Choose Language
Old Testament Books
New Testament Books
1Феман пи Елифаз ответ сётыса шуиз:
2«Тыныд кыл вераса утчамы ке, тыныд секыт уз луы-а?
Зэмзэ ке верано, кыллы пумит кыл вератэк улыны кин быгатоз!
3Тани, тон тросэзлы визь-нод сётылӥд,
суй-пыдлы юскиськыны эрик ӧд сётылы,
4кылыныд усисез ӝутылӥд, куасалляськись пыдесъёсты юнматылӥд.
5Нош табере тон доры шугадӟон вуиз но, тон катьтэммид;
тон борды йӧтӥськиз но, тон мылкыдыныд-духеныд усид.
6Инмарлэсь кышкаса улонэд оскиськыса улыны
тыныд эрик уг сёты-а,
улонэдлэн дун-шектэм сюресъёсыз оскиськыса улыны
тыныд кужым уг сёто-а?
7Тодад вай али, янгыштэм-шектэмъёс пӧлысь кин ке но быриз-а,
кытын шонер улӥсьёс выжыенызы порылэмын вал?
8Кызьы мон адӟи, сьӧлыкез-лекез гырисьёс,
уродэз-лекез кизисьёс сое арало;
9Инмарлэн пельтэменыз быро но,
Солэн вожпотон духезлы чидатэк, ышо-быро.
10Сьӧсь пӧйшурлэн вузэменыз бурсӥсьлэн куараез зӥбломе но,
пинал левпиослэн пиньёссы шальтрало;
11туж кужмо сьӧсь пӧйшур, сиён люкет шедьтытэк, чоньдэ,
сьӧсь пӧйшур мумылэн пиосыз пазьгисько.
12Но тани, мон доры лушкемен кыл вуиз но,
мынам пелям солэн маиз ке но пыриз.
13Уйин адӟем вӧтъёсы сярысь малпаськыса улыкум,
адямиосты кӧлон ум нюртон вакытэ,
14туж зол кышкан, куалекъян монэ котыртӥз – вань лыосме зуркатӥз.
15Мон йылтӥ дух ортчиз но, мынам йырсиосы выллань пештырскизы.
16Со султӥз, но мон солэсь кин луэмзэ ӧй тодма, –
солэн вылтусыз гинэ мынам син азям пуксиз;
каллен ыртӥське-пельтӥське, – соку мон куара кылӥсько:
17”Адями шонерлыкогес-а Инмарлэсь?
Воргорон дун-чылкытгес-а Кылдытӥсезлэсь?
18Тани, Со Аслаз медоосызлы уг оскы,
Кылчинъёсыз бордысь но шекъёсты адӟе;
19нош уката ик сюйысь-тузонысь лэсьтэм храмын
улӥсьёсыз бордысь,
соослэн инъетсы – сюй-тузон, соос кейлэсь ӝоггес быдтӥсько.
20Ӵукнаен ӝыт вискын соос куашкало;
уд адӟы, соос кызьы чылкак ышозы-бырозы.
21Соосын валче ик соослэн сӥ-данзы но уг быры-а?
Визьлыко улон доры вуытэк, соос кулыло”».
Глава 4
