Choose Language
Книги Ветхого Завета
New Testament Books
view with a second Bible
1 Сэсся енэжсьыс ме нӧшта на аддзи шензьӧдана да ыджыд индысьпас. Ме аддзи сизим анделӧс, кодъяслӧн вӧлі бӧръя сизим бырӧданторйыс. Тайӧ бырӧданторъяснас помасис Енлӧн скӧрлуныс.
2 Ме аддзи стеклӧ кодь саридз, сійӧ пӧртмасис биӧн. Саридз дорас сулалісны найӧ, кодъяс вермисны зверӧс, сылысь серпассӧ да сы нимлысь лыдпассӧ. Кианыс найӧ кутісны Енлысь арфаяссӧ
3 да сьылісны Ен кесйӧг Мӧисейлысь да Балялысь сьыланкывсӧ:
– Господьӧй Енмӧй, Ставсӧвермысьӧй!
Тэнад уджъясыд ыджыдӧсь да шензьӧданаӧсь,
Тэнад туйясыд веськыдӧсь да збыльӧсь!
Тэ – вежа войтырлӧн Ӧксыыс!
4 Господьӧй, сюрас-ӧ сэтшӧм морт,
коді оз повзьы Тэысь,
коді оз ошкы Тэнсьыд нимтӧ?
Ӧд Тэ ӧтнадӧн вежаыс!
Войтыръяс локтасны да копыртчасны Тэ водзӧ,
ӧд воссис Тэнад веськыда мыждӧмыд!
5 Сэсся ме видзӧдлі да аддзи, мый енэжас воссис крам – Енлӧн вежа чомйыс. 6 Крамысь петісны сизим андел, кодъяслӧн вӧлі сизим бырӧдантор. Анделъяслӧн шабді паськӧмыс вӧлі лым кодь еджыд, морӧс весьтас налӧн вӧлі кӧрталӧма зарни вӧнь. 7 Нёль ловъя олысь пӧвстысь ӧтиыс сетіс сизим анделлы сизим зарни чаша. Тайӧ чашаяссӧ вӧлі тыртӧма помтӧг олысь Енлӧн скӧрлунӧн. 8 Енлӧн дзирдлунысь да Сылӧн вынысь крамыс тырис тшынӧн. Крамас некод эз вермы пырнысӧ, кытчӧдз эз помась сизим анделлӧн сизим бырӧданторйӧн удж вӧчӧмыс.
Глава 15