Choose Language
Old Testament Books
New Testament Books
1Мар лэсьтӥське, ваньзэ тодэм бераз Мардохей дӥськутсэ кесяз но чурыт, бышкись урдэг дӥсь вылаз дӥсяз, вылаз пень пызьназ но, город шоры потыса, туж бадӟым куараен кесяськыса, викышъяса вазиськиз: [чик янгыштэм калыкез быдто!].
2Эксэй капка доры вуыса [дугдӥз], уго чурыт бышкись урдэг дӥськутэн дӥсяськыса, [пенен пызьнаськыса] эксэй капка пушкы пырыны уг яра вал.3Тазьы ик вань улосвылъёсын, пӧртэм интыосын эксэйлэн косонэз, солэн пуктон-косонэз вуэ ке, иудейёс ӝож мылкыдын улыны кутско, визяны, бӧрдыны, викышъяны кутско; чурыт бышкись урдэг дӥсьсы, пеньзы тросэзлы валес интыын вал.
4Есфирьлэн медо нылъёсыз, евнухъёсыз дораз лыктыса веразы, эксэй кышно туж куалектӥз. Мардохей вылысьтыз чурыт урдэг дӥсянзэ мед кылёз но мукетсэ мед дӥсялоз шуыса, Есфирь солы дӥськут келяз. Нош со кулэ ӧз кары.5Соку Есфирь эксэйлэсь сое утьыны-чакланы пуктэм Гафах евнухез ӧтиз но Мардохей доры «мар та, малы тазьы луиз?» шуыса, тодыны ыстӥз.6Эксэй капка азе интыяськем кар падвоже Мардохей доры Гафах мынӥз.7Ваньмыз сярысь, мар соин луиз, Мардохей солы вераз, иудейёсты быдтон понна Аманлэсь эксэй казнае кӧня азвесь мертаса сётыны сӥземзэ но вераз.8Соосты быдтон сярысь Сузы карын ялэм пуктон-косонлэсь списоксэ солы сётӥз, – Есфирьлы мед сётоз, ваньмыз сярысь солы мед ивортоз; эшшо со косӥз на Есфирь эксэй доры мед мыноз но сюлворыса мед куроз, урод ужез медаз лэсьтэ, ас калыкез понна эксэйлэсь курыны косӥз, [аслэсьтыз зӥбыт-востэм улэм нуналъёссэ тодаз вайыса, куке со мынам киулам быдэсмиз, уго Аман, эксэй бере кыкетӥез сӥё-дано интыез басьтӥсь, милемыз быдтыны судить кариз, Кузё-Инмарлы мед вазиськоз, ми сярысь эксэйлы мед вералоз но кулонлэсь-быронлэсь милемыз мед утёз шуыса].9Гафах лыктӥз но Мардохейлэсь кылъёссэ Есфирьлы вераз.10Есфирь Гафахлы вераз, сое Мардохейлы вераны ыстӥз:11«Эксэй дорын вань ужась-тыршисьёс, эксэйлэн улосвылъёсаз улӥсь калыкъёс тодо: котькудӥзлы пиосмуртлы, кышномуртлы, эксэй доры пуш азбаре ӧтьытэк пырид ке, одӥг суд – виён; кин пала эксэй зарни кивалтэт бодызэ мычиз ке, со гинэ улэп кылёз. Нош монэ куамын нунал ӵоже ини эксэй доры уг ӧтё».
12Есфирьлэсь кылъёссэ Мардохейлы веразы.13Мардохей Есфирьлы ответ сётӥз: «Эн малпа, вань иудейёс пӧлысь тон одӥгнад эксэй юртэ быдэс кылёд шуыса.14Та дыре тон чус улӥд ке, соку иудейёслы утиськон, мозмытскон мукет интыысь вуоз, нош тон атаедлэн выжыеныз ӵош кулод-бырод. Кин тодэ, таӵе секыт вакытэ тупаны ик кулэ вал тынад эксэй кышно сӥё-дано ним басьтонэд?»15Мардохейлэн пумитаз Есфирь шуиз:16«Мын, Сузы карысь вань иудейёсты люка, мон понна куинь нунал ӵоже визялэ, – нуназе но, уйин но эн сиське, эн юэ, мон но медо нылъёсыным ӵош визяло, собере эксэй доры мыно, та законлы пумит ке но луэ; нош кулоно луиз ке – куло».
17Мардохей мынӥз, кызьы Есфирь косӥз, со озьы лэсьтӥз. [Кузё-Инмарлэсь вань ужъёссэ тодаз вайыса, Мардохей Кузё-Инмар азьын вӧсяськиз, со шуиз: «Кузё-Инмаре, Кузё-Инмаре, Дунне Кутӥсь Эксэе! Ваньмыз Тон киын, Израилез утьыны малпад ке, соку Тыныд пумитъяськись уз луы; Тон инэз но, музъемез но кылдытӥд, ин улысь вань паймымон арбериосты но кылдытӥд; Тон ваньмызлы – Кузё-Инмар; ӧвӧл сыӵеез, кин Тыныд, Кузё-Инмарлы, пумитъяськыны мед быгатысал. Тон ваньзэ тодӥськод; Тон, Кузё-Инмаре, тодӥськод, тае мон ӝоже уськытон понна, вылтӥяськыса, ушъямез-данъямез яратыса ӧй лэсьты – данлыкез яратӥсь Аманлы ӧй йыбыртъя, уго Израилез утён понна мон Аманлэсь пытьы бервылъёссэ чупаны дась; нош мон тае Инмарлэн сярысь, адямилэсь данзэ вылӥгес каронтэм понна лэсьтӥ; Тыныд, Кузё-Инмарелы, сяна, мон нокинлы но мукетлы уг йыбыртъя, но мон тае асме вылэ ӝутон понна уг лэсьты. Нош али, Инмаре Кузё-Инмаре, Эксэе, Авраамлэн Инмарез, Ас калыктэ жаля, уго милемыз быдтыны малпало, кутсконысеныз ик быръем люкеттэ быдтыны малпало. Аслэсьтыд ваньлыктэ кулэтэм эн кар, сое Тон Египет музъемысь Аслыд шуыса мозмытӥд; вӧсяськемме кыл, Аслэсьтыд быръем люкеттэ жаля, милесьтым куректыса-кайгырыса улэммес шулдырен улонлы пӧрмыты, ми, Кузё-Инмаре, Тынэсьтыд нимдэ кырӟаса, данъяса мед улысалмы, Тонэ, Кузё-Инмаре, данъясь адямиосты эн быдты». Вань израиль калык, вань кужымзэ поныса, тэльмырыса куриськиз, уго кулон дырзы син азязы вуиз.
