Choose Language
Old Testament Books
New Testament Books
1Наамитысь Софар ответ сётыса шуиз:
2«Трос-трос верам кылъёслы ответ сётыны уг луы шат,
шонерлыко-а луэ трос кыло адями?
3Тынад токма супыльтонэд быгатоз-а
воргоронъёсты чус кариськыны,
тон мед мыскылляськод, нош тонэ возьытэ вуттыны
нокин но медаз быгаты-а?
4Тон шуид: ”Мынам малпанэ шонер, Тон азьын мон дун-чылкыт”.
5Инмар тыныд мар ке но шуысал ке,
тонэн вераськыны ымзэ усьтысал ке но,
6ватӥськыса улӥсь визьлыкез тыныд усьтысал ке,
уго со кык пол бадӟымгес!
Озьыен, тод: Инмар тынэсьтыд куд-огзэ законлы пумит
лэсьтэмъёстэ тодаз уг ни вайы.
7Эскеронъёс пыр быгатод-а тон Инмарез шедьтыны?
Быгатӥськод-а Дунне Кутӥсез быдэсак тодыны-валаны?
8Со инъёслэсь вылӥгес, – мар лэсьтыны быгатӥськод?
Пыдэстэм дуннелэсь мургес, – мар тодыны быгатӥськод?
9Солэн мертэтэз музъемлэсь кузьгес, зарезьлэсь паськытгес.
10Со ортчиз но кинэ ке жильыет улэ пыртӥз ке,
суд азе вайыса возьматӥз ке, кин Сое палэнтоз?
11Со уго ӧрекчаськись адямиосты тодэ, законлы пумит улэмез адӟе,
нош сое саклык висъятэк кельтоз-а бен?
12Тырттэм адями визьлыкен выремъяське,
кыр ишакпи выллем гинэ ке но со вордӥське.
13Тон сюлэмдэ валтӥд ке, аслэсьтыд киостэ Со пала мычид ке,
14тынад кияд шекез-тырмымтэез вань ке, нош тон сое палэнтӥд но
законлы пумит мынӥсь ужъёслы аслад балаганъёсад
улыны маза ӧд ке сёты,
15соку аслэсьтыд саптамтэ ымдурдэ ӝутод но юнлыко луод,
уд но кышкалля.
16Соку куректон-кайгудэ вунэтод,
визыласа кошкем вуэз кадь сое тодад ваёд.
17Нуназе шорлэсь но сэзьгес-югытгес мыноз тынад улонэд;
ӵукна шунды кадь пиштыса улод.
18Алекъяськисьтэм, зӥбытлыко луод, вань уго оскиськон;
тон утиськон улын но кышкатэк кӧлыны быгатод.
19Выдыса кыллёд, кышкатӥсез уз луы,
тросэз тон азьын кельшыны-яраны тыршыса улозы.
20Нош законлы пумит улӥсьёслэн синъёссы бездозы,
соослэн ватӥськон интызы быроз,
соослэн оскиськонзы но ышоз-быроз».
Глава 11
