Choose Language
Old Testament Books
New Testament Books
[Аллилуия.]
1Кузё-Инмарез данъялэ, Со ӟеч,
Солэн гажан-жалянэз пумтэм вапумъёсы улэ.
2Израиль [юрт] туннэ мед шуоз:
«[Со ӟеч,] Солэн гажан-жалянэз пумтэм вапумъёсы улэ».
3Аарон юрт туннэ мед шуоз:
«[Со ӟеч,] Солэн гажан-жалянэз пумтэм вапумъёсы улэ».
4Кузё-Инмарлэсь кышканэн улӥсьёс туннэ мед шуозы:
«[Со ӟеч,] Солэн гажан-жалянэз пумтэм вапумъёсы улэ».
5Ӟоскыт интыысен Кузё-Инмарлы мон вазиськи но, монэ кылӥз,
Кузё-Инмар вӧл-вӧл эркын интые монэ поттӥз.
6Уг кышка, Кузё-Инмар мон палан: адями мыным мар кароз?
7Кузё-Инмар – мынам юрттӥсе: тушмонъёсы шоры учкыса уло.
8Адямилы оскиськытозь, ӟечгес Кузё-Инмарлы оскиськыны.
9Нимо-даноослы оскиськытозь, ӟечгес Кузё-Инмарлы оскиськыны.
10Вань калыкъёс монэ котыртӥзы,
нош мон Кузё-Инмарлэн нимыныз соосты погыртӥ.
11Ёртӥзы монэ, котыртӥзы монэ,
нош мон Кузё-Инмарлэн нимыныз соосты погыртӥ.
12Мушъёслэн [карасэз] котыртэмзы кадь соос монэ котыртӥзы,
нош мон Кузё-Инмарлэн нимыныз соосты погыртӥ,
тёрнпу пӧлысь тыл кадь соос кысӥзы.
13Мон мед усём шуыса, кужмо донгизы монэ,
нош Кузё-Инмар мыным юрттӥз.
14Кузё-Инмар – кужыме мынам, кырӟанэ мынам,
Со мынам утисе луиз.
15Шумпотонлэн, утиськонлэн куараез
шонер улӥсьёслэн улон интыязы кылӥське:
«Кузё-Инмарлэн бур киыз кужмо!
16Кузё-Инмарлэн бур киыз ӝутэмын,
Кузё-Инмарлэн бур киыз кужмо!»
17Уг кулы, уло, Кузё-Инмарлэн ужъёсыз сярысь иворто.
18Вӧсь карыны вӧсь кариз монэ Кузё-Инмар
но кулон кие ӧз сёты монэ.
19Шонерлыклэсь капкаоссэ мыным усьтэ:
отӥ пырыса, Кузё-Инмарлы тау каро.
20Тани Кузё-Инмарлэн капкаез, шонер улӥсьёс отӥ пырозы.
21Тон монэ кылӥд но, мынам утисе луид шуыса, Тыныд тау карисько.
22Корка пуктӥсьёслэн кулэтэм карыса куштэм иззы
корка сэреглэн улаз инъет йыр луыса пуксиз.
23Та – Кузё-Инмарлэсь, паймымон луэ асьмелэн син азямы.
24Та нуналэз Кузё-Инмар кылдытӥз:
ваелэ шумпотоме, шулдыръяськоме!
25Кузё-Инмаре, уть милемыз! Кузё-Инмаре, берекеттэ сёт милемлы!
26Кузё-Инмарлэн нимыз понна лыктӥсь дано!
Кузё-Инмарлэн коркасеныз ӟечлык тӥледлы сӥзиськомы.
27Кузё-Инмар – Инмар, Со милемыз югдытӥз.
Курбон сётон интылэн сюръёсыз дорозь курбондэс гозыен думылэ.
28Тон – мынам Инмаре: Тонэ данъяло,
Тон – мынам Инмаре: Тонэ ушъяло;
[Тонэ данъяло, уго Тон монэ кылӥд, мынам утиськон интые луид].
29Кузё-Инмарез данъялэ, Со ӟеч,
Солэн гажан-жалянэз пумтэм вапумъёсы улэ.
Глава 117
