжалын Израильлэсь пукыӵсэ сузмыто».
6Гомер эшшо секытэн луиз, ныл нуны вайиз, Кузё-Инмар Осиялы шуиз: «Нылыдлы Лорухама*а ним сёт; уго азьланяз Израиль юртэз жаляса уг ни улы, сьӧлыксэс уг кушты.7Нош Иуда юртэз жаляло, Инмарзы Кузё-Инмар бордын соосты утё, соосты пукыӵен но уг, мечен но уг, ожен но уг, валъёсын но уг, вал вылын пукись ожгарчиосын но уг утьы».8”Сьӧлыкез куштэмын ӧвӧл” нимо нылзэ нонтэмысь дугдэм бераз со секытэн луиз но пи нуны вайиз.9Со шуиз: «Солы Лоамми*б ним сёт, малы ке шуоно тӥ Мынам калыке ӧвӧл, Мон но тӥляд [Инмарды] уг луы».
10Но израиль пиослэн лыдзы зарезьысь луо мында луоз, сое мертаны но, лыдъяны но уз луы; отын, кытын соослы шуизы: «Тӥ Мынам калыке ӧвӧл», соослы шуозы: «Тӥ Улэп Инмарлэн пиосыз».11Иуда пиос, израиль пиос огазе люкаськозы но асьсэлы одӥг валтӥсь быръёзы, собере потозы со музъемысь, уго Изреельлэн нуналыз бадӟым!
*а 1:6 Лорухама – «сьӧлыкез куштэмын ӧвӧл» шуыса берыктӥське
*б 1:9 Лоамми – «со Мынам калыке ӧвӧл» шуэм луэ
Глава 1