Эксэй кышно Есфирь, кулон кайгуэн ӝикаса улыкуз, Кузё-Инмар мед утёз шуыса, Со азе тэльмырыны-вазиськыны лыктӥз, данлыкын улонэзлэсь дӥськутсэ кылиз но бӧрдыса, куректон-кайгуэн улонлэсь дӥськутсэ дӥсяз, дуно зыраськон ческыт зыно арбериос интые йыр вылаз пень, сюй пызьназ, мугорзэ куасьтӥз-катьтэммытӥз, шулдыръяськыса улон дыръяз чеберъянъёсын шобыртэм вань интыоссэ лэзьям йырсиосыныз шобыртӥз но Израильлэн Инмарезлы Кузё-Инмарлы тазьы вӧсяськыны кутскиз:
«Кузё-Инмаре! Тон гинэ милям Эксэймы; юртты мыным, одӥгназ кылемлы, мынам, Тон сяна, юрттӥсе ӧвӧл! Уго шугадӟонэ мынам вӧзам вуэ ни. Кузё-Инмар, ас выжыосы пӧлын мон атаелэсь верамзэ кылӥ; Тон, Кузё-Инмаре, вань калыкъёс пӧлысь Аслыд Израилез бырйид, атайёсмес но вань вашкала выжыоссы пӧлысь пумтэм вапумъёс ӵожелы люкетлы бырйид; мар соослы верад, сое соослы лэсьтӥд. Та виын ми Тон азьын сьӧлыкамы, Тон милемыз тушмонъёсмылэн киулазы сётӥд соослэсь инмаръёссэс сӥлы карыса улэммы понна: шонерлыко Тон, Кузё-Инмаре! Нош та виын соослы ляльчи радын секыт улонмы ӧз тырмы, – соос сульдэръёссы-идолъёссы азьын кыл сётӥзы Тынад ымысьтыд потэм курон-косонэз сэрпалтыны, Тынэсьтыд люкеттэ быдтыны, Тонэ кырӟаса данъясьёслэсь ымзэс кортнаны, Тынад храмедлэсь, курбон тыронэдлэсь данлыксэ кысыны, ӧвӧлтэм инмаръёсты данъяны калыкъёслэсь ымзэс усьтыны, кулоно эксэез пумтэм вапумозь данъяны. Кузё-Инмаре, ӧвӧлтэм инмаръёслы кивалтон эксэй бодыдэ эн сёты, усёнмылы медаз шумпотэ, – соослэсь малпанзэс асьсэ вылэ берыкты, нош ми сярысь кыл нуллӥсь мурт возьдаськыса улонэ мед сюроз. Кузё-Инмаре, милемыз тодад вай. Ӝожлык пӧлын улон дыръямы Астэ милемлы возьматы, монэ кышкасьтэм кар. Инмаръёслэн Эксэйзы, вань кивалтӥсьёслэн Кузё-Атайзы! Та лев азьын чебер кылӥськись кыл вераны ымме усьты, солэсь сюлэмзэ ми сьӧрын уйиськыса ветлӥсез адӟемпотостэм карись кар, солы, соин огмылкыдын улӥсьёслы но быронлы со мед луоз; нош милемыз Аслад киыныд мозмыты; мыным, огнамлы, Тон сяна, Кузё-Инмаре, юрттӥськисьтэк улӥсьлы, юрттӥськы! Тон ваньзэ тодӥськод-адӟиськод, законлы пумит улӥсьёслэсь данзэс синазькыль карисько шуыса, вандӥськымтэослэн валессылэсь, мурт выжы калык пӧлысь котькинлэн валесезлэсь юрдӥсько шуыса, Тон тодӥськод. Тон тодӥськод, мае мон лэсьтыны кулэ луисько. Тон тодӥськод, вылтӥяськон пусэлэсь юрдӥсько шуыса. Калык азе потон нуналъёсам со мынам йыр вылам улэ, но вирен саптаськем ӟустарилэсь кадь мон солэсь юрдӥсько, ас поннам шыпытэн улон дыръям мон сое уг нуллӥськы. Тынад ляльчи кышноед Аманлэн ӝӧк вылаз пуктылэм сиёнэз ӧз сиы, эксэйлэсь юон дыръёссэ сӥлы ӧз кары, сульдэрлы-идоллы сӥзем винаез ӧз юы, ӧз но шулдыръяськы улонэ воштӥськем дырысен туннэ нуналозь, ляльчи-медо кышноедлэн, Тон сяна, мукет шумпотонэз ӧй вал, Кузё-Инмаре Авраамлэн Инмарез. Инмаре, ваньмыныз кивалтыны кужымед вань, оскиськонтэк улыны кылемъёслэсь сюлворем куаразэс кыл, урод лэсьтыны турттӥсьёслэсь уть милемды, кышкаса улонэлэсь мозмыты монэ».]
Глава 4
