Choose Language
Old Testament Books
New Testament Books
1Кузё-Инмар Моисейлы тазьы вераз, тазьы шуиз:2«Ааронлы ялыса тазьы шу: лампадаосты ӝуатыкуд, югыт сётӥсь арберилэн азьпалаз сизьым лампадаос ӝуаны кулэ».3Аарон озьы ик лэсьтӥз: югыт сётӥсь арберилэн азьпалысьтыз лампадаосты ӝуатӥз, кызьы Кузё-Инмар Моисейлы косон сётӥз.4Тани югыт сётӥсь арбери кызьы лэсьтэмын: со зарнилэсь дуремын, вайыз бордысен сяськаосыз дорозь дуремын; Кузё-Инмарлэн Моисейлы возьматэм югыт сётӥсь арберилэн тусызлы укшатыса, Моисей сое лэсьтӥз.
5Кузё-Инмар Моисейлы тазьы вераз, тазьы шуиз:6«Израиль пиос пӧлысь левитъёсты басьты но соосты чылкытаты;7нош соосты чылкытатон понна тазьы кар: соосты чылкытатӥсь вуэн пазя, бритваен быдэс мугорзэс мед мычозы, дӥськутсэс мед миськозы но, соку соос чылкытэсь луозы;8ошпи мед басьтозы, со борды салам нянь пыжыны вӧйын сурам чабей пызь мед басьтозы на, сьӧлык понна курбон сётыны мукетсэ ошпиез кут на;9вӧсяськон скиния азе левитъёсты вай; вань израиль калыкез огазе люка,10Кузё-Инмар азе левитъёсты вай, израиль пиос левитъёс вылэ кизэс мед понозы;11Кузё-Инмарлы мед ужалозы-тыршозы шуыса, израиль пиослэн нимынызы Аарон Кузё-Инмар азьын левитъёсты служить карыны мед пуктоз;12нош левитъёс киоссэс ошпиослэн йыр вылазы мед понозы; левитъёсты сьӧлыкъёслэсь чылкытатон-сузян понна одӥгзэ ошпиез сьӧлыклэсь мозмытскон понна курбонлы сёт, нош мукетсэ Кузё-Инмар азьын тылын сутӥськись курбонлы сёт;
13левитъёсты Аарон азе, солэн пиосыз азе султыты, соосты Кузё-Инмарлы ужаса-тыршыса улыны пукты;14тазьы левитъёсты израиль пиослэсь висъя, левитъёс Мыным ужаса-тыршыса мед улозы.15Левитъёсты чылкытатэмед но служить карыны пуктэмед бере соос вӧсяськон скинияе служить карыны пырозы; уго соос израиль пиос пӧлысь Мыным сётэмын:16израиль пиос пӧлысь нырысь вордскемъёс, анай пушкысь нырысь потэмъёс интые левитъёсты Мон Аслым басьтӥсько,17уго израиль пиослэн нырысь вордскем пиоссы – адямиос но, пудоос но – ваньмыз Мынам киулам: Египетысь вань нырысь вордскем пиосты виылэм нуналам Мон соосты дун-чылкытатыса Аслым кари,18Израиль выжыысь вань нырысь вордскем пиос интые левитъёсты басьтӥ;19израиль пиос пӧлысь левитъёсты Аарон кие, солэн пиосыз кие сётӥ, соос израиль пиос понна вӧсяськон скиния бордын ужаса-тыршыса мед улозы; израиль пиос, вӧсяськон инты доры туж матэ лыктыса, погыртэмын медаз луэ вал шуыса, израиль пиос понна соос чакласьёс-утисьёс но вал».
20Моисеен Аарон, вань израиль калык левитъёсын тазьы каризы: левитъёс пумысен Кузё-Инмар Моисеез мар карыны косӥз, израиль пиос озьы ик лэсьтӥзы.21Чылкытатӥськизы левитъёс, дӥськутсэс миськизы но, Аарон соосты Кузё-Инмар азьын служить карыны пуктӥз, Аарон соослы чылкытатӥськон сямез ортчытӥз чылкытэсь карон понна;22Аарон азьын, солэн пиосыз азьын вӧсяськонэз ортчытыны левитъёс вӧсяськон скинияе пыризы. Кызьы Кузё-Инмар левитъёс пумысен Моисейлы косон сётӥз, соос озьы ик лэсьтӥзы.
23Кузё-Инмар Моисейлы тазьы вераз, тазьы шуиз:24«Тани левитъёс пумысен таӵе закон сётӥсько: кызь вить арескы вуыса, солэсь но бадӟымгес луыса соос вӧсяськон скинияе ужаны-тыршыны мыныны кулэ,25нош витьтон арес тырмем бере отын ужамысь дугдыны кулэ, азьланяз медаз ни ужалэ;26соку соос асьсэлэн агай-вынъёссылы вӧсяськон скинияез возьманы мед юрттӥськозы, ужаны ке нош – медаз ни ужалэ; левитъёслэн ужан-тыршонзы пумысен тазьы кар».
Глава 8
