Choose Language
Old Testament Books
New Testament Books
1Аслэсьтыз визьлыко веранзэ Иов азьланьтыса шуиз:
2«Монэ шонер судтэк кельтӥсь Инмар улэп,
лулме ӝоже уськытӥсь Дунне Кутӥсь Инмар улэп,
3мон улэп на дыръя, Инмарлэн духез мон пушкын улон дыръя,
4мынам ымысьтым ӧрекчаськон уз поты,
кылы но алдаськыса уз вераськы!
5Тӥ шонер лэсьтӥсьёс шуыса, мон чик но уг малпаськы,
кулытозям мон аслэсьтым дун-шектэм луонме ватыса уг возьы.
6Зэмлык бордын мон юн кутӥськыса улӥсько,
со бордысь уг палэнскы,
вань улоно нуналъёсы ӵоже асме ачим пыкылоно уг луы.
7Тушмонэ сьӧлыклэсь кышкасьтэмлы укшась мед луоз,
мон вылэ урдскись мурт законлы пумит улӥсьлы кельшись мед луоз.
8Чеберъяськись мар вылэ оскиськыны быгатоз на,
солэсь лулзэ Инмар басьтыса, сэрпалтыса
куштӥз ке?
9Шугадӟон со доры вуиз ке,
кылоз-а Инмар солэсь викышъяса бӧрдэм куаразэ?
10Буйгатскон утчалоз-а со Дунне Кутӥсь дорысь,
котьку но Инмарлы вазиськыса улоз-а?
11Тӥледлы верало, мар Инмарлэн кияз возиське,
мар Дунне Кутӥсь бордын вань, уг ваты.
12Тани, тӥ ваньды асьтэос тае адӟиды;
нош малы тӥ сокем трос юнме кылъёс вераськоды?
13Тани Инмар дорысь законлы пумит улӥсь адямиос доры вуэм
адӟон люкет,
кудзэ Дунне Кутӥсь дорысь басьто
адямиез ӝикатыса-ёртыса возисьёс.
14Солэн пиосыз йыло ке, меч улэ сюро;
солэн выжыосыз нянен тыр уз улэ.
15Со бере улыны кылемъёсты кулон шайгуэ вуттоз,
соос понна палкышнооссы уз бӧрдэ.
16Сюй люк мында азвесь ке но люказ,
дэри комокъёс мында дӥськутъёс дасяз ке но,
17дасяны дасялоз, нош сое дӥсялоз шонер улӥсь мурт,
азвесьсэ но дун-шектэм улӥсь мурт аслыз люкетлы басьтоз.
18Кей кадь со аслэсьтыз корказэ пуктэ,
возьмаськись кадь аслыз тылыс лэсьтэ;
19узыр луыса кӧлыны выдэ но сыӵеен со уг ни султы;
синъёссэ усьтэ но, со сыӵе ӧвӧл ни.
20Ву кадь со доры шимес кышканъёс вуозы;
уйин сое сильтӧл лушкаса нуоз.
21Шундыӝужанысь тӧл сое ӝутоз но ӝог пельтыса нуоз.
22Со вылэ урдскоз, уз жаля,
котькызьы но солэн киулысьтыз бызьыса кошкыны со выриз ке но.
23Со пумысен киынызы чабкиськозы, солэн бӧрсяз шуласа сылозы».
Глава 27
