Choose Language
Old Testament Books
New Testament Books
1Кузё-Инмар Моисейлы тазьы вераз, тазьы шуиз:2«Израиль пиослы вера но котькуд выжыысь, котькуд выжылэн тӧроезлэсь-кивалтӥсезлэсь быдэн кивалтэт боды*а басьты, дас кык выжылэсь дас кык кивалтэт боды, котькудӥзлэн кивалтэт боды бордаз кузёезлэсь нимзэ гожты;3Ааронлэсь нимзэ Левийлэн кивалтэт боды бордаз гожты, уго выжызылэн тӧроезлы быдэн одӥг кивалтэт боды [соос сётыны кулэ];4соосты вӧсяськон скиния пушкы тыр, сӥзён-косонэн ковчег азе тыр, отысен Мон тӥледлы возьматскисько;5кинэ Мон быръё, солэн кивалтэт бодыез сяськаяськоз; озьы Мон израиль пиослэсь тӥ вылэ ӟургетыса улонзэс зӥбломыто».
6Моисей израиль пиослы вераз но, вань тӧрооссы-кивалтӥсьёссы, вань выжыослэн кивалтӥсьёссы, солы быдэн одӥг кивалтэт боды сётӥзы, – дас кык кивалтэт боды, соослэн кивалтэт бодыоссы пӧлын Ааронлэн но кивалтэт бодыез вал.7Моисей кивалтэт бодыосты сӥзён-косонэн скинияе Кузё-Инмарлэн азяз понӥз.8Мукетаз нуналэ Моисей [но Аарон] сӥзён-косонэн скинияе пыризы, соку соос адӟизы, кызьы Левий выжыысь Ааронлэн кивалтэт бодыез сяськаяськиз, пучы поттӥз, сяськаез усьтӥськиз, миндальёсыз быгыльскизы.9Моисей Кузё-Инмарлэн азьысьтыз вань кивалтэт бодыосты вань израиль пиос доры поттӥз; соос тае адӟизы но котькудӥз аслэсьтыз кивалтэт бодызэ басьтӥз.
10Соку Кузё-Инмар Моисейлы шуиз: «Ааронлэсь кивалтэт бодызэ сӥзён-косонэн ковчег азе нош ик пон, отын мед улоз, тэрытскисьтэм муртъёслы паймымон тодмет мед луоз но, Мон вылэ ӝожъяськыса улэмысь мед дугдозы, медаз кулэ-быре».11Моисей тае быдэстӥз; Кузё-Инмар мар лэсьтыны косӥз, Моисей сое ик лэсьтӥз.
12Соку израиль пиос Моисейлы шуизы: «Тани, ми кулӥськомы, быриськомы, ваньмы быриськомы!13Кузё-Инмарлэн скинияезлэн матаз лыктӥсь вань адямиос куло: ми ваньмы кулыса ум быре-а?»
*а 17:2 кивалтэт боды – жезл; посох
Глава 17
