Bible
Choose Language
Old Testament Books
New Testament Books
ПСАЛТИРЬ
131-тӥ ПСАЛОМ
Вылӥе тубыку кырӟан.
1Кузё-Инмаре, тодад вай Давидэз, солэсь вань куректон-чигиськонзэ.
2Со Кузё-Инмарлы кыл сётӥз,
Иаковлэн Кужмоезлы сӥзиськиз:
3«Коркаелэн липет улаз уг пыры, кӧлан интыям уг тубы.
4Синъёсылы изьыны маза уг сёты,
синкабакъёсылы ворсаськыны уг лэзьы,
5Кузё-Инмарелы инты,
Иаковлэн Кужмоезлы улон инты, шедьтытозям».
6Тани, ми со сярысь Ефрафа карысен кылӥмы,
Иаримлэн бусыысеныз сое шедьтӥмы.
7Солэн улон интыяз пыроме, Солэн пыд выжыяз йыбырттоме.
8Кузё-Инмаре, улон интыяд султы – Тон но,
Тынад быдӟымлыкедлэн ковчегез но.
9Священникъёсыд шонер улонэн мед дӥсяськозы,
вӧсяськись калыкед мед шумпотоз.
10Давид ляльчиед понна
вӧйын зырӟыса пуктэм эксэйдэ кулэтэм эн кары.
11Кузё-Инмар Давидлы кыл сётӥз,
зэмлык кылыз бордысь Со уз куштӥськы:
«Пушкысьтыд потэм емышез престол вылад пукто.
12Пиосыд сӥзёнме, законъёсме утизы ке,
кудъёсызлы Мон соосты дышето,
соку соослэн но пиоссы пумтэм вапумъёс ӵожелы
престол вылад пуксёзы».
13Кузё-Инмар Сӥонэз бырйиз, сое Аслыз улон инты каремез потӥз.
14«Та пумтэм вапумъёслы Мынам улон интые,
татчы интыясько, мылкыды отын улэ.
15Сиён-юонзэ бакель карыса пачылато,
кураськисьёссэ нянен тыр каро.
16Священникъёссэ утиськон дӥсен шобырто,
вӧсяськись калыкез туж шумпотоз.
17Отысен Давидлы кузё луыны кужым сёто,
вӧйын зырӟыса пуктэмелы лампада дасяло.
18Тушмонъёссэ возьытэ вуонэн шобырто,
нош солэн вылаз эксэй изьыез пиштыса улоз».
Глава 131
