Choose Language
Old Testament Books
New Testament Books
1«Озьы, тае ваньзэ мынам синмы адӟиз,
мынам пельы кылӥз но аслыз синйылтӥз.
2Кӧня тӥ тодӥськоды, мон но тодӥсько: мон тӥлесьтыд улӥын ӧвӧл.
3Нош мынам Дунне Кутӥсьлы вераме потэ вал,
Инмарен эчешыны мылкыды вал.
4Нош тӥ – ӧрекчаськон бинисьёс,
ваньды тӥ пайда вайисьтэм эмъясьёс.
5Э, тӥ шып улысалды ке! Со тӥледлы визьлык шуыса гожтӥськысал.
6Мынэсьтым малпанъёсме кылзэ,
кылылэсь-ымылэсь пумит верамзэ валаны тырше.
7Инмарлы ярамон луон понна-а тӥ ӧрекчаськыса верано луиды?
Со азьын ӟеч уж лэсьтон понна-а ӧрекчаськон кылъёс верады?
8Тӥледлы Инмар азьын чеберъяськыны кулэ вал-а?
Со понна сокем ченгешыны кулэ вал-а?
9Ӟеч-а луоз, куке Со тӥледыз эскере-чакла?
Адямиосты кадь Сое пӧялоды-а?
10Со тӥледыз юн вӧсь кароз,
лушкемен Со азьын чеберъяськиськоды ке но.
11Солэн быдӟымлыкез тӥледыз, оло, уг кышкаты шат,
Солэн кышкатонэз тӥ вылэ уг урдскылы шат?
12Тӥляд тодэ вайытонъёсты пеньлы укшало, юнматскон пыкъетты –
горд сюйлэсь лэсьтэм пыкъет.
13Мон азьын тӥ шып кариське, таре котьмар монэн мед луоз,
мон верало.
14Мар понна мон аслэсьтым мугорме пиньёсыным йырйыны кулэ,
аслэсьтым лулме аслам киям поныны кулэ?
15Тани, Со монэ вие ни, нош мон Со вылэ оскиськыса улӥсько;
Со азьын аслэсьтым улон сюресъёсме,
шонересь луо шуыса, возьматэме потэ.
16Таиз ини мыным шонере потон понна,
малы ке шуоно чеберъяськись Солэн син азяз уз мыны!
17Мынэсьтым кылме, мынэсьтым валэктонме
ас пельыныды сак кылзэ.
18Тани, мон судын эскерон уж ӝутӥ: тодӥсько,
мон шонере пото шуыса.
19Ченгешыса кин монэ вормыны быгатоз?
Мон ӝоггес пыраклы чалмытско, – лулы потоз.
20Кык ужез гинэ мыным эн лэсьты,
соку мон Тынад син азьысьтыд уг ватӥськылы:
21мон бордысь кидэ палэнты,
Тынэсьтыд туж кышкаса улон монэ медаз куалекъяты.
22Соку ӧть монэ, мон Тыныд ответ сётыло,
яке мон вералляло, нош Тон мыным ответ сётылы.
23Кӧня мынам шекъёсы, сьӧлыкъёсы?
Мынэсьтым законлы пумит улэмме, мынэсьтым сьӧлыкме
мыным возьматы.
24Малы Аслэсьтыд ымнырдэ мынэсьтым ватӥськод но
монэ Аслад тушмонэд шуыса лыдъяськод?
25Ишкалтэм куарез уд-а пыргытӥськы Тон,
кӧс куро сьӧрын уйылӥськыса уд-а ветлӥськы?
26Мон вылэ уго Тон кузялзэ-курытсэ гожтӥськод,
егит дыр сьӧлыкъёсы понна монэ янгыше уськытӥськод.
27Мынэсьтым пыдъёсме колодкае пуктӥськод,
вань сюресъёсме чакласа улӥськод, –
пыд пытьыосы сьӧрын уйиськыса ветлӥськод.
28Нош со сись кадь пырдэ, кей сием дӥськут кадь куашка».
Глава 13
