Choose Language
Old Testament Books
New Testament Books
2-тӥ книга
1Иудеялэн эксэез Иосафат каньылэн дораз Иерусалиме берытскиз.2Солэн пумитаз потӥз Ананийлэн Ииуй пиез, азьпалэз адӟись, со Иосафат эксэйлы шуиз: «Кулэ вал-а тыныд сьӧлыклэсь кышкасьтэмлы юрттӥськыны, Кузё-Инмарез синазькыль карисьёсты яратыны? Со понна тон вылэ Кузё-Инмарлэн вожпотонэз вуиз.3Озьы ке но тон дорысь ӟеч ужъёс но шедьтэмын, уго тон Иудей музъемысь сульдэръёсты-идолъёсты быдтӥд, сюлэмдэ Инмарез утчан пала берыктӥд».
4Иосафат Иерусалимын улӥз. Со нош ик калыкез пӧлтӥ – Вирсавияысь Ефрем гурезёзь ветлӥз но атайёссылэн Инмарзы Кузё-Инмар пала соосты берыктӥз.5Иудей музъемысь вань юнматэм городъёсы, котькудаз городэ судьяосты пуктылӥз но6судьяослы шуиз: «Учкелэ, мар тӥ лэсьтӥськоды: адями суд тӥ уд лэсьтӥське, Кузё-Инмарлэсь судзэ лэсьтӥськоды; Со тӥледын огазьын суд ужын.7Озьыен, Кузё-Инмарлэсь кышкан тӥ бордын мед улоз: чакласькыса уждэс быдэсъялэ, уго Инмармы Кузё-Инмар бордын ӧрекчаськон, кузьым бичан, одӥгзэ вылӥ, мукетсэ улӥ карон сям ӧвӧл».8Иерусалимын но левитъёс, священникъёс, Израильысь выжыослэн йыръёссы пӧлысь куд-огзэ Иосафат Кузё-Инмарлэн судаз, ченгешон ужъёсты сэрттыны-пертчыны султытӥз. Собере Иерусалиме берытскизы.9Соослы косон сётыса шуиз: «Кышканэн, шонерлыкен, чылкыт сюлмын Кузё-Инмарлы ужалэ;10городъёсазы улӥсь агай-вынъёстылэсь вуэм ченгешонэ пыртӥсь ужъёссэс – вир кисьтон пумысен-а, курон-косон, закон пумысен-а, пуктон-косонъёс, сямъёс пумысен-а соос потэмын, дышетэ-нодъялэ соосты, Кузё-Инмар азьын янгыше усёно медаз луэ, Солэн вожпотонэз тӥ вылэ но, агай-вынъёсты вылэ но медаз вуы; озьы лэсьтэ – уд сьӧлыкалэ.11Тани Амария архиерей Кузё-Инмарлэн вань ужъёсаз тӥледлы йыр, нош Иуда юртлэн кивалтӥсез Зевадия, Исмаиллэн пиез, эксэйлэн, вань ужъёсыныз кивалтэ, эскерись-чаклась левитъёс но тӥляд азяды. Юнэсь луэ, ужалэ-тырше, Кузё-Инмар лякытъёсын огазьын луоз».
Глава 19
