Choose Language
New Testament Books
view with a second Bible
1Сэк ме кылі Вежа Керкусис гора шы. Сизимнан ангеллӧ сія висьталіс: «Мунӧ, кисьтӧ му вылас Енлісь лӧгсӧ сизим доз».
2Медодзза ангел муніс да кисьтіс аслас дозісь Енлісь лӧгсӧ му вылас. Енлӧн лӧгсянь отирыс ӧдісӧ ӧддьӧн зубыт орсялан дойманнэзӧн. Ӧдісӧ дзир нія, кӧдна вылын вӧлі вӧрпаыслӧн пасыс да кӧдна копрасисӧ вӧрпаыс кодьӧ керӧмыслӧ.
3Мӧдік ангел кисьтіс аслас дозісь саридзӧ. Саридзыс лоис кулӧмлӧн вир кодь. Быдӧс ловьяыс саридзсис куліс.4Куимӧт ангел кисьтіс аслас дозісь юэзӧ да ва петаніннэзӧ. Ваэс пӧртчисӧ вирӧ.5Сэк ме кылі ваэзлӧн ангеллісь висьталӧмсӧ:
─ Дӧсвидзисьным, Тэ веськыта Керись.
Тэ Сія, Кӧда вӧлі и эм,
Тэ вежа, Тэ эд веськыта судитін.
6Нія кисьтісӧ вирсӧ вежа отирлісь
да Тэсянь юӧртіссезлісь.
Сы понда Тэ сетін нылӧ юны вирсӧ.
Тэ нылӧ вештін керӧмныс сьӧрті.
7Езъяланіныс дынсянь кыліс мӧдіклӧн баитӧм:
─ Сідз, Дӧсвидзись Енным, Дӧсвермисьным,
судитікат Тэ он сорась,
Тэ веськыта мыжьян.
8Нёльӧт ангел кисьтіс аслас дозісь шонді вылӧ. Шондіыслӧ вӧлі сетӧм вын сотны отирсӧ биӧн.9Сылӧн ёна пӧжӧмсянь отирыс сотчисӧ. Нія видісӧ Енсӧ, Кинсянь локтісӧ этна умӧллес. Отирыс эзӧ бергӧтчӧ Енлань, медбы ошкыны Сійӧ.
10Витӧт ангел кисьтіс аслас дозісь вӧрпалӧн юралан пукӧс вылӧ. Вӧрпаыслӧн юраланінас пемдіс. Отирыс зубытсяняс курччалісӧ ассиныс кыввезнысӧ.11Нія ёрдісӧ енӧжись Енсӧ дойманнэзсяняс маитчӧмныс понда. Асланыс умӧль керӧммез кузя нія эзӧ тӧждісьӧ.
12Кватьӧт ангел кисьтіс аслас дозісь ыджыт Евфрат юӧ. Сэтісь ваыс косьмис. Сідз вӧлі лӧсьӧтӧм асыввылісь ӧксуэзлӧ туйыс.13Сэсся ме адззылі: гундыр ӧмись, вӧрпа ӧмись да бӧбӧтчись юӧртісь ӧмись петісӧ лягуша кодьӧсь куим сэрпӧсь лов.14Нія ─ кульлӧн ловвез, керӧны мыччалан пассэз. Нія иньдӧтчисӧ му вылісь ӧксуэз дынӧ, медбы ӧктыны нійӧ тышкасьны Дӧсвермись Енлӧн ыджыт тышкасян лунӧ.
15«То, Ме локта гусясись моз видзчисьтӧг. Шуда мортыс, кӧда олӧ лӧсьӧтчӧмӧн да видзӧтӧ аслас паськӧм сьӧрын. Сія оз понды ветлӧтны ляч пасьтӧг, и оз сюр рожа кулянас».
16Сэрпӧсь ловвес ӧктісӧ му вывсис ӧксуэсӧ ӧтіклаӧ. Сія местаыс шусьӧ еврей кыв вылын Армагеддон.17Сизимӧт ангел кисьтіс аслас дозісь руас*а. Сэк енӧжись Вежа Керкусис юралан пукӧсыс дынсянь кыліс горӧн висьталӧм: «Быдӧс керсис!»18Сэтӧн пондіс вирдавны да гымавны, кылісӧ гора шыэз, муыс пондіс ӧддьӧн зэгавны. Мортлӧн му вылас олӧм коста сэтшӧм ыджыт му зэгалӧмыс эз на вӧвлы. Сэтшӧм вынӧн зэгаліс муыс!19Ыджыт карыс паськаліс куим тор вылӧ. Быд муын каррес разьсисӧ. Еныс уськӧтіс тӧдвылас ыджыт Вавилон карсӧ да сетіс сылӧ юны Аслас лӧгӧн тыртӧм вина дозсӧ.20Ва шӧрись муэс быдӧс ӧшисӧ. Керӧссэс эзӧ лоӧ.21Отирыс вылӧ енӧжсис усис ӧддьӧн гырись шер. Сія вӧлі ӧтік талант*б сьӧкыта. Отирыс видісӧ Енсӧ усьӧм шерыс понда. Сія умӧльыс эд отирсӧ ӧддьӧн дойдіс.
*а 16.17 ру ─ воздух
*б 16.21 ӧтік талант ─ куимдас нёль (34) кило гӧгӧр
Глава 16
