Choose Language
Old Testament Books
New Testament Books
view with a second Bible
1 Енмыс важысянь унаысь да уна ногӧн шыасьліс миян батьяс дінӧ пророкъяс пыр.2 Тайӧ бӧръя кадас Сійӧ шыасьліс миян дінӧ Пиыс пыр. Енмыс сетіс Сылы ставсӧ, Сы пыр вӧчис ентыкӧласӧ.
3 Пиыс – Енлӧн яръюгыд дзирдлуныс, Сылӧн пертасыс. Пиыс ставсӧ кутӧ Аслас вына кывнас. Аслас вирнас Сійӧ мыськаліс миянлысь мыжъяснымӧс да пуксис Медыджыдыслӧн веськыдладорӧ енэжас.4 Сійӧ лои анделъясысь вылынджык на, ӧд Сылӧн нимыс ёна тӧдчана налӧн нимысь.5 Ни ӧти анделлы Енмыс эз шулы:
– Тэ – Менам Пи,
талун Ме лои Тэныд Батьӧн.
Ни ӧти андел йылысь Енмыс эз шулы:
– Ме лоа Сылы Батьӧн,
а Сійӧ – Меным Пиӧн.
6 Муюгыдас Ассьыс медводдза Чужысьсӧ пыртігӧн Енмыс шуӧ:
– Копыртчылӧй Сылы ставныд, Енлӧн анделъяс.
7 Анделъяс йылысь шуӧма:
– Ассьыс анделъяссӧ Енмыс вӧчӧ тӧвнырӧн,
Ассьыс кесъялысьяссӧ – ыпъялан биӧн.
8 Пиыс йылысь шуӧма:
– Енмӧй, Тэнад юралан пуклӧсыд лоӧ нэмъяс чӧж.
Тэнад юралан беддьыд – веськыдлун.
9 Веськыдлуныс Тэныд муса,
а лёксӧ Тэ мустӧмтан.
Та вӧсна Тэнад Енмыд мавтыштіс Тэнӧ, Енмӧй,
нимкодьлунӧн мукӧд дорысь ёнджыка на.
10 Нӧшта шуӧма:
– Господьӧй, медводз Тэ вӧчин мусӧ,
енэжыс тшӧтш Тэнад вӧчӧмтор.
11 Найӧ бырасны, а Тэ помтӧг олан.
Паськӧм моз найӧ важмасны,
12 кӧлуйӧс моз Тэ гартыштан найӧс,
и найӧ вежсясны.
А Тэ он вежсьы,
Тэнад олан вояслы помыс оз ло.
13 Ни ӧти анделлы Енмыс эз шулы:
– Пукав Менам веськыдладорын,
кытчӧдз ог пукты Тэнад кок улӧ Тэнӧ мустӧмтысьясӧс.
14 Анделъяс – кесъялысь ловъяс. Енмыс мӧдӧдӧ анделъясӧс кесъявны налы, кодъяслы вичмӧ мездмӧмыс.
Глава 1